el trAsgU d´aRecEs

Tolos díes miles de neñes en tol mundu son agredies de camín a la escuela o cuando tán nella. Dalgunes sofren amenaces d´agresión sexual d´otros estudiantes, hai profesores qu´ufierten notes más altes a cambeu de favores sexuales, ya inclús son violaes na escuela.

Nos EEXX, el 83% de les estudiantes de 12 a 16 años sofrieron acosu sexual. En Sudáfrica, una tercera parte de les violaciones de neñes foron cometies por profesores. En Tanzania, 14.000 neñes foron espulsaes nos caberos años por quedase embarazaes. En Xamaica, Togo, Nicaragua, Haití o Méxicu, l´acosu sexual ta xeneralizáu na escuela.

El resultáu ye que innumberables neñes nun lleguen a dir a la escuela o dexen los sos estudios.

Con motivu del 8 de marzu, Día Internacional de la Muyer Trabayadora, Amnistía Internacional fai un llamáu mundial pa finar cola violencia haza les neñes nes escules. ¡Actúa!

Esteban Beltrán.
Direutor AI-España

Namái falta la rempuesta, dempués de 30 años ye hora...

Güei fai 5 años que´l mundu salió masivamente a la cai pa esixir el non a la invasión d´Iraq. Nel Estáu español foron les manifestaciones más numberosos con más d´un millón de persones en Barcelona y Madrid, lo mesmo en Londrés, Roma o Nueva York. N´Asturies el 20% del país manifestóse n´Uviéu lo que produxo´l colapsu de los trenes y que muncha xente tuviera que quedar en casa.

Yo tuvi d´aquella na de Madrid por mor d´una visita a la feria ARCO y namás pueo definilo como impresionante: cais y cais enllenes de xente, onde mirares xente, el metru colapsáu pola negativa del conceyu a aumentar el serviciu... Alcuérdome de dir nel metru y sentir a ún paisanu vieyu como-y dicía a otru que la última mani na que tuviera fora la mani pola democracia tres el golpe d´estáu del 23-F, pero qu´a esta nun podía faltar.

Al final los dictadores enmazcaretaos de demócrates invadieron un país pa roba-yos el petroleu y dexalos nel caos total, pero´l mundu enteru salió a la cai, el mundu enteru pidió paz, ¿daquién pue dicir que nun mereció la pena?

Seis años dempués de que´l 11 de xineru de 2002 foren treslladaos los primeros deteníos, la vergoña sigui. En Guantánamo, el murniu símbolu de la guerra escontra´l terror, aína permanecen más de 270 persones. Deteníes ensin que-yos acusaren formalmente de dengún tipu de delitu. Sicasí, si ye delitu el tratu que se-yos da: Condiciones que constitúin tortura o tratu cruel, inhumanu o degradante, y ensin drechu a impugnar la llegalidá de la so detención.

Munchos de los deteníos presenten graves trastornos de salú, tanto físicos como mentales. Como Abdul Hamid Al-Ghizzawi, que tovía padeciendo graves problemes de salú, ta prisioneru na instalación más dura de Guantánamo y témese pola so vida.

Esiximos darréu al gobiernu de los EEXX el pieslle de Guantánamo. Robla pa unviar a Bush el mensaxe que debería entender dempués de seis años. Consiguiremos pesllar esti centru illegal, illexítimu ya inmoral. ¡Pesllaremos Guantánamo!

Gracies pol to compromisu

Esteban Beltrán
Direutor Amnistía Internacional

Prestosu titular, ¿imaxináislu nos medios del país?. ¿Por qué lo asumimos como imposible?. La Paramount ta cabantes de confirmar a la Generalitat que tornara´l catalán la última entrega de la saga de Spielberg, “Indiana Jones y el Reinu de la Calavera de Cristal”, que va estrenase en tol Estáu´l prósimu 22 de mayu.

En Galiza la so versión de la Xunta Moza ta entamando una campaña pa pidi-y a la Xunta de Galiza que trabaye por una versión en gallegu nos cines del país vecín. Les mocedaes de la Mesa pola Normalización Lingüística nun aforraron tamién en crítiques pa la Secretaría Xeral de Política Lingüística yá que según afita l´últimu Plan de Normalización del gallegu aprobáu en 2004 han de doblase un mínimu de diez películes añales.

“Nada mos será dao. Nada que nun seya lluchao por nós. Nada será pa nós regalao. Nada que nun arrinquemos vendrá a ser de la nuesa casa. Nada que nun lluchemos vivirá ente nós”
(Subcomandante Marcos)

MANIFIESTU “REDE POLA DIVERSIDÁ FAMILIAR”

Los firmantes d´esti manifiestu concebimos la rede como una fonte d´información y entretenimientu, pero tamién d´activismu y participación social. Dende la disparidá ideolóxica, relixosa, racial y sexual mos xune´l nuesu compromisu cola igualdá y la diversidá. Poro, perafitemos el nuesu compromisu col respetu y la tolerancia haza los estremaos modelos familiares. Los tiempos camudaron y el modelu tradicional de familia convive anguaño con otros tipos, como les families monoparentales u homoparentales. Camentamos qu´esta diversidá enriquez abondo la nuesa sociedá y, con murnia, vemos día tres día como dalgunes estayes conservadores y retrógrades, encabezaes poles xerarquíes eclesiástiques, nagüen por imponer un modelu escluyente de familia tradicional. Por tou ello espresamos:

1) La nuesa mayor REFUGA a les actitues d´esclusión y discriminación que dalgunos sectores conservadores, encabezaos pola ilesia católica, amuesen haza los estremaos modelos familiares que conviven güei na nuesa sociedá. Camentamos que tres de la so enfatica defensa de la familia “tradicional” escuenden la intransixencia y l´odiu a la diferencia. Defendemos la diversidá como un rasguenriquecedor, tamién nel ámbetu familiar, y, poro, esiximos respetu y tolerancia pa toos y caún de los modelos de familia esistentes.

2) La nuesa firme DEFENSA de la igualdá y la diversidá, y poro, del drechu de too ciudadán, ensin importar la so orientación sexual, a amar, contrayer matrimoniu y construyir la so familia llibremente. Anguaño na nuesa sociedá esisten estremaos tipos de modelos familiares y toos deben de gociar del mesmu respetu y consideración colos mesmos drechos y obligaciones.

3) A lo caberu llamamos a la MOVILIZACIÓN social pa siguir alantre na igualdá y construyir una sociedá más llibre, igualitaria y diversa. Namái cola participación y la visibilidá será posible frenar les actitues discriminatories, intolerantes ya intransixentes que siguin esistiendo y condergando la diferencia.

TOLES FAMILIES IMPORTEN
SÍ A LA DIVERSIDÁ FAMILIAR

P.D; Si quies firmar el manifiestu o sumar el to blogue a la rede pola diversidá familiar entra en diversidadfamiliar.blogspot.com

El Sinivih ye un archivu de persones portadores del VIH que l´Estáu quier desendolcar, sicasí lleva años paralizáu viaxando de tribunal en tribunal. Munches foron les asociaciones d´afectaos pol VIH que llucharon contra la so activación dende que se creara nel 2000, pero a finales de setiembre´l Tribunal Supremu autorizó al Estáu a rexistrar “de xeitu semi-anónimu y confidencial cola sida del control sanitariu y epidemolóxicu” a los portadores del VIH, según el Ministeriu de Sanidá “como se fai na mayor parte de los países europeos”. Anguaño les asociaciones contraries al Sinivih tan acabantes de presentar un Recursu d´Amparu énte´l Tribunal Constitucional yá que pa ellos esti rexistru de portadores del VIH vulnera´l drechu a la intimidá de les persones afectaes pola enfermedá.

El sábadu foi un día que nun voi escaecer enxamás, un garapiellu d´imaxenes que van quedar muncho tiempu na mio memoria como exemplu de la dignidá d´un pueblu que quier mirar y desplicar el mundu coles pallabres d´equí.

Nun voi poder escaecer tola xente que pasó en coche a lo llargo del trayeutu Avilés-Uviéu y dábanos fuelgos pitando y llevantando´l puñu (hasta un conductor d´Alsa, les persones más bordes del mundu y que siempre te traten como un delincuente). Muncho tiempu va quedar na mio memoria la imaxe de toles ventanes de Posada de Llanera llenes de xente que salíen a mirar que taba pasando y d´onde salíen esos glayíos, nin el paisanu que llegando yá a la Estación del Norte salió a la so ventana con una asturina pa saludanos, ehí tuvi qu´aguantar que nun me cayera la llarimina (ún ye un sensiblón). Llegué a sentime protagonista d´una película cuando entrabamos a la capital per en mediu de la carretera con una pancarta de “Avilés pola oficialidá” y una caravana de dos quilómetros de coches detrás mientres los polis llocales abríen camín.

L´únicu malu de tol día foron los Guardies Civiles que s´animaron a acompañanos col so coche per tol conceyu de Siero y qu´amenazaron con multes dempués de qu´una persona tirara un bote de Coca-cola a la cuneta (quedóme mui nidiu que les fuercies de seguridá del Estáu nun tan pa protexer al ciudadán sinón pa protexer al poder del ciudadán que ñégase a quedar calláu), queríen quitanos dignidá faciéndonos sentir como delincuentes. Cuasi, más fuelgos pa llugar por una Asturies de toos y por una democracia dafechu.

Y dempués 20.000 persones enllenando el centru d´Uviéu, muncho glayamos: “Areces babayu fala n´asturianu”, “Yá, yá, yá oficialidá”, “Llingua asturiana na universidá”....

Nun voi poder escaecer el 24 de payares de 2007. Ellos siguiran enllordiando y mintiendo, como si foramos fatos que mos creyeramos les sos pallabres, colos medios de comunicación compraos y afalagando al poder, pero nós tuvimos ehí cola cabeza bien alta, esixendo dignidá y futuru y llanzando al mundu´l nuesu mensaxe democráticu: L´ASTURIANU LLINGUA OFICIAL.