el trAsgU d´aRecEs

...y que naide se duerma que pasamos llista (una falta sele en materia de vindicación llingüística penalízase con un añu ensin conciertu pola oficialidá)

El 23 de xineru Hamzeh Chavi y Loghman Hamzehpour foron deteníos nel so país: Irán, esi onde´l so presidente diz que nun hai homosexuales. Dempués de sufrir tortures confesaron tar namoraos y mantener una relación, esto valió pa que les autoridaes del so país acusáranlos de sodomía y d´enemigos d´Alá, un delitu que los va condergar a morrer aforcaos.

Pegah Emambakhsh ye una iraní exiliada nel Reinu Xuníu por ser llesbiana. Esti país nun-y quier conceder l´asilu políticu y cuerre´l riesgu de ser deportada a Irán, onde será torturada y llapidada. Pegah diz que yá ta cansada de lluchar, que nun quier aparecer nos periódicos y que yá nun cree no qu´Ana Frank nomó “la bondá interior del ser humán”.

Seyed Mehdi Kazemi ye un mozu de 19 años qu´en 2005 marchó d´Irán pa estudiar en Londrés, ellí vióse obligáu a pidir asilu políticu porque les autoridaes del so país descubrieron la so sexualidá tres torturar –dempués lo mataron- a un mozu col que tuviera una relación. El gobiernu britanicu diz que Mehdi nun cuerre peligru nel so país y refuga da-y asilu políticu. Agora ta n´Holanda (onde les autoridaes conceden asilu a gais perseguíos nel so país) dempués de que la policía alemana lo detuviera intentando fuxir a Canadá, pero´l gobiernu británicu pidi-y al holandés la so devolución pa poder entregalu a Irán, onde lo aforcarán.

http://www.petitiononline.com/irangay/

Tolos díes miles de neñes en tol mundu son agredies de camín a la escuela o cuando tán nella. Dalgunes sofren amenaces d´agresión sexual d´otros estudiantes, hai profesores qu´ufierten notes más altes a cambeu de favores sexuales, ya inclús son violaes na escuela.

Nos EEXX, el 83% de les estudiantes de 12 a 16 años sofrieron acosu sexual. En Sudáfrica, una tercera parte de les violaciones de neñes foron cometies por profesores. En Tanzania, 14.000 neñes foron espulsaes nos caberos años por quedase embarazaes. En Xamaica, Togo, Nicaragua, Haití o Méxicu, l´acosu sexual ta xeneralizáu na escuela.

El resultáu ye que innumberables neñes nun lleguen a dir a la escuela o dexen los sos estudios.

Con motivu del 8 de marzu, Día Internacional de la Muyer Trabayadora, Amnistía Internacional fai un llamáu mundial pa finar cola violencia haza les neñes nes escules. ¡Actúa!

Esteban Beltrán.
Direutor AI-España

Namái falta la rempuesta, dempués de 30 años ye hora...

Güei fai 5 años que´l mundu salió masivamente a la cai pa esixir el non a la invasión d´Iraq. Nel Estáu español foron les manifestaciones más numberosos con más d´un millón de persones en Barcelona y Madrid, lo mesmo en Londrés, Roma o Nueva York. N´Asturies el 20% del país manifestóse n´Uviéu lo que produxo´l colapsu de los trenes y que muncha xente tuviera que quedar en casa.

Yo tuvi d´aquella na de Madrid por mor d´una visita a la feria ARCO y namás pueo definilo como impresionante: cais y cais enllenes de xente, onde mirares xente, el metru colapsáu pola negativa del conceyu a aumentar el serviciu... Alcuérdome de dir nel metru y sentir a ún paisanu vieyu como-y dicía a otru que la última mani na que tuviera fora la mani pola democracia tres el golpe d´estáu del 23-F, pero qu´a esta nun podía faltar.

Al final los dictadores enmazcaretaos de demócrates invadieron un país pa roba-yos el petroleu y dexalos nel caos total, pero´l mundu enteru salió a la cai, el mundu enteru pidió paz, ¿daquién pue dicir que nun mereció la pena?

Seis años dempués de que´l 11 de xineru de 2002 foren treslladaos los primeros deteníos, la vergoña sigui. En Guantánamo, el murniu símbolu de la guerra escontra´l terror, aína permanecen más de 270 persones. Deteníes ensin que-yos acusaren formalmente de dengún tipu de delitu. Sicasí, si ye delitu el tratu que se-yos da: Condiciones que constitúin tortura o tratu cruel, inhumanu o degradante, y ensin drechu a impugnar la llegalidá de la so detención.

Munchos de los deteníos presenten graves trastornos de salú, tanto físicos como mentales. Como Abdul Hamid Al-Ghizzawi, que tovía padeciendo graves problemes de salú, ta prisioneru na instalación más dura de Guantánamo y témese pola so vida.

Esiximos darréu al gobiernu de los EEXX el pieslle de Guantánamo. Robla pa unviar a Bush el mensaxe que debería entender dempués de seis años. Consiguiremos pesllar esti centru illegal, illexítimu ya inmoral. ¡Pesllaremos Guantánamo!

Gracies pol to compromisu

Esteban Beltrán
Direutor Amnistía Internacional