el trAsgU d´aRecEs

¡¡¡Ablucáu!!!. ¡¡¡El mio grupu favoritu nel Eurovisión de les llingües minoritaries!!!. Queden 137 díes, la TPA yá pue dir faciendo güecu na parrilla pa emitilo´l 18 d´ochobre col másimu auto-bombu o quito l´asturiana de toles teles de la mio casa. Esti ye´l videuclip del gallegu Naft col cantar que quedó segundu na edición del añu pasáu y equí l´actuación del ganador de 2004, el lapón Niko (atención al vestuariu, ¿cómo va dir Xune p´amosar la nuesa moda n´Europa?).
__________________________________________________

Dixebra, seleccionada pa participar nel Liet-Lavlut

Dixebra, el grupu con más pegada nel panorama del rock and roll asturianu, ta acabante ser seleccionáu pa participar nel prestixosu Liet-Lavtut, un festival de la canción llingües minoritaries entamáu pola Liet Foundation que se va celebrar en en Luleå (Laponia sueco) el 18 d'ochobre y que cuenta col apoyu de dellos organismos públicos de calter internacional como'l Conseyu d'Europa.

La edición d'esti añu, a la que van asistir los componentes de Dixebra, va ser en Luleå, un llugar de la Laponia sueco. La organización del festival cuerre a cargu de Sweblul, asociación que representa a les cinco minoríes llingüístiques sueques, col patrimoniu de mui bien delles entidaes públiques del país escandinavu y del departamentu suecu del Buró Européu de les Llingües Minoritaries. La selección de los participantes faila un comité especializáu y el ganador final escuéyelu un xuráu formáu por representantes de distintes llingües minoritaries, existiendo tamién un premiu otorgáu por votación popular.

Como datu de la repercusión mediática hai que dicir que l'añu pasáu la Gala Final foi retresmitida por mui bien delles televisiones autonómiques (Escocia, Euskadi, Frisia, Cataluña...), asina como la divulgación de la canción ganadora (y por extensión del fechu llingüísticu de la so zona orixinaria) ente les diverses comunidaes llingüístiques europees.

Dixebra fúndase en 1987 n'Avilés y dende aquella vien trabayando polo mesmo: llograr afitar un verdaderu rock asturianu, Dende l'empiezu los sos componentes tienen como oxetivu facer una música comprometida con Asturies, asina lo demuestren nes lletres de los sos cantares y nes actitúes personales. Nos sos textos reflexen como naide la variada y complexa realidá de la sociedá as¬turiana, inspirándose en socedíos o fechos de la historia recién del país, abondando nos sos mensaxes referencies constantes a la vida política, cultural o llaboral d'Asturies, pero al empar ensin escaecer el compromisu internacionalista y solidariu. Otra de les principales señes d'identidá de Dixebra ye l'empléu ezclusivu de la llingua asturiana, siendo esti ún de los facto¬res que-y da más carácter; cuntando amás como collaboradores nes lletres con renomaos escritores de la lliteratura asturiana como Boni Pérez, Pablo A. Marín Estrada y sobremanera Xandru Fernández. Nel so últimu discu incorpórase un nuevu lletrista: Quique Faes. La tercer premisa que define a esta banda ye la incorporación na so instrumentación de la gaita y la inclusión de melodíes tradiciona¬les na so música, too ello endolcáu nun rock potente con múltiples influyencies: ska, punk, folk, reggae, rap... L'estilu de Dixebra caracterízase por un soníu fuerte, con un ampliu mestizaxe musical, influenciáu pola música tradicional y con textos comprometíos en llingua asturiana.

lesnoticies.com

Dempués de descubrir esa xoya que ye´l pop n´hebréu, ún entama a camentar na importancia de la música d´usar y tirar y el so espardimientu na televisión como pegoyu pal desensolcu de la identidá coleutiva d´un pueblu. Esos cantares machacones que nun te faen pensar y que bailles tolos sábados como´l que más dempués de cuatro sidres, tamién tienen el so valir na normalización social d´un idioma. La nuesa música algamó cumales inimaxinables fai décades, pero tovía nun tenemos música curcia-pop n´asturianu, lo más asemeyáu quiciabes ye´l “Na Caleya” de La Bandina (por tar compuestu cola finalidá de folixar y nun pensar, nun por que´l cantar seya malu). En tol Estáu, la única comunidá llingüística (sacantes la castellana, nidiu ta) que tien la posibilidá d´atopar música comercial nel so idioma ye la catalana, inclús munchos cantantes catalanes n´español suelen sacar singles de los sos “hits” na llingua de Ramón Llul. En Galiza tampoco hai pop en gallegu y la música comercial portuguesa tien el mesmu pesu nel país vecín qu´en Murcia. Pero a pesiar de too la TVG fai una apuesta pola “comerciabilidá popera” de la música gallega. Asina, nun ye raru ver nel “Luar” (programa músical qu´amesta gaites gallegues, copla andaluza y trunfinos y que lleva emitiéndose con ésitu tolos vienres dende fai una década) a cantantes españoles versionando temes tradicionales gallegos, a orquestes faciendo lo propiu a ritmu de merengue o cantando en gallegu temes pop perconocíos en castellán. Tamién la TVG tien el so propiu “OT”, pero mui estremáu del de Tele 5: en “Son de Estrelas” ca participante representa a una comarca gallega, nun hai academia y nos videos de presentación de los cantantes, lloñe del “glamour” de “OT”, mos amuesen la so vida nuna aldea gallega ente les vaques que cuiden tolos díes. La TPA tien de tomar exemplu, l´asturianu ye una llingua tan digna como cualesquiera pa cantar babayaes a ritmu de chumba-chumba, ¡quiero perrear n´asturianu!.

La ganadora del concursu “Son de Estrelas”, Belén Morís, interpretando con una compañera “Cantiga de Berce”, composición de “Fuxan os ventos” prohibida na dictadura.

La cantante Marta Sánchez interpretando “Quen poidera namorala” del escritor gallegu Celso Emilio Ferreiro.

Una orquesta gallega cantando en “Luar” un popurri de testos de Rosalía de Castro a ritmu de merengue.

La cantante Ugía Pedreira interpretando “Teño Saudade” nuna gala homenaxe al desaparecíu Andrés do Barro, interprete de canción melódica en gallegu na dictadura.

¿El Chiki-Chiki la primer frikada hispana n´Eurovisión?

La participación d´España n´Eurovisión pue ser dientro poco daqué de lo que falar siempre en pasáu. Y nun ye culpa de Buenafuente nin de los eurofans-anes botelles que ven el Chiki-Chiki como una ofensa a esi gran festival “musical” que ye Eurovisión. Ye que l´UER va reunise d´equí a poco n´Atenes p´analizar les prósimes reformes del festival y el direutor d´Eurovisión, el suecu Svante Stockselius, díxo-y a la prensa inglesa que por mor del gran númberu de patrocinadores del concursu les televisiones d´España, Francia, Alemania y Reinu Xuníu podríen perder el privilexu de pasar a la final d´Eurovisión gracies a la so aportación económica. La que se pue montar...

A TVE nun-y importa ganar Eurovisión, pero si la so audiencia: p´atopar un programa más vistu que la edición d´esti añu (23 programa más vistu de la hestoria d´España) hai que remontase al 2002: l´Eurovisión nel que participó Rosa. Por eso, pola audiencia, TVE lleva una montonera d´años pagando 50 millones de les antigües pesetes pa mantener un festival nel qu´añu tres añu España ye humillada. El problema ta en que si España tien que pasar pola semi-final (TVE namás qu´emitió una de les dos semi-finales y pela 2) ye más que probable que nun consiga enxamás llegar a la gala del sábadu (a nun ser que se lo tomen en seriu como faen los países del Esti), ¿y va tar el 60% de l´audiencia pendiente d´unes votaciones nes que´l so estáu nun participa?, ¿TVE y la mesmísima BBC lo van permitir?, ¿van participar nun festival nel que siempre queden nos caberos puestos y que por riba la so emisión, un sábadu en prime-time, va quita-yos puntos de share?.

Ésta pue ser la cabera humillación de los pequeños países europeos n´Eurovisión: nun fundaron imperios, nun estendieron les sos llingües nin les sos relixones pel mundu, nun tuvieron monarquíes cuyes historíes s´estudien nes universidaes, nun organizaron xuegos olímpicos, nun tuvieron colonies, nun esclavizaron a otres races, nun son centros de poder políticu mundial... Pero nun importa: los países del Esti tienen Eurovisión, ca vegada ye más de so.

P.D: Lo meyor que facía TVE yera retirase que yá sabemos que los países del Esti se voten ente si y bla, bla, bla... qu´España se retire d´una puta vez, que TVE dexe entrar a les televisiones de la FORTA na UER y que la TPA mande a Anabel Santiago pa Moscú (anque conociéndolos son capaces de mandar a daqué asemeyáu a lo de Remedios Amaya).

Toi a díes d´entamar colos esamenes y apurando colos caberos trabayos que siempre dexo pa última hora, por mor d´ello nun tengo tiempu pa nada y menos p´actualizar el blogue. Pero nun pueo dexar de poner estos vidios que topé faciendo´l friki pela rede.

¿Qué pasa si amestamos los sones poperos y discotequeros (cutres) d´occidente con sones más tradicionales d´Oriente Prósimu?. Pues un exemplu son estos cantantes israelinos, Dana International y Idan Yaniv. Lo meyor la estetica de los vidios y les alusiones a la so realidá socio-cultural (atención en "Love Boy" a la estrellina de David nel pescuezu d´ún de los maromos y el kibá d´otru)

INDIAN MOVIE (Dana International ya Idan Yaniv)

LOVE BOY (Dana International)

GALGAL ANOK (Idan Yaniv)

EIRE (non clasificáu)

Si´l gran pavu Dustin nun algamó pasar a la final del sábadu con esti homenax a Eurovisión, y col escenariu enllenu de pluma, el Chikilicuatre ta perdíu.

BOSNIA-HERZEGOBINA

A pesiar de qu´Uribarri dexo polos suelos esti cantar (viva la imparcialidá periodística) que fala de monos xintando platanos, a la fin clasificóse pa la final. H.odete Uribarri.

ESTONIA (non clasificáu)

Un gran homenax a esi míticu grupu de la nuesa infancia que foi Parchís.

AZERBAIJAN

¿Posible ganador?, depende de la suerte que cuerran les pastelaes de Grecia y Suecia

Pa que naide m´acuse d´antisemita almitó que´l cantar que más me presta d´esti añu d´Eurovisión ye´l que representa a Israel. Porque sí collacios, Israel participa dende 1973 nel festival européu y, amás, ye ún de los países pasa per Eurovisión arramplando con too. Dende´l míticu "A Ba Ni Bi" de 1978, el finxu hestóricu algamáu en 1998 cuando Dana Internacional, una muyer transexual (non el transexual, como diz l´homófobu y misóxinu d´Uribarri), ganó´l festival llevándolu a Xerusalém, fuera de les lleendes europees, o la polémica del añu pasáu col cantar "Push the Button" que criticaba´l programa nuclear iranianu y según les males llingües dalguna vegada camudaba´l "push" pol Bush. Y ye qu´Israel tien merecíu la so participación nel festival musical europeu, sinón enxamás veríamos actuaciones como esta del 2000. Una xoya, eses voces, esos saltinos, esi baille, esi piquín de los cantantes y lo meyor, la versión hebrea de la Fresina que sal cantando con esos güeyinos que paez qu´enantes de salir a actuar fumóse tolos praos d´Afganistan. Y pa finar l´actuación saquen les banderes d´Israel y Siria y piden paz, be happy collacios.

Imaxenes de la policia marroquina cargando contra la población nuna manifestación pol 34 cabudañu del Frente Polisario.

Nel 2004 Marta Roure fizo sonar por primer vez el catalán en toles televisiones del vieyu continente col cantar "Jugarem A Estimar-Nos"

Güei ye la primer semifinal d´Eurovisión y dende qu´en 2004 entamara la participación andorrana va ser la primer vez que nun s´oya´l catalán nel festival. Tamién fai cuatro años la organización d´Eurovisión decidió, por mor del númberu de países que pidiera participar, xebrar el concursu musical en dos ediciones (semifinal y final). Nun intentu deseperáu por algamar clasificase pa la final esti añu´l país de los Pirineos dexa pa prau la so llingua pa unviar a Serbia a la triunfina catalana Gisela con un cantar n´inglés.

Esti añu ye tan grande´l númberu de países que van participar que´l festival va xebrase por primer vez en trés gales, pero TVE namás que va emitir la semifinal de güei (21.00, La 2) y la final del sábadu (España paga más d´ocho millones d´euros polos drehos d´emisión y autoclasifícase pala final). Colo cual vamos quedar ensin ver les actuaciones de países como Portugal, Turquía o Suecia, según ellos porque nun quieren saturar, amosando nidiamente qu´a TVE nun-y importa un res Eurovisión y menos ganar (¿imaxináis les perres que cuesta montalo?). ¿Pue daquién saturase d´Eurovisión?, ¿qué serviviu públicu de mi madre ye ésti?. Lo que deveres-y importa a TVE ye sacar perres col Chiki-Chiki y que l´audiencia del sábadu te por riba de la de los otros canales. Por suerte tovía queden los "pequeños" países pa los cuales tovía Eurovisión ye una gran plataforma turística (quiciabes la única que tienen), un requexu abiertu al mundu p´amosar la so modernidá en trés minutos (tornáu a llinguax eurovisivu "facer l´hortera a más nun poder pa llamar l´atención")

L´Imagine de John Lennon cantáu n´inglés, hebréu y árabe pola israeliana Noa y l´arxelín Khaled.

Fai como añu y mediu que nun diba a un conciertu del meyor grupu del mundu mundial. ¡Qué ganes!.