el trAsgU d´aRecEs

Por facer que sienta esti país como lo que ye, un país
Gracies polo d´ayeri, un suañu, gracies.

Esta ye la penúltima entrada d´esta páxina. Ayeri fizo trés años qu´escribí la primer entrada del primer blogue y que meyor que finar xusto agora. Nun tengo muncho tiempu últimamente pal escribir y, amás, el trasgu d´Areces ta volviéndose demasiáu friki por mor de la mio participación n´Aruelu.com, agora pongo toles noticies ellí y esta páxina ensin noticies nun ye lo que yera. Llevaba varies selmanes camentando en dexar el blogue, pero quería esperar pa poder cuntar que Dixebra quedaron segundos nun festival de la canción européu y que Xune pidió la oficialidá ente cientos de millones d´oyentes de toa Europa. Asina qu´eso, lleemos n´Aruelu y vémonos na prósima mani de la oficialidá, que quiciabes tamién seya la penúltima.

"Hosannah in Excelsis" de Jacques Culioli

1. Jacques Culioli, Córcega, 80 puntos
2. Dixebra, Asturies, 73 puntos
3. Elin Kåven, Sami (Lapónia), 73 puntos
4. Mordens, Moldavos de Rusia, 56 puntos
5. Carnicats, Friul, 56 puntos
6. Jelte Posthumus & Pilatus Pas, Frisia, 54 puntos
7. Gwennyn, Breizh (Bretaña), 54 puntos
8. Surunmaa, Meänkieli / Tornedalsfinska (Finlandés del Valle del Torne, en Suecia), 51 puntos
9. Spasulati, Arbëreshë (pueblu de llingua albanesa que vive na Italia meridional), 51 puntos
10. Boy Elliott & the Plastic Bags, Galiza, 46 puntos
11. Yr Anioddeffol, Cymru (Gales), 44 puntos

Los ganadores corsos nos dieron los sos 12 puntos.

Los votos d´Asturies foron:
7 a los albano-italianos Spasulati
8 pa los friones Carnicats
10 pal corsu Culioli
12 pa la samí Elin Kåven

21.15: Los corsos ganen el festival, Dixebra segundos. Un día pa nun escaecer.

21.10: Beatriz Viado da los puntos d´Asturies: 7 a los Spasulati, 8 pa los Carnicats, 10 pa Culioli (foi lo mesmo qu´Eurovision 79) y 12 pa Elin Kåven.

21.07: Xube´l xuráu al escenariu a dar los sos votos. Entamen los gallegos, nun mos dan nada (¡nun gustamos!). Siguen votando los otros países, caún na so llingua, nun entiendo nada, s´entiende daqué asemeyáu a Dixebra cuando dan los 10 y los 12 puntos munches vegaes. En Radio Sele (norabona, sois grandes) falen de que van los primeros.

21.05: Jacques Culioli lleva´l premiu del públicu, la so campaña fizo efecto.

20.45: Na Radio Galega, con conexones en direuto, falen del públicu asturianu. Que yeren 4 pero tol momentu de pie y glayando. Destaquen la puesta en escena de los “Mordens” y d´Elin Kåven.

20.40: NIREBLOG.COM DEXA DE FURRULAR, ASINA QUE CRONOLOXÍA CON RETRASU

20.30; El públicu asturianu del festival faese notar, dempués de l´actuación de Dixebra pónense a cantar l´Asturies Patria Querida y tres el resume de cantares, sal el presentador y entruga; ¿tenéis favorita?, una parte del pública glaya ¡Dixebra, dixebra, dixebra!
20.20; Xune fina´l cantar pidiendo OFICIALIDÁ ente una audiencia de más de 100 millones d´oyentes.

19.40: Montonera d´aplausos al corsu, a los movíos albano-italianos y agora llegan los anfitriones (Elin Kåven, especialista en danza del vientre lapona).

19.30: Na Radio Galega falen de que 600 siguidores del corsu tienen un grupu de facebook pa votar en masa.

19.10: Primera actuación, abren el festival los gallegos. La presentadora presenta´l grupu y fala de la llingua, entrevista n´inglés al cantante, dempués torna al idioma local y actuación en direutu.

19.00: Entama´l Liet-Lavlut. La televisión frisia nun emite´l festival. El presentador entama la gala entregando ¿Cuántos de vosotros faláis llingües minoritaries?.

18.30; Entama l´especial de Radio Galega Música con munchos más medios que Radio Sele (¡¡¡llicencia yá!!!), conexones en direuto dende Lulea, entrevistes a anteriores xuraos y representantes gallegos. Falen del posible "votu políticu", qu´a ver si como n´Eurovisión los votos van pa los vecinos y "mos voten los asturianos". Dicen que´l xuráu va tener en cuenta la puesta en escena (qu´atención pa la sami Elin Kåven) y que tiren muncho pa la tradición. Como los comentaristes de Radio Sele, tán convencios de que los de so van ganar y Boy Elliott and The Plastic Bags son los meyores.

18.00: Entama l´especial de Radio Sele, con comite d´espertos y too, mui a lo gala pre-Eurovisión. Radio Galega Música (emisión pública gallega qu´emite en dixital) tamién emite´l festival, tovía nun entamó´l so especial.

15.00; Fina´l TPA-Noticias ensin dicir un res de l´actuación d´un grupu asturianu, nel nuesu idioma y énte millones d´espectadores de tol mundu

14.20: Les Noticies dixital fala de la bona acoyida del cantar asturianu. La so direutora, Beatriz Viado, representante asturiana del xuráu, diz que los suecos la ponen como favorita, inclús ta sonando na radio sueca. Mientres, el diariu dixital gallegu Vieiros fala de la bona amistá surdida ente la so delegación y l´asturiana.

Los ganadores foron los propios sámis, con Johan Kitti y Ellen Sara Bähr y el cantar "Lundiin Moitalan".

El segundu clasificáu foi'l gallegu Narf col cantar "Santiago"

Y los terceros foron los debutantes romanis Karavan

El ganador del Liet-Lavlut lleva un premiu en metálicu y ufre una actuación nun festival de la ciudá d´Udine (Friúl).

Presta ver la nuesa bandera nel cartelu del festival. Y coses que tien el gobiernu del Principáu, la so televisión gubernamental nun emite la gala (como fai col premiu al meyor cantar n´asturianu qu´empobina la propia alministración), nin fai un especial, como la mayoría de tv de les comunidaes llingüístiques participantes, pero si sal como collaborador nel programa del Liet-Lavlut (xunto´l selmanariu “Les Noticies”, la so directora, Beatriz Viado, ye la xuráu que representa Asturies). Como facer que faes ensin facer. Lo que si faen ye mandar u corresponsal a Méxicu pa falar demientres tola selmana de que´l Cnetru Asturianu d ellí cumple 50 años, amás d´emitir los actos el domingu en directo (asina gasten el presupuestu na RTPA). Esperemos qu´Ámbitu dedique un especial de “Pieces” a falar del Liet-Lavlut. Según “Les Noticies”, la TPA va facer un siguimientu del festival nos informativos del sábadu y, según diz, “n´espacios concretos sobre´l tema”.

Podéis siguir el festival n´asturianu al traviés del siguimientu especial de Radio Sele

Velo en direuto poniendo mms://mms.omropfryslan.nl/tv nel Real Player, Winamp o Windows Media Player

O sentilo al traviés de la radio pública sueca y la samí na web del festival

El grupu friulanu (país del norte del Estáu italianu) Carnicats son un de los grupos, que xunto al rock de Dixebra y los albano-italianos Spasulati, faen col so hip-hop una de les ediciones más cañeres d´esti Liet-Lavlut. Nesti vidiu aprovechen pa pedirnos el votu. Amás, de pasu, vemos como ye´l teatru onde va celebrase´l festival, el “ Kulturens Hus”.

Cuando los de Dixebra lleguen a Luleå, ciudá que va agospiar el Liet Lavlut, van topase con una ciudá asitiada nel Golfu de Botnia con 75.000 habitantes y capital del condáu de Norrbotten. La ciudá foi fundada orixinalmente en 1621 pol rei Gustavu Dolfu de Suecia en Gammelstad, pero en 1649 foi treslladada. El so puertu tien una actividá perimportante d´esportación de fierro y la Ilesia de Gammelstad foi declarada patrimoniu de la humanidá en 1996.

El vienres Dixebra realizará un ensayu y prueba de soníu nel propiu escenariu del festival, dempués de presentase oficialmente a los medios de comunicación locales. Más tarde habrá un conciertu públicu onde tocaran en direuto los particpantes del Liet Lavlut. Llueu, tendrán una cena na que tarán tolos participantes que compiten nel festival.

15 d´ochobre: Xornada bloguera mundial contra la probeza

La cadena norteamericana ABC prepara una nueva versión de la meyor ficción televisiva de tola historia, una serie de cultu de los 80, la grandiosa “V”.

L´argumentu de la serie orixinal (1983) entama con un planeta enteru emocionáu cola llegada d´enormes naves espaciales a les principales ciudaes del mundu. Los visitantes tienen apariencia humana y paez que vienen d´un xeitu amistosu y pacíficu, dicen que necesiten sofitu pa llograr solucionar los problemes medioambientales del so planeta y a cambiu ufren avances tecnolóxicos y la vacuna contra´l cancer. Los gobiernos del mundu acepten y los extraterrestres algamen poder ya influencia, pero entamen a pasar coses rares como qu´importantes científicos del mundu vuélvense zurdos cuando tola vida foron diestros.

El creador de la serie, Kenneth Johnson, reveló que la serie foi concebida orixinalmente como un programa relacionada col ascensu al poder d´un rexime nazi nos EEXX, pero l´ésitu de “La Guerra de les Galaxies” fizo que la NBC quixera esplotar el xéneru y Johnson camudó´l guión pa incluyir extraterrestres. L´emblema de los visitantes ye similar a esvástica nazi y el personaxe de Dina podría ser el real Dr. Josef Rudolf Mengele, conocíu polos sos experimentos con seres humanos en Auschwitz.

LA OPRESIÓN VA CONTRA LA CULTURA

N´Eurovisión cada país escueye´l so representante como más-y peta. Unos lo faen de xeitu internu (la televisión estatal noma a un representante ensin cuntar cola audiencia) y otros monten un concursu con gales, finales y semifinales (asina surdió OT). Y lo mesmo pasa col Liet-Lavlut, caún de los participante llegó al festival d´un xeitu estremao. Asina, hubo concursos de la canción en Frisia, Laponia, Escandinavia (el festival Laulun-laulut o festival de la canción pa minoríes pa Escandinavia y los Países Baxos) o Escocia col Nos Ur, primer festival celta y escocés de la canción. Tamién hubo semifinal nos países nordicos y Karelia. Pela so parte Galiza escoyó´l cantar al traviés del concursu de la Radio Galega "A polo ghit", que quier escoyer l´ésitu músical gallegu del branu y qu´esti añu, por primer vez, sirvió pa nomar representante en liet-Lavlut. Asturies va por llibre y Dixebra foi fiel al "failo tu mesmu" (o queda en casa si esperes que instituciones, televisión pública.. faigan daqué).

Miraxes (programa cultural al xeitu de "Pieces")

Luar (programa de variedaes que llidera en Galiza´l share del vienres pela nueche dende fai más de 10 años)

La participación de Dixebra nel Liet-Lavlut traerá la primer participación de la nuesa llingua nun festival de la canción européu, pero nun será la primer participación d´un asturianu/a. Nel 2006 Asturies tuvo representada n´Eurovisión pola mierense Jenny, anque por Andorra y en catalán. L´asturiana namás que llevaba un añu n´Andorra y tuvo qu´deprender catalán apriesa y corriendo pa interpretar en Grecia “Sense tu”, una balada onde la cantante fala de que nun tien razón pa vivir ensin el so amor y diz que anguaño ta al final del camín.

Pero la primer participación asturiana n´Eurovisión entamó y acabó mal. Dende qu´entamara la participación andorrana en 2004, foi la primer vez que la televisión nacional andorrana escoyía´l so representante de forma interna, lo que-y valió critiques, sobre too porque nel xuráu d´Eurovisión-Andorra taba´l propiu compositor de “Sense tu”. Por riba, a la probe, na so actuación nel festival vistiéronla de llutu rodeada de baillarines en bragues, que nun pegaba muncho (y menos mal, porque nun entamu ella tamién diba salir en bragues). Total, de 23 países Jenny quedó la última con 8 puntos, la peor participación d´Andorra n´Eurovisión y la Jenny de Mieres volvió a poner copes y namás se supo d´ella. Y coses que tien Eurovisión, qu´al añu siguiente un cantar perasemeyáu (baladina de que mal toi ensin ti) va y gana, un país del esti, home caro.

Gaélico-escoces (BBC-Alba)

Galés (S4C/BBC-Cymru)

Gaélico-irlandés (TG4)

Euskara (ETB 1)

Occitanu(Barcelona TV)

Xente preparao pa facelo n´asturianu hai

Nel Liet Lavlut, amás del premiu del xuráu, hai un premiu del públicu otorgáu al traviés de les votaciones del públicu n´internet. Echa-yos un gabitu al meyor grupu de la nuesa música, pel momentu encabezen les votaciones con muncho (ellos con 88 votos y los siguientes con 2). N´Eurovisión vótanse ente vecinos, nel Liet Lavlut podemos votanos nos mesmos ;)

Vota por Dixebra (o por quien te pete) equí

Amás de versiones, yá tenemos hasta remixes