el trAsgU d´aRecEs

Nun van almitise pareyes homosexuales na boda vaqueira d’Aristébanu (2006)

El Gobiernu concedió la Medaya d'Asturies de plata al Festival Vaqueiru y la Vaqueirada (2008)

¡¡¡SI ESTO ÍA SOCIALISMU, QUE VENGA L´ANARQUÍA!!!, ¡¡¡LA HOMOFOBIA TAMIÉN ÍA FACISMU!!!

Caún ta nel so drechu de falar o callar sobre les sos preferencies sexuales, seyas heteru o gai tas nel to drechu a callar sobre con quién te metes na cama o a glayalo a los cuatro vientos. Pero otra cosa ye la xente pública, xente con representación social que saliendo del armariu va ayudar a visibilizar y normalizar al coleutivu gai. Ye lo mesmo que cola llingua, caún que fale como quiera, pero los políticos mientres exercen el so cargu públicu tán obligaos (otra cosa ye que nun lo faigan) a usar l´asturianu pa sofitar la so normalización y face-y ver a la xente que ye una llingua tan de valir como cualesquier otra.

Poro, acabo d´ablucar dempués de lleer nel vieyu diariu del movimientu la griesca que tienen montada Pilar Varela, alcaldesa d´Avilés, y la popular Carmen Maniega. Resulta que la Maniega, faciendo honor al so apellíu, acusó públicamente en xineru de 2007 a Varela d´usar dineru públicu pa beneficiar una empresa que dirixe la supuesta moza de Varela. Les declaraciones seríen de lo más normal (y necesaries) si nun fora por que la Maniega ye pepera y tengo nidiu que ésta camentó qu´asina diba desprestixiala enantes de les eleiciones ya igual había xente que por ser llesbiana yá nun diba votala. Pero lo pior ye que Pilar Varela va y denúnciala por atentar contra´l so drechu al honor y ayeri declara nel xuzgáu qu´asociala con una muyer ye falta-y al honor. ¿Y si fora un home?, saldría la Maniega en rueda de prensa, sentiríase Pilarina cafiada...

P.D: ¿Y la probe moza de Varela que dirá de too esto si l´alcaldesa paez que s´avergüenza d´ella?

"El perfil del infectáu por VIH n´España ye´l d´una persona homosexual que mantíen relaciones sexuales ensin proteición"

Bernat Soria, ministru de Sanidá

CAUSES DE LES INFEICIONES DE VIH NEL ESTÁU ESPAÑOL EN 2007:

50% relaciones heterosexuales ensin proteición
30% relaciones gais ensin proteición
20% compartir xeringuilles

¡Qué coses!, cola que se montó cuando De la Vega se fizo una semeya con un polígamu y trés de les sos muyeres y agora reciben al herederu d´Arabía Saudina –país onde la poligamía ye llegal- con honores y nun pasa nada. Bono, yá cuando lo de la semeya dixeron dende´l PSOE que lo de la poligamia ye un fechu cultural. Qu´a ver qué pensaría un dirixente árabe si-y saquen una semeya con una matrimoniu gai ensin sabelu. Razón tienen, son diferencies culturales, anque quiciabes, camienta ún, que nel matrimoniu gai naide ye obligáu a casase, inclús siendo menor, nun hai dengún alcuerdu económicu y naide pierde dafechu la so llibertá como persona al comprometese.

Pues d´esti herederu saudín que tien cuatro muyeres, que tampoco son tantes que´l so tíu (que visitó España nel 2007) tien trenta, yo sé mui poco: namás que-y presta muncho decapitar a sodomites o a xente que prautica la bruxería. Pero esto nun debe cuntar pa les autoridaes, porque recibiéronlu con honores militares, l´exercitu español sometióse a la so revista conxunta y, por si acasu, namás había una muyer nel comité pa recibilu: la delegada del gobiernu de Madrid, Soledad Mestre.

¿A quién-y importen la dignidá de los seres humanos cuando Arabía Saudina (país visitáu polos Borbones en 2006) ye´l 33º cliente mundial d´España?. Yá lo dixo l´executivu de ZP, con esta visita afítase la “tradicional amistá” ente los dos países y asina esperen tratar nuevos temes que fruten “en más alcuerdos”.

El que s´atreve a enfrentar los drechos d´un coleutivu colos d´otru, como si por tener los transexuales drechos los asturfalantes tuvieren más motivos, o el que va y en llugar d´acusalu d´homófobu llámalu abertzale, como si la llingua y l´independentismu vascu tuvieren daqué que ver amosando que lo que de verdá-y importa nun ye l´insultu al coleutivu transexual sinón la "defensa" de la llingua y el so usu por parte d´un conceyal. ¿Cuál dixo una babayada más grande?, acéptanse votaciones.

Taba ún viendo ayeri a cachinos el programa de Tele 5 "Tú si que vales" porque diben participar un gaiteru y un tamboriteru d´Avilés. Tres varies hores faciendo zapping por fin aparecieron enriba l´escenariu los dos avilesinos col traxe´l país y too. Mui prestoso hasta que´l presentador entamó a falar de los dos participantes diciendo que nin ellos mesmos imaxinaben que diben llegar a la final (nun yeren Xuacu Amieva pero mal nun lu facíen) y pudo vese un videu d´una actuación anterior onde los miembros del xuráu antroxaos d´escoceses facíen lliteralmente´l gilipolles. Dempués foron a publicidá y cuando volvió entamar el programa los dos músicos asturianos fixeron la so actuación col xuráu del programa (el direutor de l´academia d´OT y el duu humorísticu "Los Morancos") de nuevu faciendo´l gilipolles, dos d´escoceses con saya y otru con una especie de traxe de tirolesa o daqué asina. Namás finar l´actuación el xuráu tien qu´espulsar a ún de los participantes d´esi bloque y que casualidá que foron los dos músicos asturianos. El xuráu tovía tien la cara de pidir perdón porque "igual" ellos tuvieron daqué que ver por participar n´actuación y cohacionar al públicu (nun participaron en denguna otra en tola gala).

Ablucáu viendo´l tratu que-y daben nuna televisión estatal a la nuesa cultura (un tema pa tomar a chancia) nun pueo más que solicitar a l´Asturies Lliberal que-y pida a Tele 5 la cancelación del programa. Porque si tien dalgún sentíu solicitar la cancelación de Terapia de Grupo, un programa d´ésitu fechu n´Asturies, onde trabayen asturianos y onde se fai usu, pa bien o pa mal, de la nuesa llingua, más razones hai con esti programa que fizo risión de la nuesa música, la nuesa identidá y la nuesa cultura n´horariu de másima audiencia y en direuto pa tol Estáu.

Si l´Asturies Lliberal nun diz un res sobre esti tema y en llugar de lluchar escontra los que tienen más fuercia y deveres "manquen" dedíquense a relacionar a sindicatos que trabayen pola llingua col Movimientu de Lliberación Nacional Vascu, usen un sensacionalismu descomanáu ca vegada qu´ún blogue n´asturianu diz que son unos facistes cuando dempués ellos llamen estalinistes o tienen la cara d´escusar l´usu eleutoralista de los drechos llingüísticos que fai´l PP nun inventáu maltratu de la Xunta pola haza esti partíu por denunciar lo qu´hai, entós ye que´l supuestu asturianismu popular namás tien la nidia función de criminalizar al movimientu de vindicación llingüística, amás de sirvir de llaváu de cara al traviés d´un supuestu victimismu -nun ye que nun temos pola oficialidá, sois vosotros que mos echáis-.

Naide pon en dulda que nel PP pue haber (poquísima) xente que ta pola llingua o qu´Humberto Gonzali trabaya pola oficialidá. Pero la posición oficial del partíu ye otra y cola so representación nel parlamentu´l PP ye decisivu p´algamar la oficialidá asina qu´ellí ye onde va vese (yá qu´anguaño nun ye lo mesmo lo que diz Arestegui que lo que diz l´Asturies lliberal) si´l PP ye un partíu que ta pola oficialidá o non, ellí ye onde va vese quién ta colos drechos humanos y quién ta escontra ellos, ellí ye onde va vese quién ye la victima y quién el verdugu.

P.D; Por ciertu, ¿qué tien que ver que los transexuales tengan drechos con que los asturfalantes nun los tengamos?, ¿ye qu´ellos nun los deberíen tener y nós sí?, ¿tenemos nós más drechos a tener drechos qu´ellos?, ¿menos?, siempre amestando peres con mazanes. Imaxináisvos un titular asina: "Si les muyeres/negros/inmigrantes tienen drechos los asturfalantes merecemos lo mesmo".

Mal va una sociedá que se diz desendolcada ya igualitaria cuando una muyer, per primer vez na hestoria, garra la cartera del Ministeriu de Defensa y hai quien cuestiona la so capacidá de direición pol fechu de nun tener pene. Tovía más preocupante ye qu´haiga quien faiga risión de qu´esta muyer asuma´l so cargu n´avanzáu estáu de xestación, como si esto fora motivu sine qua non pa nun cumplir dafechu col so trabayu. Criticable ye tamién la llabor d´unos medios de comunicación, pegoyu fundamental de cualesquier sociedá democrática, cuando estos son los primeros n´afitar la peculariedá de la nueva ministra por un supuestu morbu que fizo que´l martés toles portaes de los periódicos alborecieran con un tufu increyible a sensacionalismu. ¿Cómo pueden tar presentándonos en plenu añu 2008 el fechu de qu´una muyer seya ministra de defensa como una supuesta midida progresista?, na Edá Media igual pero anguaño... Nun entiendo por qu´esti ministeriu ye tan importante sabiendo la capacidá militar del Estáu español, nun veo a Carme Chacón cola escopeta´l llombu defendiendo Perejil, pero non por que seya una muyer sinón porque nun ye´l so llabor. Un ministeriu ha de dirixise cola tiesta y non colos coyones, el problema preséntase cuando hai homes que consideren qu´esta parte del so cuerpu ye fundamental a la hora de tomar una decisión.

Y falando de polítiques viénme a la tiesta la muyer asturiana col cargu políticu más altu: la presidenta de la Xunta Xeneral María Xesús Álvarez. El pasáu llunes foi, xunto a Valledor, la única política que s´atrevió a entrar al parlamentu pela puerta que d´accesu al recintu (onde s´asitiaba la concentración del CAO). Arestegui y Lastra, viriles y varoniles onde los haya, entraron pela puerta d´atrás del recintu pero pola principal del edificiu (a la vista de tolos manifestantes pero a abondos metros d´ellos). La presidenta del parlamentu tuvo dignidá y agachó la cabeza ente los glayíos d´oficialidá pero atrevióse a entrar pela puerta principal. Y cuento esto non como una defensa de María Xesús Álvarez sinón como una amuesa de que la valía d´un políticu nun se midi pol tamayu de los sos xenitales. Tamién p´afitar que tenemos de tar bien arguyosos d´un movimientu social como ye´l de defensa de la llingua qu´esixe a glayíos la so dignidá pero apártase pa qu´una parte del gobiernu escontra´l que llucha puea entrar al parlamentu. Educación y les manes bien llimpies pa nun tener qu´agachar enxamás la cabeza.

P.D; Mierda de sociedá falocéntrica que me fai defender a muyeres, sí, pero sociates...

Sumando los votos a l´asturianismu d´esquierdes cuesta-y pasar les 2.000 papeletes, ¿onde ta la socieciedá civil asturianista?, ¿votando a un PP ca día más averáu a la estrema-drecha pero que diz sofitar la oficialidá?, ¿sofitando a Zapatero al traviés del votu a Álvaro Cuesta -la lingua perxudica´l desendolcu económicu d´Asturies-?, ¿Daquién pue autonomase REFERENTE de daqué col O,2% y nun ponese colloráu?...