el trAsgU d´aRecEs

L´acabantes de nomar nuevu direutor de la Corporación Aragonesa de Radio y Televisión, Ramón Tejedor, dio nuncia nuna entrevista que ye provatible qu´enantes de que fine esta llexislatura pue entamar a emitir Aragón 2, el segundu canal de la corporación. Esti canal va tener unos conteníos sobremanera culturales y lu que ye más importantes: va tener programes n´aragonés y en catalán d´Aragón, inesistentes tovía nel únicu canal de televisión col que cuenta anguaño la corporación: Aragón Televisión. Esto pue suponer un importante reblincu pa la normalización social d´esta llingua que se mantien nel Altu Aragón con un porcentax perpequeño de falantes, unos 10.000.

Anguaño la presencia de la llingua aragonesa na televisión llíndase namás a les televisiones locales. Per un llau na televisión local d´Andorra (Teruel) emítese´l caberu miércoles de ca mes “Chino chano” dende avientu de 1997, esti programa ta centráu na cultura, hestoria y tradiciones d´esta fastera. Demientres en Canal Bajo Aragón emítese “Mosicaire”, un programa dedicáu a tolos estilos musicales que se faen anguaño n´aragonés y que pue vese tolos miercoles a les 20 hores. Tamién ye reseñable la esistencia de Charrando TV, un proyeutu al traviés de la rede que podríamos nomar como una especie de YouTube en llingua aragonesa.

Hamaika Telebista Hedatzeko Taldea ye una asociación creada poles empreses EKHE (Gara), EKT (Berria), CMN (Deia), Euskaltel, Elkar y Bainet pa facer una rede de televisiones locales n´euskara. Fai poco algamaron llicencia d´emisión de televisión dixital terrestre nes 15 fasteres nes que ta xebráu´l País Vascu frente empreses como la COPE o Canal Euskadi, que quedaron ensin denguna. Esto supón que col aniciu d´emisiones de la TDT tolos cotarros d´Euskadi van cuntar con una televisión local na llingua propia, amás de les emisiones d´ETB pa too Euskal Herria qu´anguaño cuenta col primer canal (ETB-1) dafechu n´euskera y que cola llegada de la TDT sumaráse otru canal nesta llingua destináu a un públicu infantil y xuvenil, amás d´otru onde conviviran euskera y castellán.

Amás d´esto el Gobiernu Vascu esixe pa poder optar a les llicencies de TDT qu´a lo menos un 20% de la emisión seya en llingua vasca. Esto esfrónase cola situación d´Asturies onde´l Principáu namás qu´obliga a la emisión de cuatro hores de producción asturiana y onde nun se pidi en dengún puntu una mínima presencia de la llingua asturiana por curtia que seya. Paez qu´una de les grandes preocupaciones d´Areces ye la presencia de la llingua nos mass media, ayeri nuna entrevista en Punto Radio (la qu´usurpó la llicencia de Radio Sele) dixó qu´IX quier camudar al director de la RTPA (en realidá lo que quier ye que seya escoyíu pol parlamentu como se fai anguaño con RTVE) porque´l d´agora ñegóse a una presencia desmesurada de la llingua. Debe ser que diez minutinos al día y una hora los sábados ye una presencia normal frente a cientos y cientos de canales qu´emiten en castellán. Yá lo diz el cantar de K-Nalón: “en tolos putos canales falen una llingua que nun ye la mia, la que maten ca día”.

Según la cabera encuesta sociollingüística de Llera Ramo (2002) los asturianos camienten que la presencia de la llingua nes televisiones ye escasa (62,6 %) anque tán en desalcuerdo con una RTPA dafechu n´asturianu (64,7 %), frente a un 27, 1 % que opten pola totalidá de les emisiones na nuesa llingua (na encuesta de 1991 yera del 59 %). Na zona del Navia-Eo la demanda mayoritaria ye una emisión dafechu n´asturianu con conteníos en eonaviegu (74,7 %), la mayor demanda d´una televisión dafechu n´asturianu céntrase nesta zona, nos pueblos pequeños (52,3 %) y ente los que tienen como primer llingua l´asturianu (52,6 %). Na totalidá del país la opción más mayoritaria ye pidir a lo menos un 25 % d´emisión na llingua propia (25,7 %) siguío polos qu´opten pola metá de la emisión n´asturianu (24 %). Ornia, Areces y tola tropa nun faen casu a la opinión del pueblu, la consecuencia ye nidia, val con mirar los datos de la TPA de güei; un 4% de media (l´autonómica menos vista de tol Estáu Español). ¿Derrotó l´audiencia a una televisión asturiana en castellán como derrotó Asturies a la oficialidá nes urnes?.

Namás lleer la noticia en Fueya en Blancu corrí al quioscu. Yá ta nes mios manes, un númberu hestóricu gracies a esta restauración borbónica y a la falta de democracia propia de los tiempos del xeneral Pachu. ¡¡¡Llegue a pensar dempués de salir del quioscu que pasaría si me paraben los “grises” y me rexistraben teniendo nel mio poder una revista roxa y comunista!!!. Ablucante, la llibertá de prensa ye un de los pegoyos de les sociedaes democrátiques, ensin ella que nun mos falen de 30 años de democracia.

Como curiosidá dicir qu´ente les viñetes d´El Jueves podemos atopar una onde se fala sobre Cándido y Morala y la represión nel nuesu país.

¿Daste cuenta? Si quedes preñada, esto va ser lo más asemeyao a trabayar que fixi na mio vida.

El trés de marzu del 2008 va ser una fecha señalada pa tolos galeses con enfotu pol so idioma. Esi día ye l´acutáu pa la espublización de “Y Byd” (El mundu), el primer diariu en llingua galesa de la hestoria. El diariu, que va tener versión elletrónica y edición en papel cinco díes a la selmana, va cuntar con 24 trabayadores de los cualos 12 d´ellos serán periodistes. “Y Byd” yá algamo los 5.000 soscriptores que permitirán mantener la independencia del periódicu de grandes grupos mediáticos, amás recibió´l sofitu de los nacionalistes del Plaid Cymru (que fai poco alcordaron formar un gobiernu de coalición colos llaboristes), anque tovía nun ta nidiu si´l gobiernu echará un gabitu al mediu dando perres pa la so espublización.

Pel momentu lo que si van dar el so sofitu´l gobiernu y tolos partíos representaos nel parllamentu de Galés ye al “.cym”, la iniciativa que pidi un dominiu n´interné pal galés. Esta llingua, oficial nel so territoriu dende 1994 altraviés de l´acta del galés, tien más de 500.000 falantes (20% de la población del país) asitiaos na mayor parte nes zones nortiegues, anque n´Arxentina hai una pequeña comunidá de falantes yá que nel sieglu XIX 153 galeses fuxeron del so país al imponer los ingleses la so relixón y fundaron na provincia de Chubut el pueblu de Rawson.

El galés (cymraeg) tien anguaño una presencia curiosa nos medios de comunicación, asina hai dos periódicos selmanales, revistes mensuales y una percurtia presencia na prensa llocal. Quiciabes lo más importante ye la presencia d´una canal de televisión pública en galés; S4C (Sianel Pedwar Cymru - Canal Cuatro Gales). Esti canal ye la versión galesa del Channel 4 de la BBC con desconexones pa Gales na so llingua ente les 18 y les 22 hores –prime-time nel Reinu Xunío-, anque permite siguir a través del satélite la programación convencional de Channel 4 n´inglés asina como la emisión dafechu de programes en galés altraviés de la TDT en S4C Digitol. Del mesmu xeitu Radio Cymru de la BBC ufierta programación nes dos llingües dende 1977, fechu hestóricu algamáu gracies a la presión social del movimientu de vindicación llingüística (pa llograr la canal de televisión llegaren a amenazar con fuelgues de fame). Agora con la salida a la cai del primer diariu en galés la presencia d´esta llingua nos mass media medra hasta algamar un porcentax bien curiosu.

P.D; Un diariu en galés, un gobiernu de nacionalistes y llaboristes, oficialidá, sofitu del gobiernu al dominiu, televisión na llingua propía... ¿Ye Gales el paraisu o ye Asturies l´infiernu d´una cultura minoritaria?.

P.D.2; Y equí los salvapatries nacionaliegos y asturianos (non asturianistes, ellos son asturianos, el restu nun debemos selo) de los foros diciendo que´l únicu selmanariu n´asturianu del país tien de pesllar porque nun-yos presta la so llinia editorial, como si-yos obligaren a mercalu.

Dellos enllaces d´interes;
Videu emisión S4C (1985)
Videu emisión S4C (anguaño)
TV de prosimidá y llingües minoritaries

A partir de güei les seiciones n´asturianu del magazín "Con 2 de azucar" van independizase dafechu y convertise en programes independientes, amás pasarán a emitise peles mañanes colo cualo podremos velos de llunes a vienres de 11.20 a 11.30. Los micro-programes englobaránse baxo´l nome común d´"Al Aldu" y van emitise del siguiente xeitu;

• Llunes; "La Risión", Lluis Antón González lleva a la modernidá´l tradicional xeneru de monólogu n´asturianu averándolu a programes como´l "Club de la Comedia".
• Martes; "A galmiaes", Carlos Suari presenta les noticies deportives del fin de selmana nel país, con especial procuru polos deportes autóctonos.
• Miercoles; "Recetes con Cuentu", Milio´l del Nido enséñanos a cocinar un platu típicu asturianu, pero esti nun ye un programa de cocina´l usu, lo importante son les hestories que´l presentador cuenta relacionaes col platu a preparar.
• Xueves; "Xente de Casa", Inaciu Galán fai un repás poles coses más curioses que pasen per esta nuesa casa, el planeta tierra.
• Vienres; "Axenda d´Asturies", Mercedes Menéndez tráenos ca vienres tolos estrenos de cine, teatru, amueses y toles folixes qu´hai per Asturies, amás d´un repás a la cartelera de la TPA.

Esperemos qu´esta "independencia" seya´l puntu d´arrinque pa qu´estos programes amplíen el so horariu (Milio´l del Nido namás que pue dicinos los ingredientes porque nun-y da tiempu a más) y pa que quiciabes dalgún puea convertise nún magazín de mayor formatu.

Hai un programa n´ETB-2 que yá forma parte de la memoria coleutiva vasca, el programa ye "Vaya Semanita" y foi estrenáu fai pocos años nel canal en castellán d´ETB convirtiéndose en tou un fenomenu social al atrevese a facer humor del "conflictu vascu" (un tema tabú y muncho más pa un programa d´humor) y tolos tópicos sobre la sociedá vasca. De xuru que munchos de vosotros conoceis el programa poles munches vegaes que salió nos zappines de tolos canales, anque de xuru que nesos zappines nun pusieron dengún videu sobre temes referios al conflictu España-Euskadi (los meyores).

Dempués de trés temporaes el programa foi perdiendo fuelle tres la marcha del primer presentador, Oscar Terol, y la mayor parte del equipu pa un programa de TVE que duro tan poco que nun m´alcuerdo nin del nome. Pero esti añu´l programa, presentáu anguaño por Andoni Agirregomezkorta, incluyó nuevos sketches y personaxes y ente toos hebo ún que eclipsó a tolos demás: Los Batasunnis, la versión borroka de los Lunnis. Meyor nun desplicar nada, ver los videos que vos dexe y comentaime les vueses "impresiones".

Interesante polémica en Galiza; dempués de 25 años de sovenciones pa la promoción del gallegu nos medios dellos sectores consideren qu´hai que finar con estes polítiques de promoción yá que nestos años la presencia de la llingua gallega nun medró nos "mass media". L´asociación Ciberirmandade da Fala ta inclús montando una campaña pa pidíi a la Xunta que se desanicien les sovenciones afitando que "el gallegu nun se vende, si nun lu quieren usar que nun lu usen". Con esta sida entamaron cola campaña entitulada "Xunta; merco sumisión nos periódicos, pago con gallegu" que consiste n´unviar solicitues a la Secretaría Xeral de Comunicación, la Secretaría Xeral de Política Lingüistica, los grupos parlamentarios y los medios de comunicación pa que finen colo que califiquen de "despropósitu".

Según la Ciberirmandade da Fala estes sovenciones tienen ésitu cuando una vez desaniciaes cúmplese l´oxetivu pal que foron feches de xeitu normal y ensin dengún sofitu institucional. Si esto nun se dá ye que nun son valides. Los datos falen por si solos; un estudiu de la Universidá de Santiago espublizáu pola Mesa Pola Normalización Lingüística afita que dempués de 25 años de sovenciones el gallegu namás qu´algama´l 8 % de media nos periódicos d´esta comunidá, amás de tar arelláu a noticies de 2ª categoría o estayes como´l folclore o dalgún complementu del periódicu. La Ciberirmandade acusa´l gobiernu gallegu de "mercantilizar" la llingua rebaxando l´arguyu de la so cultura y mendigar la presencia del gallegu a cambeu de cientos de miles d´euros. Pa ellos, visto que´l dineru públicu nun val pa normalizar el gallegu, estes sovenciones namás que sirven pa consiguir tratos de favor de la Xunta haza los medios y viceversa.

Anguaño la presencia del gallegu nos medios d´información escritos llíndase a un periódico diariu en gallegu; "Galicia Hoxe" (que nun ye más que la edición en gallegu del conservador "El Correo Gallego"), un selmanariu d´ideoloxía galleguista "A Nosa Terra" y les noticies y artículos que espublizan los diarios por aciu de les sovenciones. Toa esta polémica entamó fai unes selmanaes cuando Política Llingüística ñegóse a sovencionar el mediu dixital "Novas da Galiza" yá que la so escritura nun sigui les normes de la RAG (según la llei de normalización del gallegu única institución con poder de normativización). El dixital escribe en gallegu según los postulaos del "reintegracionismo", ye dicir, escribir en gallegu con les normes grafiques del portugués pa asitiar a Galiza nel ámbitu de la lusofonía y non como una llingua estremada del portugués.

Muncho podriamos falar de les sovenciones nel casu asturianu, pero namás que voi dar un datu; el mediu que más perres recibe ye "La Nueva España" con 55.000 euros pa 2006, agora güeyái´l periódicu demientres una selmana-y dicime "tolo" qu´atopeis n´asturianu (o bable como-yos presta a ellos). Estos 55.000 euros enfrentase a los 16.000 que recibe Asturies.com, o los 9.800 que recibe Radio Asturies-SER por pequeñes seiciones y espacios frente los 6.700 euros que-y dieron a Radio Sele por ser dafechu n´asturianu. L´únicu mediu na nuesa llingua que paez nun quedar coles "miseries" ye "Les Noticies" que con 50.000 euros asítiase nel segundu puestu por riba de "El Comercio" (45.000) y empatando con "La Voz de Asturias", tamién con 50.000. Alcuerdome fai años de lleer, precisamente en "Les Noticies", la información sobre estes sovenciones y comprobar con gayola qu´una parte de les perres diben dir pa Popular TV pa facer el doblaxe de "David, el nomu", dos años dempués nada se supo, lu mesmu que los 6.000 euros que-yos dieron en 2005 pa "Les Noticies en COPE Asturias", yo nun oigo muncho la COPE ¿pero dalguién oyó asturianu nesta sintonia?. ¿Onde tán les perres?, ¿qué fai LNE con eses millonaes tolos años namás qu´afalar más la diglosia?. Siguiremos informando, n´asturianu y ensin una perra nel bolsiellu.

Déxovos equí un perinteresante reportax del programa "6O minutos" de la televisión aragonesa sobre los guah.es que tienen como llingua materna la fala propia d´Aragón.

Guetando pel YOUTUBE alcuentro unes imáxenes de la mítica serie "Los Aurones", una serie infantil de marionetes de finales de los ochenta que yá desaniciara de la mio memoria y que de sutrucu tornó remembrándome los bonos momentos que con ella pasara. Al paecer la serie nun tuvo muncho ésitu y namás que s´emitió una vegada, pero toos aquellos que la vieron tovía güei guarden un bon recuerdu del so visinao, y sinón mirái na rede. La serie diba sobre un pobláu llabrador y pacíficu que trabayaba l´oru pa facer apareos de llabranza, yá que nun sabíen el enorme valir del oru pa otros pueblos, y la so llucha escontra´l rei Grog, un malu malísimu que quería roba-yos tol oru.

Los argumentos yeren una especie de llocura ensin xacíu; el personax protagonista, nun m´alcuerdo por qué, podía llanzar rayos coles sos manes y convertir a los enemigos en frutes (colo cualo los malos siempre acababen convertíos en frutes anque nel capítulu siguiente tornaren a ser "normales"). Dempués taba la protagonista femenina que foi alcontrada conxelada nun bloque xélu y por dalgún motivu estrañu podía volar (¿?). Yo nun m´alcuerdo de muncho del so argumentu, namás que me prestaben a esgaya y que capítulu tres capítulu taba pegáu al televisor, pero tovía alcuerdome de "Poti-Poti", una especie de dinosariu que namás que sabía dicir "Poti-Poti, ñam, ñam" y qu´andaba pela vida siempre esfamiáu´l probe. ¿Nun vos va sonando más?.

Los andorranos Anonymus van interpretar en catalán ya inglés "Salvemos el mundu"

Confieso los mios pecaos; préstame Eurovisión, güei na 2 ye la semifinal y nun voi perdelu, pero nun penséis que soi un friki nin que soi siguidor de los babayos esos de NASH, por Dios. A min lo que me fai gracia ye esa especie d´arguyu nacional de los estaos, esi intentu de llamar l´atención tolo posible en 3 minutos y, una vez fináu´l programa, ver la gala post-festival en TVE-1 con tolos invitaos "especialistes" n´Eurovisión (Massiel y Salomé nun puen faltar, tampoco hai otres...) diciendo que mientres n´Eurovisión se tengan en cuenta los bloques políticos España nun va ganar (tamién dempués de quedar los últimos, como nos dos años anteriores, saquen l´arguyu patriu y falen de tongos ).

Hasta hai estudios sobre esti tema de los bloques nes votaciones; fai como un añu´l doctor Derek Gatherer de la Universidá de Glasgow, espublizó un estudiu nel qu'aplica téuniques de simulación molecular a les votaciones d´estos cincuenta años d´Eurovisión. Según el so estudiu nel festival hai cinco bloques que se voten ente si; l´Imperiu Viquingu (Escandinavia y países bálticos), el Benelux Parcial (Países Baxos y Bélxica), el Pautu de Varsovia (Rusia, Ucrania y Polonia), l´exe Pirenaicu (España y Andorra) y el Bloque Balcánicu (Croacia, Macedonia, Serbia y Montenegru, Grecia, Chipre, Bosnia-Hercegovina, Turquía, Eslovenia, Albania y Romanía).

Paez qu´a España nun-y vien mui bien que na Península Ibérica namás qu´haya tres estaos, quiciabes si dexaren participar a Asturies, Euskal Herria, Galiza... too seya pola bona imaxe d´España nel festival. Pel momentu TVE nin siquiera permite que se cante n´otra llingua que nun seya l´español (anque afala l´usu del inglés) al contrariu que pasa n´otros estaos billingües como Bélxica onde ún añu va la comunidá flamenca y otru la balona (precisamente los flamencos dieron al festival una de les meyores participaciones de la so hestoria col cantar d´aires atlánticos "Sanomi", interpretáu nuna llingua inventada y merecedor d´un segundu puestu). Paezme que pel momentu ta complicáu qu´Asturies y la so llingua suenen per toa Europa a traviés de la televisión, anque yo añu tres añu nun pueo dexar d´imaxinar a Anabel Santiago representando a la República d´Asturies con eses mezcles de tonada-reggae-blues que fai ella y qu´a min tanto me presten.

Anque nun hai representante asturianu si hebo una campaña a traviés de la rede pa que´l cantante asturianu Nacho Vegas fora´l representante de TVE nel festival, el mesmu Nacho Vegas dixo tar d´alcuerdo cola iniciativa pa intentar poner un toque de prestixu a Eurovisión. A pesar d´ello a la fin los representantes d'España son el grupu p´adolescentes NASH con un cantar, que como tolos años, dexara l´estáu en mui mal llugar y entós volveremos oyer a los contertulios de TVE falando de tongos y complots. Arguyu cañí.

La música atlántica tevo presente nel festival al traviés d´Urban Trad cantando nún llinguax inventao

La que lleva yá tres años sonando nel festival ye la llingua catalana al traviés de la participación andorrana, mesmamente l´añu pasáu la so representante yera una mierense que llevaba dos años viviendo nel país pirenaicu. Esti añu´l representante d´Andorra va ser el grupu Anonymous col cantar d´aires punk-rock ecoloxistes "Salvem el món", asina esperen que por primer añu Andorra puea clasificase pa la final. Pel momentu los andorranos consiguieron dase a conocer con mui poca promoción y paez que´l cantar ta prestando pel imperiu viquingu, por que nun tengo saldo nel móvil que sinón votábalos.

Una de les coses que más me presten d´Eurovisión son les polémiques que se monten (cuanto más polémica más posibilidaes de quedar ente los primeros). Esti añu destaquen Israel col cantar "Push the button" onde, ensin nomalu, se critica´l presidente d´Irán y el so programa atómicu, cosa que nun prestó un res a los responsables d´Eurovisión que cuasi nun permiten el cantar, y Ucrania col cantar "Dancing Lasha Tumbai" interpretáu por una drag-queen y que fizo que´l país xebrárase ente los sos partidarios y los más tradicionalistes que camienten que ye una deshonra pal país llevar a Verka Serduchka. Y eso que dalgunos dicen qu´Eurovisión yá nun ye lo que yera.

Y ye que nin la Unión, nin les sos instituciones, nin la moneda única, nin el día d´Europa (que foi ayeri pero pocos s´enteraron) y munchos menos la constitución europea, nada ye tan cohesionador como´l festival d´Eurovisión. Si la TPA ye "reflejo de Asturias" Eurovisión ye´l reflexu de la nueva Europa. Asturies tien que tar nel festival cantando n´asturianu, ¡coño que fuimos el primer estáu cristianu d´Europa!, ¿nun dicía´l PP que la constitución europea tenía de recoyer el carácter "humanista" (católicos de dir a misa los domingos pa entendenos) del continente?, pues con más razón tenemos que tar nós n´Eurovisión. Tenemos a Toli Morilla, Tejedor, Dixebra, Corquiéu, Nuberu, la Caunedo, Skama la Rede, K-Nalón, Skanda, Tuenda, Llangres... propuestes hai a esgaya que de xuru que dexen más ablucaos a Europa que munchos que tienen qu´acabar llamando l´atención pa facer daqué. Podrán nun danos la oficialidá pero esto nun lo podrán ñegar; ¡ASTURIES A EUROVISIÓN YÁ!, ¡¡¡PUXA ASTURIES Y PUXA EUROPA!!!