el trAsgU d´aRecEs

L´Imagine de John Lennon cantáu n´inglés, hebréu y árabe pola israeliana Noa y l´arxelín Khaled.

Fai como añu y mediu que nun diba a un conciertu del meyor grupu del mundu mundial. ¡Qué ganes!.

Fai 34 años a les 00.20 el periodista y poeta Leite de Vasconcelos pinchaba nel so programa de Rádio Renascença esti cantar de José Afonso prohibíu en Portugal pola dictadura de Salazar. El "Grândola Vila Morena" yera la señal qu´esperaba l´exercitu pa entamar coles operaciones que diben dar llugar a la "Revoluçao dos Cravos", la cabera revolución romántica, la revolución más pacífica de la hestoria. Güei y siempre´l pueblu ye quien más ordena.

España siempre lo fai mal y pior n´Eurovisión. Mira que parecía qu´esti añu col rollu friki tovía podíen facer daqué, pero dempués de ver esti cantar que participó xunto´l Chiki-Chiki na preseleición nun soi a pescanciar como manden al de Buenafuente. Viendo la ganadora serbia y el segundu clasificáu del añu pasáu ye que nun s´entiende. Eurovisión tien muncha pluma, amás de ser mui friki, pero anque l´añu pasáu los serbios ganaron con un cantar rollu-bollu paez qu´hailos per eses tierres que nun pueden colos gais. Ehí ta la organización ultradrechista y relixosa Obraz que viendo que diben tomar el país tolos eurofans coles sos banderes del arcu la vieya punxeron el puñu enriba la mesa y dixeron ¡non! puen quitanos Kosovo pero 20.000 homosexuales (asina lo afitaba la prensa serbia) viendo´l festival en vivu ¡non!. Entós la organización facista entamó a amenazar a too dios –y nel so nome- en boca del so llider Damir Grbic (“nun vamos permitir que dos persones del mesmu sexu vayan de la mano pela cai”, “tolos qu´amuesen equí la so homosexualidá serán apaleaos”). Pel momentu yá consiguieron que se cancelara una cabalgata gai que diba percorrer les cais de la capital serbia los díes que se cellebre´l festival, la mesma organización foi la responsable d´unos sangrientos ataques contra la primer manifestación gai de la hestoria de Serbia nel 2001. Según paez de nun dir a la fin dengún gai a Belgrado esti añu podría cellebrase la primer gala d´Eurovisión ensin públicu.

Cuando la imitación supera l´orixinal...

¡¡¡Bailla Tini, Tini!!!

Yera una vegada la princesa d´un país que falaba en toles llingües d´España menos nuna; la del so país.

Dios salve a la Reina,
al so réximen facista.
Esti, convirtióte nun
subnormal,
una bomba d´hidróxenu en
potencia.

Dios salve a la Reina,
ella nun ye dengún ser humán,
nun hai futuru nel fantaseu
d´Inglaterra.

Que nun te digan que quies,
que nun te digan que necesites,
nun hai futuru,
dengún futuru,
déngun futuru pa ti.

Dios salve a la Reina,
decímoslu en seriu, home.
Amamos a la nuesa reina que
Dios salva.

Dios salve a la Reina,
porque los turistes son perres
y la nuesa figura decorativa nun
ye lu qu´ella paez.

Oh, Dios salve la hestoria,
Dios salve´l to allocáu desfile.
Oh, Dios tenga misericordia,
tolos crímenes páguense
y cuando nun hai futuru
¿cómo pue haber pecáu?

Somos les flores na
papelera,
somos el venenu na to
maquinaria humana,
somos el futuru, el to futuru.

Dios salve a la Reina
decímoslu en seriu, home.
Nun hai futuru nel fantaseu
d´Inglaterra.

Dengún futuru pa ti
Dengún futuru pa min
Dengún futuru, dengún futuru pa ti

Llacediosa ye la situación de la llectura n´asturiana si atendemos pa los datos qu´ufierta la Conseyería de Cultura nel últimu númberu de 2007 de la revista “Biblioasturias”. Asina, mientres que los diez primeros llibros más lleídos en castellán nes biblioteques del país asítiense ente les 106 (“Líbranos del bien” de Donna Leon) y les 66 llectures (“El corazón helado” d´Almudena Grandes), nel casu de lliteratura n´asturianu los préstamos tán ente los 14 y los 5.

1. Imago/ Dolfo Camilo Díaz. KRK, 2007. 14
2. El pisu d´enriba/ Xulio Arbesú. KRK, 2007. 11
3. Potestas/ Xulio Arbesú. VTP, 2003. 8
4. En busca de Xovellanos/ Ismael García Arias. Trabe, 2006. 7
5. Cuentos chinos/ José Luis Rendueles. Trabe, 2001. 6
6. Ente semeyances/ Pablo Rodríguez Medina. Trabe, 2001. 6
7. Los falapios del xigante/ Miguel Solís Santos. Editora del Norte, 2005. 6
8. Catedral/ Pablo Texón. Ámbitu, 2006. 5
9. Onde pisen poques güelles/ Cristina Muñiz Martín. Trabe, 2006. 5
10. Los araxales de la vida/ Xulio Viejo. Trabe, 2001. 5

Fai falta visibilizar la lliteratura de nueso nes biblioteques y dignificala (la seición “Asturias”, mecigaya onde entren gastronomía, rutes, les actes de la “I Asamblea Regional del Bable” y l´últimu de Xuan Bello). La Conseyería tien muncho que dicir en cuantes a promoción y difusión –nun ye too sovenciones pa espublizar y ta llueu- y ye nidiu que la lliteratura que s´escribi n´asturianu precisa güei d´un fuerte impulsu de les alministraciones, si dicen qu´anguaño lleese poco si miramos les cifres del consumu editorial n´asturianu los datos son dafechu una llacedia. Sicasí esto nun pasa cola música, nun hai un compromisu de l´alministración y de los medios públicos pero los datos de préstamu son perbonos cuntando cola poca promoción d´estos productos. Asina mientres los diez discos más escuchaos en castellán tan ente los 51 (“Limón y sal” de Julieta Venegas) y los 37 (“Cinema do mar” de Carlos Núñez) los qu´utilicen l´asturianu como mediu d´espresión asítiense ente los 80 y los 25.

1. Música na maleta/ Tejedor. 80 (Sicasí esti discu ta tamién na seición n´español nel númberu 9 con 37 préstamos ¿¿??)
2. N´acción/ Dixebra. 61
3. Palabres de muyer/ Joaquín Pixán. 40
4. Ensin novedá/ Dixebra. 38
5. Revolución celta/ Fardaxu. 31
6. Güeria/ La col.la propinde. 27
7. Un tiempu meyor/ Llan de Cubel. 26
8. Mineros/ Nuberu. 25
9. Torner/ Anabel Santiago, Ástura, Alberto Varillas. 25
10. L´otru llau de la mar/ Llan de Cubel. 25

LONDON CALLING

“London Calling” ye un cantar de los británicos The Clash espublizáu nel so segundu álbum, entituláu como esti tema. El títulu fai referencia a les emisiones del serviciu mundial de la BBC usáu demientres la 2ª Guerra Mundial, “This is London calling...”, que tresmitía pa los países ocupaos. Na lletra del tema, escrita por Joe Strummer y Mick Jones, el grupu de punk-rock fala sobre´l so esmolecimientu polos problemes ecolóxicos mundiales y la realidá de los “erros nucleares” tres l´incidente de Three Mile Island. Inclús hai una llinia onde falen sobre la posibilidá de que´l Ríu Támesis inundara´l centru de Londres ("London is drowning/And I live by the river"/ Londres ta inundándose/ y yo vivo xunto´l ríu). Tamién pue vese nel cantar un esmolecimientu pol futuru del punk-rock n´Inglaterra dempués del españíu de los 70 y los sos propios problemes como grupu (taben endeudaos y con griesques col so manager): "now don't look to us/All that phoney Beatlemania has bitten the dust" (Agora nun mos miréis a nós/ Tou esti engañu de la Beatlemanía mordió´l polvu).

Como curiosidá dicir qu´en 2006 un pasaxeru d´un vuelu que salía de Londres foi deteníu pola policía como presuntu terrorista tres que´l taxista que lu llevara´l aeropuertu denunciáralu por tar escuchando esti cantar.

ROCK THE CASBAH

“Rock the Casbah” ye un cantar espublizáu nun cenciellu xunto a “Long Time Jerk” en 1982, foi l´únicu tema de los británicos qu´entró nel Top 10 de los EEXX. La lletra del cantar fala d´un xeitu humorísticu sobre la prohibición del rock en Irán pol Ayatollah Khomeini y sobre l´imaxinariu llevantamientu del pueblu escontra esta midida. Na lletra cuéntase como´l rei ordena al exercitu atacar colos sos jet-caza al que nun cumpla cola norma, pero los pilotos nun faen casu a la orden y escuchen rock nes sos radios. Nel vidiu del cantar tamién pue vese una llamada pola meyora de les relaciones ente árabes ya israelís, nelli podemos ver un xudiu y un árabe baillando ska.

Equí hai delles curiosidaes: El tema convirtióse nun himnu del exercitu estaoxunidense demientres la primera Guerra del Golfu (polo de “drop your bombs between the minarets”, tirái les vueses bombes sobre los minaretes) y foi´l primer cantar que sonó na radio de les Fuercies Armaes al entamar el conflictu, lo que cafió a esgaya a tolos siguidores de The Clash, grupu que siempre s´amosó contrariu a les guerres y l´imperialismu estaoxunidense.

Amás esti cantar foi una de les “peligroses” composiciones musicales prohibíes tres los atentaos del 11 de setiembre. Y como gran novedá dicir que dende fai poco hai una versión asturiana gracies al proyeutu “Soncai System” qu´inclúi como pieslle al so primer trabayu, “Clashasturies”, una versión d´esti cantar baxo´l títulu de “Rock na Casbah”.

Si Marcos del Torniello llevantara la cabeza...

Skama la Rede - Conciertu despidida de Josín

Añadir a mi perfil | Más Videos

...quitaba´l sombreru y entamaba baillar ska.

¿Quién nun s´alcuerda del míticu "Telepasión" de TVE?

Ca nuechevieya dandomos la murga cola Obregón, el Ramontxu, la Igartiburu y el del parte cantando al so xeitu los machacones ésitos musicales del añu. Por "suerte" llego´l PSOE y amás de despidir a milenta trabayadores y baltiar colos Centros Territoriales llimpiaron un poco la parriella de la pública estatal, nun muncho que tovía podemos ver les machistes y ultracatóliques telenoveles mexicanes y les faches películes de la Carmen Sevilla, y fai años que nun mos dan la cantinela col Telepasión. Pues agora la TPA recuperó´l formatu pa la gala final del concursu músical "Yes un artista" (nun vos emocioneis que namás que yera´l títulu n´asturianu) qu´emitió´l pasáu día d´añu mozu y ente concursante y concursante pudimos ver a dalgunos de los presentadores de la cadena vesionando cantares -en castellán- perconocíos por toos, ente ellos tamién tuvieron les cares de "Al Aldu" cantando "Na Caleya" de La Bandina. Pa min el videu más curráu y más gayoleru de tolos qu´emitieron, amás un nidiu homenax al vidiu de The Beatles de "Don´t let me down".