el trAsgU d´aRecEs

Dempués de descubrir esa xoya que ye´l pop n´hebréu, ún entama a camentar na importancia de la música d´usar y tirar y el so espardimientu na televisión como pegoyu pal desensolcu de la identidá coleutiva d´un pueblu. Esos cantares machacones que nun te faen pensar y que bailles tolos sábados como´l que más dempués de cuatro sidres, tamién tienen el so valir na normalización social d´un idioma. La nuesa música algamó cumales inimaxinables fai décades, pero tovía nun tenemos música curcia-pop n´asturianu, lo más asemeyáu quiciabes ye´l “Na Caleya” de La Bandina (por tar compuestu cola finalidá de folixar y nun pensar, nun por que´l cantar seya malu). En tol Estáu, la única comunidá llingüística (sacantes la castellana, nidiu ta) que tien la posibilidá d´atopar música comercial nel so idioma ye la catalana, inclús munchos cantantes catalanes n´español suelen sacar singles de los sos “hits” na llingua de Ramón Llul. En Galiza tampoco hai pop en gallegu y la música comercial portuguesa tien el mesmu pesu nel país vecín qu´en Murcia. Pero a pesiar de too la TVG fai una apuesta pola “comerciabilidá popera” de la música gallega. Asina, nun ye raru ver nel “Luar” (programa músical qu´amesta gaites gallegues, copla andaluza y trunfinos y que lleva emitiéndose con ésitu tolos vienres dende fai una década) a cantantes españoles versionando temes tradicionales gallegos, a orquestes faciendo lo propiu a ritmu de merengue o cantando en gallegu temes pop perconocíos en castellán. Tamién la TVG tien el so propiu “OT”, pero mui estremáu del de Tele 5: en “Son de Estrelas” ca participante representa a una comarca gallega, nun hai academia y nos videos de presentación de los cantantes, lloñe del “glamour” de “OT”, mos amuesen la so vida nuna aldea gallega ente les vaques que cuiden tolos díes. La TPA tien de tomar exemplu, l´asturianu ye una llingua tan digna como cualesquiera pa cantar babayaes a ritmu de chumba-chumba, ¡quiero perrear n´asturianu!.

La ganadora del concursu “Son de Estrelas”, Belén Morís, interpretando con una compañera “Cantiga de Berce”, composición de “Fuxan os ventos” prohibida na dictadura.

La cantante Marta Sánchez interpretando “Quen poidera namorala” del escritor gallegu Celso Emilio Ferreiro.

Una orquesta gallega cantando en “Luar” un popurri de testos de Rosalía de Castro a ritmu de merengue.

La cantante Ugía Pedreira interpretando “Teño Saudade” nuna gala homenaxe al desaparecíu Andrés do Barro, interprete de canción melódica en gallegu na dictadura.

¿El Chiki-Chiki la primer frikada hispana n´Eurovisión?

La participación d´España n´Eurovisión pue ser dientro poco daqué de lo que falar siempre en pasáu. Y nun ye culpa de Buenafuente nin de los eurofans-anes botelles que ven el Chiki-Chiki como una ofensa a esi gran festival “musical” que ye Eurovisión. Ye que l´UER va reunise d´equí a poco n´Atenes p´analizar les prósimes reformes del festival y el direutor d´Eurovisión, el suecu Svante Stockselius, díxo-y a la prensa inglesa que por mor del gran númberu de patrocinadores del concursu les televisiones d´España, Francia, Alemania y Reinu Xuníu podríen perder el privilexu de pasar a la final d´Eurovisión gracies a la so aportación económica. La que se pue montar...

A TVE nun-y importa ganar Eurovisión, pero si la so audiencia: p´atopar un programa más vistu que la edición d´esti añu (23 programa más vistu de la hestoria d´España) hai que remontase al 2002: l´Eurovisión nel que participó Rosa. Por eso, pola audiencia, TVE lleva una montonera d´años pagando 50 millones de les antigües pesetes pa mantener un festival nel qu´añu tres añu España ye humillada. El problema ta en que si España tien que pasar pola semi-final (TVE namás qu´emitió una de les dos semi-finales y pela 2) ye más que probable que nun consiga enxamás llegar a la gala del sábadu (a nun ser que se lo tomen en seriu como faen los países del Esti), ¿y va tar el 60% de l´audiencia pendiente d´unes votaciones nes que´l so estáu nun participa?, ¿TVE y la mesmísima BBC lo van permitir?, ¿van participar nun festival nel que siempre queden nos caberos puestos y que por riba la so emisión, un sábadu en prime-time, va quita-yos puntos de share?.

Ésta pue ser la cabera humillación de los pequeños países europeos n´Eurovisión: nun fundaron imperios, nun estendieron les sos llingües nin les sos relixones pel mundu, nun tuvieron monarquíes cuyes historíes s´estudien nes universidaes, nun organizaron xuegos olímpicos, nun tuvieron colonies, nun esclavizaron a otres races, nun son centros de poder políticu mundial... Pero nun importa: los países del Esti tienen Eurovisión, ca vegada ye más de so.

P.D: Lo meyor que facía TVE yera retirase que yá sabemos que los países del Esti se voten ente si y bla, bla, bla... qu´España se retire d´una puta vez, que TVE dexe entrar a les televisiones de la FORTA na UER y que la TPA mande a Anabel Santiago pa Moscú (anque conociéndolos son capaces de mandar a daqué asemeyáu a lo de Remedios Amaya).

Pa que naide m´acuse d´antisemita almitó que´l cantar que más me presta d´esti añu d´Eurovisión ye´l que representa a Israel. Porque sí collacios, Israel participa dende 1973 nel festival européu y, amás, ye ún de los países pasa per Eurovisión arramplando con too. Dende´l míticu "A Ba Ni Bi" de 1978, el finxu hestóricu algamáu en 1998 cuando Dana Internacional, una muyer transexual (non el transexual, como diz l´homófobu y misóxinu d´Uribarri), ganó´l festival llevándolu a Xerusalém, fuera de les lleendes europees, o la polémica del añu pasáu col cantar "Push the Button" que criticaba´l programa nuclear iranianu y según les males llingües dalguna vegada camudaba´l "push" pol Bush. Y ye qu´Israel tien merecíu la so participación nel festival musical europeu, sinón enxamás veríamos actuaciones como esta del 2000. Una xoya, eses voces, esos saltinos, esi baille, esi piquín de los cantantes y lo meyor, la versión hebrea de la Fresina que sal cantando con esos güeyinos que paez qu´enantes de salir a actuar fumóse tolos praos d´Afganistan. Y pa finar l´actuación saquen les banderes d´Israel y Siria y piden paz, be happy collacios.

Nel 2004 Marta Roure fizo sonar por primer vez el catalán en toles televisiones del vieyu continente col cantar "Jugarem A Estimar-Nos"

Güei ye la primer semifinal d´Eurovisión y dende qu´en 2004 entamara la participación andorrana va ser la primer vez que nun s´oya´l catalán nel festival. Tamién fai cuatro años la organización d´Eurovisión decidió, por mor del númberu de países que pidiera participar, xebrar el concursu musical en dos ediciones (semifinal y final). Nun intentu deseperáu por algamar clasificase pa la final esti añu´l país de los Pirineos dexa pa prau la so llingua pa unviar a Serbia a la triunfina catalana Gisela con un cantar n´inglés.

Esti añu ye tan grande´l númberu de países que van participar que´l festival va xebrase por primer vez en trés gales, pero TVE namás que va emitir la semifinal de güei (21.00, La 2) y la final del sábadu (España paga más d´ocho millones d´euros polos drehos d´emisión y autoclasifícase pala final). Colo cual vamos quedar ensin ver les actuaciones de países como Portugal, Turquía o Suecia, según ellos porque nun quieren saturar, amosando nidiamente qu´a TVE nun-y importa un res Eurovisión y menos ganar (¿imaxináis les perres que cuesta montalo?). ¿Pue daquién saturase d´Eurovisión?, ¿qué serviviu públicu de mi madre ye ésti?. Lo que deveres-y importa a TVE ye sacar perres col Chiki-Chiki y que l´audiencia del sábadu te por riba de la de los otros canales. Por suerte tovía queden los "pequeños" países pa los cuales tovía Eurovisión ye una gran plataforma turística (quiciabes la única que tienen), un requexu abiertu al mundu p´amosar la so modernidá en trés minutos (tornáu a llinguax eurovisivu "facer l´hortera a más nun poder pa llamar l´atención")

Cuatro meses (dende´l 25 de xineru) lleva ensin actualizar el requexu dixital pal bable de "La Nueva Engaña". Bon xeitu de xustificar les sovenciones pa la promoción de la llingua nos medios de comuncación, perres a esgaya p´abrir un mediu dixital y tenelo namás que quince díes furrulando. ¿Onde tán aquelles bases pa la promoción de la llingua nos medios que dicía el Plan de normalización social del asturianu del 2005 que diben facese?, ¿en que coyones marafundien estes perres?, ¿tienen sentíu unes perres pa normalizar daqué que nun ye normal cuando ta comprobáu que nun s´algama esi principiu?.

Dientro cuatro díes Galiza va cellebrar el so día das letras galegas y asina conmemorar la espublización fai más d´un sieglu de “Cantares gallegos” de Rosalia de Castro. Nel país vecín el 17 de mayu ye día festivu, les escueles van tar pesllaes y la mayoría de gallegos tarán atravesando´l Minho pa dir a Portugal a mercar toballes o más lloñe si tienen suerte y puen facer puente. Pero a pesiar de too la visibilización del día grande de la so llingua ye enforma distinta que nel casu asturianu. Esi día los gallegos namás dir pela mañana al quioscu puen ver que tolos diarios editen esi día la portada dafechu en gallegu y a lo llargo de tol día la so televisión dedica la programación a homenaxear la llingua qu´utiliza como vehiculu d´espresión; la TVG tresmite l´actu de la RAG en direutu (sobre les doce del mediudía), esi día namás qu´emite cine rodáu na comunidá, estrenen un curtiu de plastilina nel so contenedor infantil basáu nun relatu del autor homenaxeáu y emiten pela nueche un documental sobre la so vida. Enforma diferente son equí les coses.

Nin una presencia curiosa tuvo la “Selmana de les lletres” na prensa del país comparáu colos años anteriores nos que s´homenaxeó a un xéneru y non a un autor (a lo qu´hai que sumar la campaña de desinformación, pa esto valen les sovenciones pa la promoción del bable). Y nin falar yá d´una televisión pública que llindó l´homenax a la llingua de los asturianos a un especial del xenial programa de la RPA “Nomes d´Asturies” sobre la vida de María Teresa González y la tresmisión el domingu de madrugada de la Xunta Estraordinaria de l´ALLA (3.000 espectadores y 2,7% de share), nin en diferíu´l vienres en prime-time anque polo menos esti añu la emitieron que nun ye poco. Tovía nun la pudi ver y espero que los créitos foran tamién n´asturianu non como l´añu pasáu cuando tresmitieron la llectura na Xunta Xeneral (esti añu nin la emitieron) y la TPA usó´l castellán como llingua vehicular de la emisión con un lletreru de “directo” llantáu na pantalla. Tele Tini nun fizo un res pa visibilizar la nuesa llingua´l so día grande, ¿nun pudo la Productora de Programes del Principáu facer un documental sobre la vida de l´autora homenaxeada?, ¿nun pudieron facer daqué asemeyáu a “Cinco Poemes” y rodar un curtiometraxe sobre un relatu de Mª Teresa González?, ¿nun pudieron informar na so web de dengún actu del día de les lletres más que de la presentación oficial de la “Selmana”?, ¿nun pudieron danos una allegría y emitir una película d´animación n´asturianu o simbólicamente emitir un informativu n´asturianu?. ¿nun pudieron estrenar la tercer temporada de “Camín de Cantares” que diben entamar a emitir n´abril?. Nin caxigalines mos dieron el “día del llibru y el discu n´asturianu”.

La RAG en Galiza tamién fai una Xunta Estraordinaria abierta al públicu pa cellebrar el día grande de la so llingua pero al contrariu que l´ALLA, salvo cuntaes ocasiones, nun la cellebra siempre nel mesmu llugar y asitia la xunta nel llugar de ñacencia del autor homenaxeáu, asina en 2002 cuando-y dedicaron el día al bercianu Padre Sarmientu la RAG llevo a Villafranca del Bierzu los sos actos de cellebración. A l´ALLA nun-y correspuende como a la RAG escoyer l´autor homenaxeáu pero agora que dende esti llau del Cordal entamamos a mirar pa Llión nun taría mal que l´añu que bien daquién solicitara a la Conseyería de Cultura que la Selmana tuviera dedicada a la figura de Eva González, la escritora llionesa qu´hasta la so muerte l´añu pasáu yera la matriarca de les nueses lletres. La xeografía asturiana ye como ye y nun sé yo si saldría bien garrar el vezu d´alloñar los actos de la capital (amás quién vería a Gabino tando les coses como tan), pero cuando llegue´l turnu de recordar a Eva González paezme que nun tien qu´haber dengún problema p´algamar alcuerdos cola Diputación llionesa pa que l´ALLA pudiera cellebrar la so Xunta Estraordinaria en Vil.lablinu o nel mesmu Llión y qu´amás la másima institución de les nueses lletres aprovechara pa nomar dalgún nuevu académicu ñacíu en tierres de l´Asturies Cismontana.

¡¡¡CENSURA NON!!!

Según informen na páxina “L’Asturies Lliberal” nos próximos díes un grupu promotores va aconceyar nun hotel de Mieres pa estudiar la creación d'un diariu en llingua asturiana. Según fontes averaes al proyectu, un grupu de promotores, formáu por empresarios, xestores culturales y profesionales de medios de comunicación, van aconceyar a primeros de mayu “pa entamar l'estudiu d'una iniciativa editorial que quier, ente más otres coses, facer posible l'apaición d'un nuevu periódicu diariu d'ámbitu asturianu, cola novedá de que s'editaría en llingua asturiana”.

d´Asturnews.com

___________________________________________________________________________

Pa un asturianu (y español) como min que suaña con poder facer periodismu en bable préstame muncho esta noticia. Cuando dexe estes tierres ensin llibertá por mor del nacionalismu nomaes les Vascongaes que más quixera que poder informar na nuesa fala melguera sobre les noticies del mundu y d´esta pequeña rexón trubiecu d´España. Yá yera hora d´un mediu escrito en bable batúa alloñáu de toa ideoloxía antiespañola, siempre dando voz a esos que se quieren apropiar de la llingua y prefieren que nun haiga oficialidá a que la traiga la xente de bona fe. Como va prestar lleer n´asturianu titulares como estos; Declárase la oficialidá gracies al votu del PP, Rajoy gana les eleiciones, Estudiar relixón católica yá ye obligatoriu hasta na universidá, El Papa excomulga a Zapatero, La OMS vuelve meter la homosexualidá ente les enfermedaes mentales, L´exercitu américanu va controlar l´estrechu pa sofitar la llucha escontra la inmigración...

P.D; A partires de güei cambeos na llinia editorial d´esti blogue por mor d´asegurame un futuru viendo les últimes noticies.

Jiménez Losantos falando del asturianu per aciu de la participación del presidente de Cantabria, Revilla, na presentación del primer diccionariu cántabru-castellán. Pal neñu mimáu de los bispos el "revillés" ye un inventu, asemeyáu a lo que fixeron los asturianos col "bable", escuchái hasta´l final que fala hasta de lo del "prau qu´atrapa". Ye murniu que´l presidente de la comunidá vecina tenga que vinir a defender la nuesa llingua, mientres los políticos asturianos callen como afogaos (tán más averaos a les posiciones de Losantos).

Fai 70 años munchos estauxunidenses pensaron que la tierra taba siendo invadida polos extraterrestres y que quiciabes yera l´entamu de la fin cuando´l direutor Orson Welles radió la novela de H. G. Wells “La guerra de los mundos”. En 2006 los belgues vieron como la RTBF (la televisión pública belga de fala francesa) interrumpía la so programación pa informar de que Bélxica yá nun esistía: el parlamentu flamencu votará a favor de la independencia, el Rei Albertu II acababa d´esiliase y un garapiellu de catalanes manifestaba la so gayola delantre del parlamentu europeu. L´Estáu quedo ablucáu hasta que bien avanzada la emisión la televisión valona punxo un lletreru onde se lleía “Esto ye una ficción”. En 2005 la televisión estauxunidense emitió´l documental ‘The Confederate States of America’ qu´imaxinaba como sería EEXX de ganar los confederaos la guerra de Secesión.

Más o menos esto ye lo que va facer güei (22.40 h) la canal estatal ‘LaSexta’; emitir la primer ucronía hestórica de la televisión española imaxinando como sería l´Estáu si los republicanos ganaren la guerra civil. Los televidentes sabemos que ye una ficción y nun mos va pasar como los belgues pero vamos poder ver como´l ministru Trillo preside l´alzáu de la banderona tricolor na madrileña plaza de Colón demientres suena l´himnu del Riego, ver como son los años d´esiliu de Franco y la so muerte en Nicaragua, la creación de la ONU con España como miembru fundador, Aznar y Zapatero conviviendo na Moncloa como Presidente de la República y xefe del gabinete, la devolución de Xibraltar al Estáu español en 2000 tres los alcuerdos algamos ente Inglaterra y España como miembros del bandu aliáu na II GM, Serrat ganando Eurovisión cantando en catalán, ETA enxamás esistió...

Diz el cantar de Dixebra que “nunca vas saber yá lo que perdimos” pero sería guapu imaxinar como sería Asturies si enxamás entraran les tropes franquistes, como sería tar anguaño cellebrando (deveres) los 200 años de la soberanía de la Xunta Xeneral... quién sabe, igual quiciabes tariamos cellebrando los 70 años de la declaración d´independencia d´Asturies y Llión...