Dos visiones poétiques de la emigración moza, dende lo íntimo a lo social, nel postrer títulu de Trabe
POÉTICA (Por Xulio Vixil)
Hai munches formes d’esiliu, pero toes desemboquen na mesma llamarga amarga. L’esiliu pue ser económicu, políticu o inclusive amorosu. Esti llibru, que son dos, ye l’esiliu modernu de los que nun esisten, de los llamaos ‘lleendes urbanes’. Digo que ye un llibru que son dos, nel sen más estrictu. Baxo’l títulu xenéricu de TRESLALLENDE escuéndense dos poemarios, con dos autores y dos mundos, pero un mesmu esiliu, el qu’obliga a la mocedá d’Asturies a marchar del so país siendo invisibles, siendo esiliaos inesistentes. Nesti casu, Berto García y Carlos Suari amósenmos dos visiones poétiques de la fuxida forzosa, del dolor que significa pa ellos dexar atrás l’alma qu’alluma los caminos, pa ganase la vida nel ermu ayenu.
Berto García vuelve a regalamos la so poesía desnuda de cristal tallao y tresparente, na so estaya que titula NEL ANDÉN DEL IVIERNU. Colar pensando en volver, per aciu d’un viaxe non deseyáu, onde les pallabres foriates recuérden-y el dolor de tar lloñe; onde solo queda saborguiar el tastu de l’alcordanza, mientres percuerre los quilómetros buscando feches pal regresu; onde solo queda buscase a ún mesmu na diáspora, esperando’l día de nun tener que marchar. Y too, a cinco díes de señaldá, cola maleta enllena de nada.
Carlos Suari, en CUALESQUIER CIUDÁ YE ERMU, a ritmu de tren, nel so viaxe metálicu y na so poesía enllena d’ausencia y de vienres que nun lleguen, preséntase énte esta patria ingrata como un poeta sólidu. A 97 túneles d’equí, onde pesa l’alma y les despidíes, la infancia, l’alcordanza y l’esiliu son tres pates nes que ye imposible sofitase, onde acabes zapicando y cayendo nuna mar demasiao alloñada pa ser azul, verde o buxa. Nun queda más nada que suañar con viaxes imposibles, onde ochobre ye un infiernu que busca’l paraísu de la vuelta, paraísu onde la llingua ye orbayu. Cartografíes imposibles d’una patria negada y pacetible, na distancia imposible d’imposibles coordenaes.
LOS AUTORES
Berto García (31 años, Les Vegues, Corvera) ye autor d’Ensin otra sida (Trabe, 2005) y de mui bien d’obra publicao nes revistes de lliteratura del nuesu país: Entellunu, El Canciu’l Cuélebre, Lletres Asturianes y Reciella Malory. Mayestru de profesión, trabaya como interín anguaño nuna escuela de Castiella. Ye miembru de la Banda de Gaites de Corvera.
Carlos Suari (24 años, La Xungarosa, Avilés) ye autor del poemariu El mio cachu tírolu, publicáu n’internet de forma llibre en 2005. Llicenciáu en Ciencies de l’Actividá Física y del Deporte, estudiante d’Antropoloxía Social y Cultural y xuez y monitor de deportes tradicionales asturianos. Tien delles publicaciones científiques sobre l’aplicación educativa de la tradición física.
Esbilla
del.icio.us
