el trAsgU d´aRecEs

Dende fai ochos meses esti anunciu d´Amnistia Internacional entituláu “El poder de la to voz” nun se pue emitir nes televisiones del Estáu español pola prohibición del Ministeriu d´Industria y Comerciu. El Gobiernu d´España diz que´l vidiu onde se ven xefes d´estáu como Castro, Bush, Putin o Gadafi (alcordarse de los intereses económicos d´España nel Líbanu) recitando la Declaración Universal de los Drechos Humanos ye publicidá política polo que nun considera l´anunciu como un serviciu públicu ya impidi la so emisión de baldre (como ye vezu nos anuncios d´ONGs y asociaciones ensin ánimu de llucru), amás si dalguna televisión decidiera emitilu sería sancionada como infracción grave. Los de ZP xustificáronse diciendo que l´incumplimientu de los drechos humanos nun se pue criticar señalando a quien nun los cumple, qu´eso xenera controversia...

El Consell General des Pirineus Orientals reconoció oficialmente´l catalán como llingua de la Catalunya Nord (territoriu de fala catalana baxo alministración del Estáu francés) al traviés de la Carta del Catalán. Ye la primer vez qu´una entidá oficial llegaliza´l catalán en territoriu francés, fechu que yá foi calificáu por asociaciones catalanistes como hestóricu . La Carta yá fora aprobada´l 10 d´avientu pero cuasi nadie supo de la nueva hasta qu´agora s´espublizó nel boletín del Consell y llegó a les cases de tolos catalanes que s´asitien baxo alministración gala.

Nel mesmu preámbulu d´esta llei s´afita que´l reconocimientu del catalán nun va escontra´l francés y la unidá estatal y que se basa na Declaración Universal de los Drechos Humanos y na Carta Europea de les Llingües Rexonales, que tovía ta ensin roblar por Francia. El mesmu Consell diz que la llingua ye importante pal desendolcu económicu del país y nun reconocela sería una “bestialidá”.

Agora, según afita la Carta, el Consell ta obligáu a ser tresmisor de la llingua y cultura catalana y usala en tolos ámbitos de la vida pública, a entamar col enseñu billingüe y facer alcuerdos coles otres alministraciones pa que tamién la promocionen. Amás na Carta queda afitada l´autoridá normativa del Institut d´Estudis Catalans (l´academia de la llingua catalana). Anguaño yá ye posible dirixise a dalgunos funcionarios del Consell en catalán, ver cartelos nes carreteres y llibros nes biblioteques del Consell (una veintena de locales) nesta llingua.

El Consell ye una especie de gobiernu rexonal, anque namás que ye una sele descentralización con competencies en carreteres, n´asistencia social y escueles colo cual la incidencia pública de la Carta pue ser limitada y quedase nuna declaración d´intenciones (nun se pue escaecer qu´en marzu Francia cellebra eleiciones municipales y pue ser una midida con enfotos eleutoralistes).

A pesiar d´ocupar el país, bombardealos pa lleva-yos los nuesos valores de llibertá y la nuesa democracia occidental Afganistán ta mui lloñe de ser un estáu onde la población pueda vivir cola dignidá que merez cualesquier ser humanu. El Senáu afganu ta acabantes de sofitar la sentencia que condena a muerte a Pervez Kambaksh, estudiante de periodismu de 23 años, cola robla del propiu Sibghatullah Mojaddedi, una de les manes dreches del presidente Karzai (el cual va tener la última pallabra sobre la vida de Parvez).

Según diz Reporteros ensin Fronteres l´artículu pol que foi condenáu Parvez nin siquier critica l´Islam, sinón que fai un análisis de lo que diz el Corán sobre´l papel de les muyeres. Pa la organización Parvez en realidá ye un oxetivu menor de los clérigos afganos, qu´en realidá tendríen como oxetivu rial al so hermanu mayor Ibrahimi, periodista d´investigación nel norte del país que yá recibió delles amenaces por afondar en violaciones de los drechos humanos sobre la población afgana.

Syed Parvez Kambakhsh ye un estudiante universitariu de 23 años que trabaya de periodista nel diariu afganu “Jana-e-Naw” (Nuevu mundu). Parvez ye noticia yá qu´un tribunal de la ciudá de Mazar-e-Sharif ta acabantes de condenalu a muerte por distribuir na Universidá de Balkh un testu onde se critica´l xeitu en que l´Islam trata a les muyeres. Según los xueces el testu ye “insolente” y “blasfemu” ya interpreta erróneamente los versículos del Koran, too ello a pesiar de que los tribunales afganos tan obligaos pola Constitución a protexer la llibertá de pensamientu y espresión.

El procesu tuvo llugar a puerta zarrada y ensin la presencia del abogáu de la defensa, amás ún de los trés xueces que lu xulgaba amenazó con arrestar a los periodistes y partidarios de Parvez si estos amosaben tar al so favor. Agora a Parvez queda-y recurrir, sicasí tará presu demientres tol procesu. La Federación Internacional de Periodistes y Reporteros ensin Fronteres yá refugaron la sentencia.

Seis años dempués de que´l 11 de xineru de 2002 foren treslladaos los primeros deteníos, la vergoña sigui. En Guantánamo, el murniu símbolu de la guerra escontra´l terror, aína permanecen más de 270 persones. Deteníes ensin que-yos acusaren formalmente de dengún tipu de delitu. Sicasí, si ye delitu el tratu que se-yos da: Condiciones que constitúin tortura o tratu cruel, inhumanu o degradante, y ensin drechu a impugnar la llegalidá de la so detención.

Munchos de los deteníos presenten graves trastornos de salú, tanto físicos como mentales. Como Abdul Hamid Al-Ghizzawi, que tovía padeciendo graves problemes de salú, ta prisioneru na instalación más dura de Guantánamo y témese pola so vida.

Esiximos darréu al gobiernu de los EEXX el pieslle de Guantánamo. Robla pa unviar a Bush el mensaxe que debería entender dempués de seis años. Consiguiremos pesllar esti centru illegal, illexítimu ya inmoral. ¡Pesllaremos Guantánamo!

Gracies pol to compromisu

Esteban Beltrán
Direutor Amnistía Internacional

Van saber a quién llames, cuándo, dende onde y el tiempu que fales, pero en realidá ye too pola to seguridá, la to intimidá nun merez la pena si ye pol bien del país. Poro dende´l 1 xineru n´Alemania les autoridaes rexistren toles llamaes, tanto a fixu como a móvil, de xeitu automáticu demientres seis meses p´archivales y asina prever atentaos terroristes. Según dicen nun van escuchar lo que los ciudadanos falen per teléfonu.

Y en 2009 tamién se rexistrará l´accesu a internet, la duración de la conexón, la direición IP y el propiu correu elleutrónicu, del mesmu mou podrán xixilar el conteníu d´un discu duru de cualesquier ordenador del país ensin autorización especial, eso sí, en casos nos que seya dafechu necesariu. Tamién podrán espiar los télefonos d´abogaos, periodistes y médicos, dexando pa prau´l secretu profesional.

¿Yera Orwell un mayestru de la ciencia-ficción o un visionariu?

¿Ta ca día la sociedá totalitaria imaxinada pol mayestru George Orwell más cerca?.

Entamen por identificanos, por fichanos de xeitos que namás fomos a imaxinar dientro de les noveles futuristes de ciencia-ficción y acaben por metenos presos acusaos de terrorismu por promover l´activismu y la movilización, la llucha por unes idees que camientes xustes y desendolques d´un xeitu pacíficu pero que nun vienen bien al poder establecíu.

Bienllegaos a 1984 y tar sollertes, el Gran Hermanu vixila.

“La inorancia ye fuercia”
“La guerra ye paz”
“La llibertá ye esclavitú”

Asturies xixilada pol Gran Hermanu

Dempués de 150 años de la robla d´unos alcuerdos ente los indios Sioux y los EEXX los primeros decidieron frañar colos vieyos trataos, yá que según afiten los indíxenes americanos EEXX nun cumple con dengún de los 33 alcuerdos. Pa los Lakota “los alcuerdos son pallabres ensin valir sobre papel ensin valir, y foron violaos pa robar la nuestra cultura, la nuestra tierra y los nuestros vezos”.

La tribu, a la que pertenecieren los míticos Toru Sentáu y Caballu Llocu, ta espardida por cinco estaos y anunció la “dixebra” nuna rueda de prensa cellebrada en Washington. N´ella un de los representantes de los Lakota, Russel Means, afaló a tolos miembros del so pueblu a independizase y dixó que yá comunicaren al Departamentu d´Estáu la so decisión el pasáu llunes, amás anunció que la nación indíxena asoleyará los sos propios pasaportes y carnés de conducir.

Nun me presta nada la Navidá, esi tufu a fiesta relixosa mecida col capitalismu más salvaxe dame unes revoltures que nun tien xeitu. Pero güei lleendo la edición bilbaína del diariu de baldre “20 minutos” entróme una cosa perestraña, de xuru que yera eso que llamen “espíritu naviediegu”, que fai cuantayá que nun sentía llegaes estes entrañables feches. La noticia en cuestión falaba d´un colexu de la capital bilbaína onde los neños inmigrantes son mayoría, en total 140 escolinos árabes, chinos, llatinos, xitanos, africanos y, los menos, vascos. Asina anguaño nel colexu Múgica hai nes paredes cartelos onde pue lleese “Bona Navidá” en 16 llingües estremaes, anque a la fin el “Zorionak” vascu ye´l más usáu nos patios del colexu.

Agora los escolinos tan toos gayoleros porque´l prósimu 21 d´avientu va visitar el colexu Olenztero, la versión made in Euskalerria de Papa Noel, y va trayer regalos pa toos, amás van facer un festival y van dir tolos escolinos col traxe del país. Tamién van poder xintar productos típicos d´Euskadi fechos na cocina del colexu y llambionaes que van llevar los padres d´inmigrantes fechos con ingredientes mercaos nel barriu de Bilbao La Vieja (fai cuatro años cuando conocí esti barriu yera´l paraisu del tráficu de drogues y anguaño ye una mecigaya de razes, llingües, kebaps y sones africanos y llatinos). Hasta tienen montáu un belen viviente con un neñu Xesús prietu, fíu d´una virxe María brasileña y un San Xosé ecuatorianu. Y eso qu´en munchos casos los neños nun sabíen nin que yera la navidá hasta esti añu.

Y cuando vuelvan de les fiestes naviediegues tendrán que preparase pa cellebrar l´añu nuevu chinu como a entamos de cursu cellebraron el Ramadán, hasta hai talleres nel colexu nos que los padres y madres cuenten cuentos de la so tierra na so fala vernácula. La propia profesora qu´empobina toles actividaes déxalu mui nidiu nes sos declaraciones al mediu: “Cellebramos la Navidá como fechu cultural; non como daqué relixoso. Asina puen participar tolos neños (...) Los neños nun son metá árabes y metá vascos. Son 100% vascos y 100% marroquianos”.

Prestaríame que´l mundu pudiera ser como la vida ente les paredes del colexu Múgica.

La tensión na que s´atopa Bélxica dende que´l pasáu 10 de xunu cellebráranse unes elleiciones nes que francófonos y flamencos nun foron a formar un gobiernu de coalición tuvo´l so reflexu´l pasáu sábadu na cellebración de la gala de Miss Bélxica. Too entamó cuando Alizée Poulicek, una rubia de 20 años d´orixe africán, taba contestando a les entrugues de la presentadora de la gala, Ann van Elsen, nuna entrevista que se desendolcaba nes dos llingües de Bélxica, pero cuando la presentadora camudó del francés al flamencu l´aspirante a Miss pidió-y que-y falara en francés. Entós el públicu qu´enllenaba´l Lotto Arena d´Amberes, la principal ciudá de Flandes, entamó a glayar yá que según les normes del certame Miss Bélxica tien que dominar les dos llingües del Estáu. A la fin Alizée foi coronada como Miss Bélxica, con razón, nin que pa ser floreru hubiese que saber idiomes.