el trAsgU d´aRecEs

Dellos militantes nacionalistes corsos asoleyaron dende prisión y de xeitu anónimu una carta onde criticaben la llucha armada que desendolquen dalgunos grupos na islla, amás de refugar la violencia. Según el diariu parisín Le Monde estes cartes tán escrites por un presu encarceláu por atentaos. Too paez indicar que l´autor de les cartes anónimes ye Antoine Marchini, xefe del Frontu di Liberazioni Naziunali di a Corsica y qu´enantes de ser xulgáu na Audiencia Nacional de París por ser autor de ventiún atentaos refugo la violencia “ensin querer ser oportunista”.

El frañimientu del bloque Unione Nazionale, del que yá falaramos equí, tamién foi criticáu pol garapiellu de presos nacionalistes corsos que lu consideren un pasu atrás. Amás, presos políticos hestóricos como Félix Marcellesi, másima figura de Corsica Nazione Independente nel sur de la islla, decidieron dimitir del Cumitatu Contr’à a Ripressione, asociación que sofita los nacionalistes corsos encarcelaos.

Portal de la llucha de lliberación nacional corsa

Gracies al llabor de la Unión de Llibertaes Civiles d´America y un matrimoniu que foi arrestáu nel 2004 por dir nun actu públicu de Bush con camisetes onde se lleía “El cambeu de réxime entama na casa” dióse a conocer a la opinión pública´l manual pa los actos públicos del presidente, un testu onde s´esplicita como actuar nel casu de protestes contra George Bush.

Pa entamar el manual diz qu´hai que designar a los manifestantes contrarios a Bush nun area nun visible dende l´escenariu o dende´l pasu de la comitiva presidencial, nel so llugar habrá qu´asitiar xente con cartelos onde se sofite al presidente norteamericanu y si ye posible a la veriquina de les cámares de televisión. Si ye necesariu mozos republicanos usaran les sos pancartes como escudos pa bloquiar a los contrarios a Bush. Si nun fora abondo y los opositores entamaran a glayar ye perimportante qu´un “equipu d´intervención rapida” glaye al altu la lleva “¡USA, USA,USA!”, pa dexar silentes a los manifestantes.

P.D; ¿Tomará Tinín exemplu p´actuar contra la Pita y los sos pitinos?. Dalgún día esa sonrisuca falsa nun-y va dar resultáu.

El primer ministru escocés, Alex Salmond (del partíu nacionalista SNP), presentó ayeri´l plan que fizo´l gobiernu d´esta nación celta p´algamar la independencia del país, el plan finaría con una consulta popular enantes de 2010. L´informe nomáu “Decidimos el futuru d´Escocia; responsabilidá ya independencia nel mundu d´anguaño” tien 60 páxines y presentóse, amás d´en inglés, en delles llingües foriates usaes nel país por comunidaes d´emigrantes pa implicar a tola sociedá escocesa, anque curiosamente los nacionalistes nun faen usu del gaélico-escocés. El gobiernu va empobinar una campaña col nome d´ “Entama´l diálogu nacional”, pa dar a conocer el plan y abrir el debate, esta campaña va tener una importante presencia na rede y el propiu Salmond abrió un blog pa que toles persones puean dexa-y entrugues.

La propuesta de diálogu nacional tien trés víes; continuar col status constitucional ensin cambeos, aumentar les competencies d´Escocia y la cabera que ye entamar col procesu pa qu´Escocia seya un estáu dafechu soberanu. Yá se sabe hasta la entruga que va facese nel hipotéticu referendum, onde los escoceses tendrán que dicir si tán d´alcuerdu o en desalcuerdu con que´l “gobiernu escoces negocie un alcuerdu col gobiernu del Reinu Xunío pa qu´Escocia conviértase nún estáu independiente”.

Nes pasaes elleiciones al parllamentu´l SNP superó por primera vez al Partíu Llaborista, anque namás por un escañu lo qu´obligó a un pautu colos Verdes. Nos primeros cien díes de gobiernu los escoceses amosaron el so sofitu al gobiernu nacionalista, asina según una encuesta del Daily Mail SNP pasó del 33% de los votos nes elleiciones a un 48% de sofitu social según el diariu. Na mesma encuesta dizse que´l 31% de la población votaría a favor de la dixebra. Los partíos británicos, llaboristes, lliberales y conservadores, yá entamaron tamién a facer campaña contra la independencia.

El pasáu 5 d´agostu coincidiendo cola cellebración del Ghjurnate Internaziunale de Corti (atopada añal del nacionalismu corsu) el principal partíu nacionalista del país, Corsica Nazione Indipendente (CNI), dio nuncia de la creación d´un bloque independentista xunto coles otres fuercies del país cola que comparten ideoloxía. El bloque independentista quier ser una base de negociación col Estáu francés y cuenta col sofitu de la organización illegal FLNC-UC. Un de los principales escayos p´algamar la unión independentista foron les estremaes opiniones sobre la llucha armada. El CNI sofita la llucha armada y esto fizo que los autonomistes del PNC y d´A Chjama Naziunales nun acudieren al actu, colo que l´anterior xuntura ente autonomistes y nacionalistes n´ Unita-Naziunale quedo desaniciada.

Nes xornaes añales de Corti tamién presentaron una propuesta roblada por partíos nacionalistes ya autonómistes de toa Europa que va ser presentada en setiembre en Bruselas y que pa pidíi a la Eurocámara´l reconocimientu de les naciones históriques ensin Estáu.

Larisa Arap ye una periodista rusa contraria al réxime de Vladimir Putin qu´escribió un artículu onde denunciaba´l tratu vexatoriu que se-yos da a los enfermos nel centru psiquiátricu de Múrmansk, a 1.500 quilómetros de Moscu. Poro´l presidente rusu encerrola a la fuercia n´esi centru. L´Asociación Mundial de Periódistes y el Foru Mundial d´Editores refugaron la midida y esixeron la so inmediata puesta en llibertá, amás d afitar que la detención ye asemeyada a los abusos de la domina soviética onde s´emplegaben hospitales psiquiátricos p´aisllar y castigar a los presos políticos, al empar que se-yos facía pasar por llocos pa desacreditalos.

Seis activistes estranxeros (Canadá, Reinu Xunío y EEXX) foron deteníos esti martes na Gran Muralla China tres escolingar una pancarta col llema One World, One Dream, Free Tíbet 2008 (Un mundu, un suañu, llibertá pal Tibet 2008) que fai alusión a la fras de los Xuegos Ollímpicos de Pequín; One World, One Dream. Amás de pidir la llibertá pal Tíbet los manifestantes acusaron al COI de permitir la vulneración de los drechos humanos en China, un país onde esiste la pena de muerte, los periodistes son represariaos y onde son munchos los activistes qu´anguaño s´atopen baxo secuestru domiciliariu. A pesiar de too´l COI escoyó Pequín pa cellebrar los XXOO que van entamar el 8 d´agostu del añu viniente.

El fin de selmana pasáu´l direutor de la revista marroquiana “Tel Quel” foi interrogáu na so casa pola espublización d´un artículu onde se facía risión de la utilidá de les elleiciones parlamentaries en Marruecos, un país onde´l poder cimeru ta nes manes de la monarquía. Estos fechos prodúcense unos díes dempués de que´l rei Mohamed VI afalara al avance democráticu nel país y a poques selmanes de los comicios elleutorales del 7 de setiembre.

¿Nun sé de qué me suenen actitues como esta?... menos mal que tamos nel primer mundu, na Europa democrática.

L´acabantes de nomar nuevu direutor de la Corporación Aragonesa de Radio y Televisión, Ramón Tejedor, dio nuncia nuna entrevista que ye provatible qu´enantes de que fine esta llexislatura pue entamar a emitir Aragón 2, el segundu canal de la corporación. Esti canal va tener unos conteníos sobremanera culturales y lu que ye más importantes: va tener programes n´aragonés y en catalán d´Aragón, inesistentes tovía nel únicu canal de televisión col que cuenta anguaño la corporación: Aragón Televisión. Esto pue suponer un importante reblincu pa la normalización social d´esta llingua que se mantien nel Altu Aragón con un porcentax perpequeño de falantes, unos 10.000.

Anguaño la presencia de la llingua aragonesa na televisión llíndase namás a les televisiones locales. Per un llau na televisión local d´Andorra (Teruel) emítese´l caberu miércoles de ca mes “Chino chano” dende avientu de 1997, esti programa ta centráu na cultura, hestoria y tradiciones d´esta fastera. Demientres en Canal Bajo Aragón emítese “Mosicaire”, un programa dedicáu a tolos estilos musicales que se faen anguaño n´aragonés y que pue vese tolos miercoles a les 20 hores. Tamién ye reseñable la esistencia de Charrando TV, un proyeutu al traviés de la rede que podríamos nomar como una especie de YouTube en llingua aragonesa.

Los Franco tán faciendo tolo posible pa que´l Pazo de Meirás, un palaciu en Sada (A Coruña) usáu por Pachu demientres 36 años como residencia braniega, nun seya declaráu Bien d´Interés Cultural. Dende fai más d´un añu la Conseyería de Cultura de la Xunta ta intentando que-yos permitan visitar el palaciu pa que los téunicos puan ver l´estáu del edificiu, pero la familia tovía nun afitó un día pa la visita. Esta declaración supón que´l palaciu tendría que tar abiertu a los ciudadanos a lo menos cuatro díes al mes y qu´en casu de venta, daqué provatible yá que los Franco yá nun faen usu del inmueble, la Xunta de Galiza tendría drechos sobre elli.

Esti palaciu fora “donáu” pol pueblu d´A Coruña a Franco en 1939 cundo´l gobernador civil de la provincia, Julio Muñoz, formara la Junta Provincial Pro Pazo del Caudillo y dempués de ser mercáu pol banqueru Pedro Barrié de la Maza. Esti banqueru, presidente del Banco Pastor, fundador de FENOSA y ún de los principales financieros del bandu nacional, encargóse de duplicar les lliendes del palaciu colos praos de los vecinos de l´aldea de Meirás y de facer reformes nel inmueble gracies a les perres de les “soscripciones populares”, onde les autoridaes esplicitaben la cantidá de perres que los ciudadanos teníen de pagar “de xeitu voluntariu”. Tamién foron munchos los descuentos obligatorios d´un día de sueldu na nomina de funcionarios y emplegaos d´empresarios franquistes que valieron pa que´l dictador y la so familia puean gociar d´esti inmueble tovía güei dempués de 30 años de democracia made in Spain.

Pel momentu naide fala d´espropiar (lo que sí se fai a muncha xente que nun s´apellida Franco) y tovía más preocupante ye que la Xunta quixera mercar el palaciu pa dái un usu públicu al inmueble. ¿Tendría dalgún xacíu pagar a esa familia por una propiedá llevantada coles perres de la ciudadanía?.

Mokarrameh Ebrahime ye una muyer que lleva 11 años nuna prisión d´Irán. La so llapidación pue ser inminente si´l presidente de la Maxistratura, l´Ayatolá Hashemi Shahroudi, nun fai nada por ella. Mokarrameh Ebrahime foi declarada culpable d´adulteriu xunto con Ja´far Kiani, quien foi llapidáu hasta morrer fai unos díes na provincia iraniana de Qazvin.

El Códigu Penal iranianu diz que la pena por adulteriu ye la execución por llapidación y ye mui claro col xeitu de facer la execución y el tipu de piedres que deben d´utilizase. L´artículu 102 dispón que pa la llapidación los homes tienen que ser enterraos hasta la cintura y les muyeres hasta´l pechu. L´artículu 104 esplicita, en rellación cola pena por adulteriu, que deben d´utilizase piedres «nun tan grandes como pa matar a la persona d´ún o dos golpes nin tan pequeñes como pa nun poder considerales piedres». La muerte por llapidación viola los artículos 6 (drechu a la vida) y 7 (prohibición de la tortura y los tratos o penes crueles, inhumanos o degradantes) del «Pautu Internacional de Drechos Civiles y Políticos».

Tu pues echar el to pequeño gabitu pa finar con esto, robla equí.