el trAsgU d´aRecEs

...que nun se diga de los siguidores del Uviéu. Paez ser que los del culu moyáu son más asturianistes que los carbayones. Yo nun digo nada, pero hasta que nun vea amuesa de lo contrariu...

Esta semeya saquela fai más d´un añu en Madrid, nun chigre que taba nuna cai que diba dar a la Puerta del Sol (6,5 euros pola gracia, pero negeme a escanciala a lo madrilanu qu´ún tien los sos principios). Póngola agora porque resume mui bien el mio sentimientu futboleru: nun me presta´l fútbol(*), pero h.odióme que´l Uviéu nun xubiera y prestóme que lo ficiera´l Sporting (negru vime ayeri pa topar una radio que lo tresmitiera, la Real monopolizaba les ondes d´Euskal Herria y foi daqué imposible). Parafraseando aquel míticu cantar: "dende Oriente hasta Occidente, dende´l mar a la quintana, toles voces nuna ¡Puxa´l fútbol asturianu!. (Diba poner puxa´l Sporting pero arriésgome a que los d´Uviéu nun vuelvan pasar pequí).

P.D: De los otros "llogros" del fútbol ástur prefiero nun falar.

(*) hasta que dalgún equipu del país asturianice´l so nome y, entós, me faiga hincha.

...yá sabemos de quién ye la culpa, castrón.

Güei finen na ciudá bretona de Morlaix los XIII Xuegos Náuticos Intercélticos, que contaron como ye vezu con una representación asturiana. Estos xuegos foron creaos en 1995 en Bretaña y dende esi añu pasaron per tolos países celtes celebrándose nel nuesu país en dos ocasiones: nel 2000 y nel 2005, les dos na ciudá de Xixón.

Estos Xuegos Náuticos tán reconocíos poles Federaciones Internacionales de deportes náuticos (vela, surf, carreres de kaiak, remu) y añu tres añu foron garrando prestixu a esgaya. Anguaño tienen una participación d´ente 600 y 800 competidores. Sicasí, DENGÚN mediu de comunicación asturianu dixo un res sobre esti tema y la representación asturiana. Na páxina oficial de los xuegos podéis atopar más información sobre esti tema.

Ediciones anteriores de los Xuegos
1995: Bretaña (Presqu'île de Crozon)
1996: País de Gales (Tenby)
1997: Galicia (Ferrol)
1998: Cornualles (Bude)
1999: Ecosse - Gran Bretaña (Largs)
2000: Asturies (Xixón)
2001: Norte de Portugal (O Porto)
2002: Donegal - Irlanda (Ballyshannon)
2003: Bretaña (Pays de Morlaix)
2004: Galicia (O Salnés)
2005: Asturies (Xixón)
2006: Cornualles (Falsmouth)
2007: Bretaña (Pays de Morlaix)

Dos goles d´Etxeberria, ún d´Aduriz y otru de Gabilondo dieron-y la victoria a la seleición vasca de fútbol, nel primer partíu xugao fuera del Estáu en 69 años. Enantes del entamu del partíu, celebrao ayeri de madrugada en Caracas, los xugadores vascos enseñaron dos pancartes, una n´euskara y otra en castellán, onde reclamaben la oficialidá de la seleición vasca.