el trAsgU d´aRecEs

Amás d´Ambas, la televisión n´asturianu tien otra nueva estrella ;) Dende la pasada selmana soi l´encargáu d´ellaborar l´axenda cultural de Televisión Local Xixón, un pequeñu espaciu n´asturianu que s´emite tolos díes dempués de los informativos (a les 14.55 y 20.25). De llunes a vienres ye la mio voz la que cuenta les actividaes culturales qu´hai na villa de Xovellanos y los fines de selmana, tamién dempués de los informativos, presento un espaciu d´unos cinco minutos onde faigo una esbilla de les actividaes culturales que pasen per Asturies (ye´l mesmu programa que se repite a lo llargo de tol fin de selmana). Tiembla Jesús Vázquez, yo seré´l prósimu presentador d´OT (Operación Tonada, ta nidiu)

Soi una persona inconstante, por dicilu dalgún xeitu. Quixi ser gaiteru, fui a clase y merque gaita y too (más guapina, col fuelle verde y los flecos prietos), agora la gaita lleva cuatro años enriba l´armariu. Dempués quixi ser fotógrafu, fizi un módulu y merque una bona cámara réflex, pa tener más currículo decidí estudiar Comunicación Audiovisual, pero como nun me daba la medía tuvi que meteme en Periodismu pa camudar nel segundu ciclu. Pero dime cuenta qu´eso de la información prestábame abondo, asina que quedeme col periodismu, colo cual la cámara lleva cuasi dos años nel armariu (yá tamos na era dixital, ho). Ente tanto, como vía qu´escribiendo yera a dicir más, con munchos matices más, quixi ser el George Orwell de les lletres asturianes. Pero como nun-y llego al mayestru nin a la suela de los zapatos, namás fui a espublizar esti pequeñu relatu orwelianu nel númberu 90 del “Lletres Asturianes” y un relatu patriteru-costumista (nun s´estrema muncho d´aquellos de “Ai, quien nun viera más sol que´l de la so quintana, nin comiera más mazanes que les asturianes”) nel númberu 1 de “Formientu”. Dempués d´esto, decidí pone-y fin a la mio “carrera” lliteraria y entamar a cuntar namás que coses reales, que por desgracia son muncho más murnies y más difíciles de dixerir. Equí vos dexo esti relatu, alcordeme d´elli pel momentu que tamos viviendo. Cuando lo fizi, fai cuatro años, taba arguyosu, agora lleolu y bono, ehí ta...

______________________________________________

Estaya 6
Ayalga, añu 2007. Les movilizaciones ciudadanes y los actos reivindicativos pa llograr la oficialidá de la llingua llariega socédense día tres día énte la negativa del gobiernu ayalgués a reconocer esti drechu. Ayalga anguaño ta nun procesu de reforma del so "Testu de drechos d´autogobiernu" que fai casi 30 años remanó l´Estáu centraliegu ensin que los ayalgueses pudieren votalu.

El 25 de Mayu de 2008 aprúebase nel parllamentu ayalgués, formáu na so totalidá por partíos d´ideoloxía centraliega, el nuevu testu ensin la oficialidá de la so llingua. Nel esterior casi 50.000 persones arrodien l´edificiu, ocupando tol centru de Céltica, la capital d´Ayalga, y glayando polos sos drechos llingüísticos. De sutrucu, una bomba españa nel interior del parllamentu matando a tolos diputaos y destruyendo l´edificiu, amás de dexar feríes de muerte a un bon númberu de persones que glayaben nel esterior.

Enxamás naide se proclamó autor de tal masacre, pero amplios sectores de la sociedá centraliega apuntaron col deu al ayalguismu (movimientu de defensa de los drechos políticos y culturales d´Ayalga), produciéndose na criminalización de tolo ayalgués. Dende´l propiu ayalguismu foron munches les voces qu´aseguraben que l´atentáu fora obra de la estrema drecha sofitada polos servicios secretos del estáu pa frayar col federalismu al que se dirixía l´Estáu centraliegu.

Pasaron los años y l´atentáu siguía esin esclariar, pero cada vegada yeren mayores los odios haza Ayalga y tolo ayalgués. La sociedá centraliega entamó a ver la llingua llariega como un inventu de terroristes pa llograr ser asemeyaos a les nomaes nacionalidaes históriques del Estáu centraliegu que caminaben haza´l federalismu.

Mentes tantu, nel añu 2012 próducense eleiciones al Estáu centraliegu y un nuevu partíu d´estrema drecha, Unidad Centralista, consigui la mayoría absoluta afalándose l´odiu a Ayalga como culpable de tolos males del Estáu. Una de les primeres midíes que remanó´l nuevu gobiernu foi probir la llingua llariega y el so usu mediante la nomada "Llei de desaniciu".

Escritores, profesores, músicos y una bona migaya de xente rellacionao cola llingua llariega ye asesinao ensin que se detenga a nadie. L´asesinatu con total impunidá de dellos miembros de l´Academia de la Llingua Llariega que se nieguen a que desapaeza esta institución, fai españar una auténtica guerra nes cais de toa Ayalga ente ayalgueses y ocupantes.

N´Ayalga, namás la xente que sabía daqué pelos güelos de la "Revolución de la Seronda" podía imaxinar una represión asina (esta revolución foi una auténtica guerra asocedida fai 70 años ente ayalgueses y les fuercies del Estáu centraliegu polos drechos de los trabayadores). El gobiernu autónomu foi sustituíu por un gobernador civil nomáu pol gobiernu central, abolióse´l Testu de drechos d´autogobiernu y establecióse la censura previa pa tolos medios de comunicación asitiaos n´Ayalga.

Les movilizaciones ciudadanes enxamás foron tantes y tan de cutio. Pero cada manifestación finaba cola intervención de la policía centraliega y decenes de muertos polos disparos al debalu d´esta: en dos años triplicóse´l númberu de fuercies del Estáu nel país. Los organismos internacionales callaron, enxamás gorgutiaron pallabra, y l´odiu haza Ayalga siguió medrando.

Nel añu 2021, ente la imposibilidá de finar cola llingua llariega, crease la "Lliga anti-vezu", encargada d´acabr con toa amuesa viva de la cultura ayalguesa. Esta patrulla comete les mayores barbaridaes enxamás imaxinaes: los llariegofalantes son esterilizaos, los neños de menos de 5 años son mandaos a zones centraliegofalantes, a los cornuaseros (la cornuasa ye un instrumentu de vientu tradicional d´Ayalga) faen-yos traqueotomíes pa que nun puean facer sonar los sos instrumentos, les muyeres son violaes, los campos semaos son rociaos de plagues, la xente entama a desaparecer...

Les zones rurales son les más castigaes, produciéndose grandes matances y llogrando acabar con casi tola xente que vive lloñe de Ciudá Ayalga, una gran urbe gris ya industrial de casi un millón de habitantes, vixilaos pola "Lliga anti-vezu", qu´ocupa tola zona central y ta enllena de grandes superficie d´abastecimientu que tienen el monopoliu del mercáu. N´Ayalga prohibióse´l mercáu tradicional y la venta de productos nun controlaos pol Estáu, llogrando´l desaniciu de la práutica de l´agricultura y ganadería en tol país. Esta macrourbe foi llograda en gran midida pola especulación urbanística y la colonización de xente d´otres tierres, que recibíen una gran compensación económica y unos privilexos por repoblar el territoriu ayalgués.

La represión a la que ye sometida Ayalga tien el so puntu cimeru cuando nel añu 2033 Europa conviértese nuna xunión de pueblos federaos y Ayalga pierde´l so nome y ye rebautizada per orde del presidente de la Confederación Europea como Estaya 6.

A partir d´agora a Ayalga y los ayalgueses, qu´enxamás tornarán a ser nomaos asina, solo-yos queda vivir el presente que-yos remanen y escaecer qu´hebo un tiempu nel que tuvieron un pasáu y una llingua na que cuntar les hestories del pasáu a los ayalgueses del presente.

Esti mensaxe dexáronlo nel blogue "L´Asturies Lliberal". Paezme que representa perbien el sentir mayoritariu de la nuesa sociedá y por eso pongolo equí.

Jorge — 12-07-2008 - 10:59:24 GMT 2

Soy de padre votante socialista. Y de madre votante del PP. Ambos se sienten asturianos y españoles. Los dos seguirán votando a sus partidos, pero son conscientes de que en el tema de la lengua, éstos se equivocan. Cuando éramos pequeños, siempre intentaron que recibiésemos clases de llingua asturiana. O por una cosa o por la otra, siempre daban largas "no se ha formado grupo", "no hay profesor", "el año pasado no estuvo matriculado en ella.." cada año una excusa. Entiendo el asturiano PERO NUNCA HE PODIDO APRENDERLO!!!!! ¿Qué se está haciendo? Veo que la lengua asturiana es un Patrimonio. Pues claro. Pero eso no basta. Si tú declaras un parque natural Patrimonio, pero ni pones guardas, ni cuidas los incendios, ni conciencias a la gente y dejas que todo el mundo suba en 4x4 y haga barbacoas, tendrás en 7 días un basurero olvidado. Tiene que tener una ley firme que lo proteja, y no "buenas intenciones".

Llevo díes deprimíu, yo soi de los de la esperanza ye lo últimu que se pierde (asina, la hostia ye más gorda y si digo la verdá, tovía la tengo, queda muncho hasta que l´Estatutu llegue al Congresu de los Diputaos, hasta imaxino que´l defensor de les llibertaes y los drechos ZP nun permita esi atentáu contra la igualdá de toles persones) y pensaba que por curtiu que fora l´avance, l´artículu 4 diba a ser meyor y la oficialidá ensin obligatoriedá de los peperos, diba ser un pasu alantre, que non el final, na igualdá de los asturianos ente si y colos otros habitantes del Estáu. Namás mos queda lluchar con más fuercia y más ganes, yo tengo muncho odiu y toi esperando la prósima mani/concentración pa glayar con toles fuercies y sacar too esto que llevo dientro, porque por muncho que-y pese a Félix Fernández de Castro, a Lastra o a Gustavo Bueno (y a dalgún “lliberal”) yo tengo, y siempre tendré, les manes bien llimpies (a pesiar de les barbaridaes que salen de la mio boca cada vez que pongo´l TPA-Noticias). Pero mientres hai vida, hai esperanza. Y si non mirái la llingua ayapaneca.

¿Nun vos alcordáis de Manuel ya Isidro?. Los dos caberos falantes d´una llingua indixena llatinoamericana, que llevaben años ensin falase por problemes personales, condergando esti idioma al desaniciu. Pues agora Manuel Segovia Jiménez dióse cuenta que si nun enseña a los mozos del pueblu la so fala, esta va morrer. Asina, que Manuel ta preparando al so fíu José Manuel pa que-y eche un gabitu y la selmana viniente poder entamar col cursu básicu de zoque ayapaneco na so casa. El vieyu, que ta postráu nuna siella de ruedes, dictara les pallabres y el so fíu de 27 años escribiráles nun pizarrín.

Mientres, Isidro Velázquez yá nun sal de la so casa, asitiada a 500 metros de la de Manuel. Cuasi nun faló un res colos reporteros qu´acudieron al poblaú de la rexón de Tabascu, namás-yos dixo qu´elli “garra la vida, llevantándome y cayéndome”.

EQUÍ TAMOS, EQUÍ VAMOS SIGUIR

“Otros” 3.700 y xubiendo

P.D: “Los otros” somos nós, el pueblu asturianu.

Luz Casal reñega del "Manifiestu por la lengua común"

Sabes qué, cantaste en gallegu, cantaste en catalán y nós tenemos que conformanos coles semeyes nel playón de Bayas del discu “Un mar de confianza”. Lo nueso acabóse...

Mira que la rellación del sexu cola llingua (asturiana) vien de llargo. Yá Antón de Marirreguera, primer escritor n´asturianu de nome conocíu, dixo-y nel so llechu de muerte al so sobrín que quemara unes composiciones de corte eróticu, “pa que nun se diga qu'un cura s'entretuvo nestes coses”. Y dende aquella pues ehí ta´l cancioneru tradicional, que dacuando, ye bien picantón y dalgunos rellatos eróticos que tien dado la lliteratura asturiana más nuevo. Pero hasta ehí, sacando al blogue “Ensin Refaxu”, nun hai posibilidá de ponese “gayoleru” (equí val el significáu asturianu o´l castellán) en versión orixinal asturiana. H.oder y mira que fai falta ho, que yá que nun hai oficialidá y ser asturianista ye lo más deprimente del mundu, polo menos daqué pa pasar un bon ratu (con un bon ratu). Nun pue entendese que los catalanes tengan una industria pornu en catalán, que los vascos yá pudieran esfrutar d´una peli pornu tornada al euskara y qu´agora los gallegos vayan poder ver la primer peli pornu en versión orixinal na llingua de Rosalia, col esplícitu nome de “Lingua galega”. Y los asturfalantes, los más necesitaos de ciñu, equí, a veles vinir, aguantando los calores del branu y la falta d´oficialidá con tal de nun sentir placer con una llingua foriata y represora.

Y pior que les pallabres ye esa portada...

Yo nun soi racista, pero a los xitanos nun los pueo ver
Yo nun soi racista, pero nun me prestaría ver al mio fíu/a con un/a negra
Yo nun soi racista, pero hai munchos inmigrantes que nun vienen a trabayar ¿eh?
Yo nun soi homófobu, pero, ¿cómo va ser ési gai?/ que fuerte, ¿ye gai ési?
Yo nun soi homófobu, nun tengo nada escontra los gais mientres nun lleven la pallabra gai escrita na cara
Yo nun soi homófobu, tengo amigos que son gais
Yo toi pola oficialidá, soi un políticu del/de la PP/FSA

NOTICIA: Rosa Díez en Llanes: “la llingua oficial d’Asturies ye’l castellán y lo demás son dialectos”.

La diputada taba n’Asturies participando nún congresu del so partíu sobre organización territorial y comentó tamién que busca “implantase bien n’Asturies”.

Ufrímoste la posibilidá d'unviá-y esti corréu, a la direición lleitrónica del partíu n'Asturies (ct.asturias@upyd.es).

BILLINGÜE MUNCHU MEYOR|BILINGÜE MUCHO MEJOR:

El mió nome ye [NOME] y soi ciudadanu asturianu, residente en [LLOCALIDÁ].

Permítanme unviá-yos esti corréu lleitrónicu col enfotu de facéi llegar a la cabezalera del so partíu, la Sra. Rosa María Díez González, el mió mensax que vien darréu:

Permítanme enviarles este correo electrónico con la intención de hacerle llegar a la líder de su partido, la Sra. Rosa María Díez González, mi mensaje siguiente:

N'ASTURIANU

Con motivu del Congresu d'esti domingu en Llanes de la formación política UPyD sobro la organización territorial, vusté, Dña. Rosa Díez, dixo públicamente que “la llingua oficial nel Principáu d’Asturies ye’l castellán y que lo demás, -refiriéndose al asturianu- son dialeutos o formes de falar”. Poro, pído-y que pida disculpes públiques a la comunidá asturfalante asturiana y a la ciudadanía asturiana en xeneral, polo que supón una grave ofensa ya insultu inxustificáu, basáu nuna manera d'atalantar radical y consecuencia del desconocimientu de la rialidá llingüística d'Asturies, lo que nun fae más que tracamundiar esta rialidá.

Munches gracies pola so atención.

[NOME Y APELLÍOS]

EN CASTELLANO

Con motivo del Congreso de este domingo en Llanes de la formación política UPyD sobre la organización territorial, usted, Dña. Rosa Díez, dijo públicamente que “la lengua oficial en el Principado de Asturias es el castellano y que lo demás, -refiriéndose al asturiano- son dialectos o formas de hablar”. Por ello, le pido que pida disculpas públicas a la comunidad asturhablante asturiana y a la ciudadanía asturiana en general, por lo que supone una grave ofensa e insulto injustificado, basado en una manera de pensar radical y consecuencia del desconocimiento de la realidad lingüística de Asturias, lo que no hace más que tergiversar esta realidad.

Muchas gracias por su atención.

[NOMBRE Y APELLIDOS]
--------------------------------------------

MUNCHA XENTE PEQUEÑO, EN MUNCHOS PUEBLOS PEQUEÑOS, FACIENDO MUNCHES COSES PEQUEÑES, PUEN LLEGAR A CAMUDAR EL MUNDU

Agur eta independentzia

P.D: Nel fondu-yos tengo ciñu, taba deprimíu y llevo dos hores mexándome de la risa

Mira que pasen noticies nel mundu y los medios de comunicación dando siempre les mesmes. Por suerte tenemos ferramientes como Esbilla.net onde los usuarios son los que deciden qué noticies van formar parte de l´actualidá del día y son los llectores los encargaos de da-y importancia a les mesmes al travíes d´una votación. En Galiza tamién tienen el so esbilla. Ellí llámase chuza y cada día hai varies páxines de noticies nueves pa esbillar. Lóxicu porque son “chuzadas” la mayoría de noticies de los diarios eleutrónicos gallegos. Equí non, da igual que´l Conseyu de la Mocedá sofite la oficialidá o que´l CAO presente la so propuesta d´articulu cuatro, nadie lo esbilla. ¿Tanto trabayu ye que cada persona que llee esbilla ponga una noticia?, cualesquiera d´Asturies.com, Asturnews, Lesnoticies.com o Europa Press, esa noticia de la edición local de LNE que pienses que la xente tien que saber, esi articulín que lleisti nun blogue y prestóte o esa babayada que visti pela rede y fízote gracia. ¿Pa daqué que tenemos por qué vamos dexalo morrer?

Nun toi d´alcuerdu cola declaración de patrimoniu de la humanidá pa les cueves asturianes, ye una imposición, ye poner a estes cueves per riba de les otres. ¿Qué ye que la cueva d´Arbedales, que ta equí a la veriquina d´Avilés, ye menos qu´elles?, ¿qué va facese coles otres cueves?, esta declaración va acabar con elles. Agora los neños estudiarán estes cueves nes escueles y van desconocer la esistencia de les otres, nun podrán ver mundu y los neños probes estudiaran estes cueves y los ricos les otres, estableciendo una diferenciación afalagada pola UNESCO. Estos neños nun podrán dase cuenta de la guapura del Niemeyer o´l Calatrava porqu´agora van pensar que pa que daqué seya guapu tien que tener milenta años y ser puramente asturianu. Con esta declaración tamos dando valir a les tesis asturtzales que dende va años faen por acabar cola convivencia nesta rexón trubiecu d´España. Con estos asturianones yá se sabe, de xuru que los qu´esfarrapaben les cueves pintando visones hasta los qu´anguaño esborrien los indicadores toponímicos tienen los mesmos xenes y un continuum sanguíneu.

¡Y que puxa Félix Fernández de Castro cagu´n mi mantu!

P.D; Ye de risión ver al Presidente del Principáu nel TPA Noticias (cuarta vez que salía nos primeros cinco minutos) diciendo que´l patrimoniu asturianu hai que protexelo, que ye un bien de la humanidá, que ye un día hestóricu, que tolos asturianos tenemos que sentilo como de nueso, que si patatín, patatán, babayaes vienen y van...

Tal pior direutor d´una televisión nel mundu (buscar una, namás qu´una, televisión en tol planeta qu´en llugar de potenciar lo que-y da audiencia, quiera acabar con ello) estudiando la posibilidá d´entamar a emitir programes en llingua de signos o sotitulaos pa les persones sordes. Prestaríame saber si los programes n´asturianu, como “Camín de Cantares”, l´espaciu de más audiencia de la TPA, entren tamién nesi sacu de programes, si se va sotitular “Al Aldu” o, teniendo en cuenta que ye un programa infantil, “El cuentacuentos de Presta Asgaya”. Yá que nun emiten informativos n´asturianu nun podríen emitir un avance de noticies n´asturianu y en llingua de signos como faen la TVG y TV3.

Que yo tenga conocimientu namás hai un llibru en braille-asturianu: "La narrativa asturiana nel cantu'l mileniu" d´Ismael González Arias, que foi editáu cola sida de la selmana de les lletres y en collaboración cola ONCE en 2007. ¿Fizo daqué l´Academia pa los sordos asturianos?, ellos tamién son asturianos y tamién tienen drechos.

Donny Reyes, ayalgueru de l´Asociación Arcoiris, organización hondureña de defensa de les persones llesbianes, gais, bisexuales y transxéneru, foi deteníu arbitrariamente en marzu de 2007. Na comisaría otros detenios violáronlo y golpiáronlo repetidamente, al paecer instigaos por un axente.

Según informes recabaos por Amnistía Internacional, seis axentes de policía dieron-y l´altu cuando salía con una collaciu de les oficines de la asociación en Tegucigalpa, capital d´Hondures, y pidieron-y los sos documentos d´identidá. Anque los amosó, los axentes ordenáron-y que xubiera al vehículu policial y, según los informes, golpiaronlo y obligáronlo a xubir.

De siguio llevaronlo a la comisaría de Comayagüela y ellí l´axente que lo metió na celda anunció a los demás deteníos: «Miren, equí-yos traigo a una princesina, yá saben lo que tienen que facer». Donny Reyes cuntó a Amnistía Internacional que los otros deteníos entendieron estes pallabres como una señal pa golpialo y violalo repeties veces.

Dony Reyes quedó en llibertá al cabu de seis hores y media, cuando accedió a pagar 200 lempires. Hasta la fecha, nun hubo avances nes investigaciones del casu; y la policía paez haber intentáu intimidalo tanto a alli como a l´Asociación Arcoiris

Amnistía Internacional camienta que tanto alli como otros miembros de la organización qu´encabeza puen correr grave peligru.

La to collaboración ye fundamental pa garantizar la seguridá de los defensores de los drechos humanos y evitar qu´estos graves fechos queden impunes.
¡Actúa!

Robla equí

Y pensar que naide cantó meyor que tu´l "Negra Sombra". Esi poema de Rosalía de Castro, esa poetisa nuna llingua que nun ye la común, ésa qu´escribió "probe Galicia non debes, charmarte nunca española, que España de ti se olvida, cal si na infamia naceras, cando eres ¡ai! tan fermosa". Ésa que taba casada col hestoriador y políticu Manuel Murguía, ési que tovía anguaño llamen "O patriarca" dende´l nacionalismu gallegu.

Canaries vuelve participar como país independiente nel concursu Mr Gai Europa que se cellebra esti añu en Budapest, que nun sé que pinta un país africanu nun concursu européu, pero bono... Otres naciones ensin estáu como Gales o Irlanda del Norte tamién participen, ¿Asturies pa cuando?.

Participantes del concursu

La gala de Mr Gai Europa tuvo que treslladase tres que descerebraos atacaran la marcha del Arguyu LLGBT de Budapest

ESCONTRA´L FACISMU DENGÚN PASU ATRÁS
ESCONTRA LA HOMOFOBIA TOLOS PASOS SON POCOS

Un periodista tien que ser lo más imparcial y oxetivu posible pa ser un bon profesional, nun dexase llevar poles sos opiniones y la so ideoloxía y tener como valor cimeru la veracidá. Sicasí, na Facultá enséñannos que na llabor periodística ye imposible ser dafechu imparcial, que dende que decidimos que noticies van entrar y cuales van quedar pa prau, que noticia ye más importante qu´otra y cual tien d´ocupar un llugar más destacáu yá tamos opinando (como bien mos dixo una profesora esti añu “si queréis manipular, manipulái que táis nel vuesu drechu, pero que nun se vos note que queda mui mal”). Por eso ye ablucante ver como güei na portada del diariu del movimientu la noticia principal ye la llegada del Guah.e a Asturies y que ZP nun fala de crisis en llugar de la lliberación de Ingrid Betancourt. Y más ablucante ye qu´una noticia asina abra la seición de “Sociedá y Cultura” y seya la tercer noticia agora mesmo de la portada de la edición dixital. Ye qu´hai que ser veraz y como dixo don Gustavín s´entama falando bable y acabes pegando tiros, que como venga la oficialidá vamos acabar como nes Vascongaes, qu´esto de la llingua tien muncho detrás y que p´amuesa un botón.

P.D: Pero que nun vuelva pasar.

Como bien diz la futura Decana de la Faculta de Filoloxía d´Uviéu, Rosa Díez, ta la llingua española, única y verdadera, y dempués hai dialeutos o fales de segunda categoría colos que nun llegues a dengún llau. Pos lo mesmo pasa col "Chiki-Chiki", tal que mos xune a toos y hai que conocer por coyones, el que tienes que saber baillar anque lleves cuatro sidres, dos cacharros y trés cerveces en riba (si ye asina pue que lo bailles meyor), y dempués tán les copies que faen na periferia, afalaes nel odiu y la intolerancia y que namás tienen tres d´elles proyeutos dixebriegos y batasunos que quieren finar cola convivencia d´esta una, grande y llibre.

L´ESTACA-TXIKI (Catalunya)

EL TXIRIMIRI (Euskal Herria)

EL TINI-TINI (Asturies)