el trAsgU d´aRecEs

Nun me presta nada la Navidá, esi tufu a fiesta relixosa mecida col capitalismu más salvaxe dame unes revoltures que nun tien xeitu. Pero güei lleendo la edición bilbaína del diariu de baldre “20 minutos” entróme una cosa perestraña, de xuru que yera eso que llamen “espíritu naviediegu”, que fai cuantayá que nun sentía llegaes estes entrañables feches. La noticia en cuestión falaba d´un colexu de la capital bilbaína onde los neños inmigrantes son mayoría, en total 140 escolinos árabes, chinos, llatinos, xitanos, africanos y, los menos, vascos. Asina anguaño nel colexu Múgica hai nes paredes cartelos onde pue lleese “Bona Navidá” en 16 llingües estremaes, anque a la fin el “Zorionak” vascu ye´l más usáu nos patios del colexu.

Agora los escolinos tan toos gayoleros porque´l prósimu 21 d´avientu va visitar el colexu Olenztero, la versión made in Euskalerria de Papa Noel, y va trayer regalos pa toos, amás van facer un festival y van dir tolos escolinos col traxe del país. Tamién van poder xintar productos típicos d´Euskadi fechos na cocina del colexu y llambionaes que van llevar los padres d´inmigrantes fechos con ingredientes mercaos nel barriu de Bilbao La Vieja (fai cuatro años cuando conocí esti barriu yera´l paraisu del tráficu de drogues y anguaño ye una mecigaya de razes, llingües, kebaps y sones africanos y llatinos). Hasta tienen montáu un belen viviente con un neñu Xesús prietu, fíu d´una virxe María brasileña y un San Xosé ecuatorianu. Y eso qu´en munchos casos los neños nun sabíen nin que yera la navidá hasta esti añu.

Y cuando vuelvan de les fiestes naviediegues tendrán que preparase pa cellebrar l´añu nuevu chinu como a entamos de cursu cellebraron el Ramadán, hasta hai talleres nel colexu nos que los padres y madres cuenten cuentos de la so tierra na so fala vernácula. La propia profesora qu´empobina toles actividaes déxalu mui nidiu nes sos declaraciones al mediu: “Cellebramos la Navidá como fechu cultural; non como daqué relixoso. Asina puen participar tolos neños (...) Los neños nun son metá árabes y metá vascos. Son 100% vascos y 100% marroquianos”.

Prestaríame que´l mundu pudiera ser como la vida ente les paredes del colexu Múgica.

La tensión na que s´atopa Bélxica dende que´l pasáu 10 de xunu cellebráranse unes elleiciones nes que francófonos y flamencos nun foron a formar un gobiernu de coalición tuvo´l so reflexu´l pasáu sábadu na cellebración de la gala de Miss Bélxica. Too entamó cuando Alizée Poulicek, una rubia de 20 años d´orixe africán, taba contestando a les entrugues de la presentadora de la gala, Ann van Elsen, nuna entrevista que se desendolcaba nes dos llingües de Bélxica, pero cuando la presentadora camudó del francés al flamencu l´aspirante a Miss pidió-y que-y falara en francés. Entós el públicu qu´enllenaba´l Lotto Arena d´Amberes, la principal ciudá de Flandes, entamó a glayar yá que según les normes del certame Miss Bélxica tien que dominar les dos llingües del Estáu. A la fin Alizée foi coronada como Miss Bélxica, con razón, nin que pa ser floreru hubiese que saber idiomes.

Esti mapa sal nun artículu del diariu británicu "The Thimes" sobre los países europeos que puen algamar la so independencia cola llegada del 2020. Asturies nun la busquéis porque nun sal, estos del Times....

5 presos mapuches, pueblu indixena baxo alministración chilena, lleven dende pasáu 10 d´ochobre en fuelga de fame pa esixir la fin de la represión escontra´l so pueblu. Los cinco presos, del total de venti mapuches qu´hai nes prisiones chilenes, quieren asina denunciar la militarización del so territoriu por parte del Estáu y pidir la lliberación de tolos presos políticos. Anguaño´l pueblu mapuche enfréntase a rexistros, violaciones, detenciones y una fuerte presencia del exercitu y de la policia chilena pa protexer los intereses forestales y mineros de los grupos económicos más poderosos del país que convierten al territoriu mapuche na zona más militarizada del Estáu llationoamericanu.

Centros comerciales con aparcamientos reservaos pa muyeres embarazaes, ciudadanos con deficiencies o families numberoses nun ye novedá. Pero agora nel centru comercial 8ª Avenida de Sâo Joâo da Madeira (Portugal) atoparon un nuevu coleutivu que nun pue desendolcar la so vida con total normalidá y por ello decidieron poner aparcamientos reservaos especialmente pa... ¡¡¡les muyeres!!!. Cuatro llugares pa dexar el coche nel parque interior destinaos pal sexu femenín nuna superficie que cuenta con 1.400 aparcamientos. Amás los espacios tan asitiaos al llau de los llocales comerciales, son más grandes y tan pintaos de collor rosa, too mui guapín.

El centru comercial yá fora oxetu de polémica y alderique na ciudá polos baños masculinos onde había una parede de cristal per detrás de los urinarios y onde s´atopaben maniquíes femeninos vestíos con ropes y poses sensuales.

¿A les muyeres que trabayen nel centru obligaran-yos a dir con bikini o direutamente con burka?

Según diz Mercedes Cabrera, Ministra d´Educación, los alumnos catalanes nun dominen bien la llingua española al finar colos sos estudios de Bachilleratu, debío a ello va tener que dase una hora más de castellán nes aules de tolos colexos de Catalunya. Pero les caberes notes de la PAU nun dicen lo mesmo, asina la media d´esti añu na PAU en “Lengua castellana y literatura” ye de 6,30 demientres qu´en “Llengua catalana i literatura” foi del 5,59.

¿Nun dicien que´l sistema educativu d´inmersión llingüística en catalán quier acabar col castellán?.

L´Asamblea de la República de Portugal ta acabantes d´aprobar un nuevu Estatutu del Periodista que recurtia muncho los drechos d´esta profesión nel país lusu. El testu baltia con un de los pegoyos de les sociedaes democrátiques y un puntu básicu de la llibertá de prensa: mantener en secretu la identidá d´una fonte que revela una noticia énte les presiones del poder. A partires d´agora si hai una investigación xudicial en marcha los informadores tendrán que revelar les sos fuentes. El nuevu Estatutu tamién da-y permisu a los editores pa camudar los testos de los periodistes ensin el so consentimientu.

El testu foi aprobáu´l mesmu día nel se cumplien cinco años dende la detención del periodista Manso Preto, quien refugó revelar una fonte confidencial nun xuiciu nel que yera testigu. Pal Sindicato de Jornalistas de Portugal danse les condiciones p´acabar los puntos de vista y análisis que, nes democracies, posibiliten l´enriquecimientu de la opinión pública.

Esta selmana por mor d´un estudiu de National Geographic más de la metá de tolos periódicos del mundu espublizaban la noticia de que más de 7.000 llingües del mundo corríen peligru de desaniciase y que´l 80 % de la población del mundu fala 83 llingües mientres qu´hai otres 300.000 que namás son falaes pol 0,2 % de la población mundial. Ente otres coses l´estudiu dicía qu´había que recuperales al traviés de gramátiques y diccionarios pa tremiti-yles a les xeneraciones más nueves y qu´esto yera un trabayu de los llingüístes, qu´al perder cualesquier lingua´l mundu pierde sabiduría, que la metá de les llingües del mundu nun tienen lliteratura escrita o qu´a pesiar de que quede un falante esa llingua ta viva tovía y pue recuperase. Una voz d´alarma que saltó a los medios de mediu mundu, podéis facer la prueba y poner nel google “7.000 lenguas mundo peligro desaparecer” y ver la bayura de periódicos n´español de tol mundu que falen del tema.

Paez que tien que venir National Geographic pa dicir daqué que dende Asturies llevamos glayando dende fai 30 años anque dende los medios de comunicación sovencionaos pol poder siempre quixeren facer ver como que son vindicaciones minoritaries y que la perdida de la nuesa llingua nun tien muncha importancia, daqué ensin igua dientro de la modernidá. Pos paez que pa los medios de comunicación asturianos lo de protexer les llingües y potenciales enxamás va ser noticia a pesiar de lo que diga la mesma National Geographic, premiu Principe d´Asturies y anguaño con una esposición de portaes de la so revista en Xixón, DENGÚN mediu asturianu dixo un res sobre´l tema. Tolos periódicos del mundu falando del estudiu y n´Asturies con una llingua en peligru pero tovía con posibilidaes de futuru nada.

La prensa ye llibre, nun hai manipulación.

El parlamentu de Flandes refugó la propuesta del partíu independestista Vlaams Belang, prósimu a la estrema-drecha , pa cellebrar un referendum sobre l´autodetermín. Anque esti partíu ye mayoritariu nel parlamentu ta aislláu polos sos posicionamientos a vegaes cualificaos de xenófobos, amás esta propuesta tenía un nidiu envís d´abrir nueves griesques ente los partidos flamencos y valones que dende fai trés meses nun son a algamar un pautu pa formar gobiernu en Bélxica. A pesiar de too´l parlamentu flamencu alcordó esixir más competencies y medrar nel autogobiernu.

Anque la prensa del Estáu tiennos avezaos a lo contrariu nun too son afalagos a la familia real na prensa internacional. Na edición d´ayeri del prestixosu diariu británicu “The Times” espublizaron un artículu sobre los escándalos de la familia real española. Col titular de “la reina cuéstanos más pero polo menos nós sabemos en que lo gasta” el periódicu británicu entama l´artículu nel que´l secuestru de “El Jueves” ye una de les coses más criticaes. Según “The Times” el procesamientu de los dibuxantes volvióse escontra los reis y asitiolos nel debate públicu.

“Foi tratáu como un ídolu demientres 30 años, navegando en yates de lluxu, montando motocicletes y gozando d´un tratamientu reverencial col que la reina Isabel II namás puede suañar. A pesiar de too, hai síntomes de que´l rei Xuan Carlos d´España cuerri´l peligru de perder el favor de los sos súbditos”. La caza d´un osu enfiláu y la opacidá de les cuentes de la Casa Real son dalgunos de los exemplos p´afitar la cayida de popularidá de la monarquía española. El diariu llega a dexar nidiu que Xuan Carlos “foi coronáu siguiendo les ordes del xeneral Franco”.

Artículu orixinal de The Times