el trAsgU d´aRecEs

Si Google tuviera una pantalla prieta, cuntando cola cantidá de persones que lu usen, calcúlase que s´aforraríen unos 750 megavatios/hora añalmente. Como rempuesta a esto Google creó una versión prieta, nomada Blackle, coles mesmes funciones que la versión en blancu y prietu, sicasí con un consumu enerxéticu abondo menor. Dilo per ehí y usalo, ca poquitín cuenta.

Yá queda menos pal prósimu 24 de payares, cuando los asturianos mos manifestemos n´Uviéu por un futuru pa la nuesa llingua y cuando los blogueros n´asturianu quedemos pa falar de la comunidá y de posibles proyeutos ente culín y culín. Pero paez que nun somos nada orixinales porque se mos adelantaron los aragoneses col primer alcuentru de blogueros n´aragones, fabloggers, cellebráu´l pasáu 28 d´ochobre nun chigre xunto a la Universidá de Zaragoza. Pa promocionar l´alcuentru inclús colgaron un vidiu promocional en YOUTUBE y abrieron una web. Ente les coses qu´alcordaron ta facer un programa de radio n´aragonés y un mediu informativu dixital, yá que tovía nun hai dengún nesta llingua, y yá abrieron un foru pa encadarmar toles iniciatives de les que falaron.

Tamién tienen yá los aragoneses un nome pa nomar la so comunidá bloguer: Fabloggers (faló + blogues), como en Galiza dende fai tiempu tienen el nome de “blogmiño” pa falar de la so comunidá en rede. Ensin dulda un de los temes d´alderique del prósimu día 28 tien que ser sobre un posible nome pa la comunidá de blogues n´asturianu.

Una de les comunidaes culturales que nagua por un dominiu propiu na rede ye la sah.ariana col .eh, pitición fecha pol Frente Polisariu nel 2005. Pero un añu dempués de la pitición formal sah.ariana dende Marruecos contratacaron cola so propia candidatura, dende aquella la tensión militar del ermu sah.arianu tien el so reflexu nos despachos de les conferencies del ICANN. Asina dende Marruecos asesoraos por dalgún de los meyores abogaos d´internet llograron que l´ICANN parara la concesión del .eh y que nun se fale del tema a lo menos hasta que´l Polisariu y Marruecos avancen nes negociaciones empobinaes pola ONU.

Por mor del silenciu del ICANN y pa facer presión nel caberu conceyu cellebráu en Puertu Ricu montaron un puestín pa desplicar los motivos de la necesidá del .eh, pero a dellos metros funcionarios marroquianos taben dando folletos diciendo que´l Sah.ara ye de so colo cualo Marruecos debe mandar nel .eh. Inclús seis axentes marroquianos siguieron a Khadad Mhamed, ministru de la República Árabe Democrática Sah.ariana, cuando ésti acudió a ún de los últimos foros del ICANN cellebraos en Puertu Ricu.

Eh. ye´l códigu ISO que-y correspuende al Sah.ara, asina como´l .ps xa ta furrulando pa Palestina. Pel momentu de los cientos de códigos ISO esistentes los únicos que nun tienen el so equivalente dominiu nel ciberespaciu son el del Sáh.ara y el de Corea del Norte, que yá ta tramitándose.

Yá puen esistir dominios d´internet ".es" con carauteres nes llingües del Estáu, oficiales nidio ta. Ye dicir, podría solicitase l´identificador xixón.es o coruña.es por exemplu. Pel momentu la non oficialidá del asturianu fai que tovía nun se reconoza la h. anque al tener el catalán la l xemiada (l.l) si podría solicitase por exemplu l.lena.es. Tamién se reconoz la lletra ï, qu´anque paeza fecha pa Llión ye una lletra catalana.

A pesiar de too y hasta´l 30 d´ochobre namás que podrán reservar identificador los titulares de nomes de dominiu rexistraos enantes del 1 de xunu de 2007 y ye probatible que los nuevos dominios nun furrelen en tolos navegadores. Internet Explorer 7 y les caberes versiones del Ópera y del Mozilla Firefox si podrán procesalos, pero non les versiones antigües, amás hai duldes de que los guetadores y servidores web podrán trabayar con ellos.

Los nuevos carauteres almitíos son

-ñ
-á, à
-í, ï
-é, è
-ó, ò
-ú, ü
-ç
-l.l

El .cat, l´identificador ueb pa les páxines en llingua y sobre cultura catalana, ye un de los dominios que más medra asitiándose nel novenu llugar con 24.000 rexistros nun añu, la mayoría solicitaos por empreses. Esto pue ser una bona nueva pa les comunidaes llingüístiques que busquen el so requexu na rede, como ye l´asturiana col .ast. Pel momentu l´ICANN, l´organismu al que los EEXX dio-y la potestá de conceder los dominios ueb, yá afitó que nun tien dengún problema en que les comunidaes llingüístiques ensin estáu puean tener dominiu propiu que les identifique.

Ente los dominios que más medren destaca l´ausencia del .es y la presencia de distintivos como´l brasileñu .br o´l de la Xunión Europea .eu, asitiáu na tercera posición. L´aleman .de ye´l segundu más popular por delantre yá del .net, anque tovía dengún dominiu llogró quitar del númberu ún al popular .com.

L´inglés va perdiendo tarrén na rede, a pesiar de ser de la llingua de ún de ca trés usuarios les estadístiques del Internet World Stats amuesen una gran xubida d´otros idiomes. Asina l´árabe ye la llingua que más xubió, un 940 %, mientres que´l portugués tamién medró n´interné un 524 % dende l´añu 2000.

Dempués de l´inglés les diez llingües más usaes anguaño na rede son chinu (14 %), castellán (8,8 %), xaponés (7 %), alemán y francés (5 %), portugués (4 %), coreanu (3 %) ya italianu y árabe (2 %).

Un garapiellu de blogueros catalanes punxo en marcha una web pa cuntar toles persones favoratibles a l´autodetermín de los Países Catalanes. Na páxina estatpropi.cat pue vese a tiempu real sobre un mapa l´allugamientu de toles persones que votarien sí nún referendum sobre la independencia de los territorios de fala catalana. Les robles faense al traviés d´un formulariu, anque los propios impulsores reconocen que la campaña nun pue ser del too fiable yá qu´una persona pue usar varios nomes. Pel momentu cuasi milenta persones roblaron na web a favor del "sí".

La nueva convocatoria del ICANN pa nuevos dominios ta prevista, anque de xeitu nun oficial, pal entamu del 2008. Pel momentu l´organismu encargáu de regular los dominios d´interné ta trabayando nes bases pa la prósima convocatoria.

Munches naciones ensin estáu tán puxando por ello y dalgunos con muncho más sofitu de les alministraciones que´l casu asturianu. Por exemplu en Galiza les ciudaes gallegues y portugues xuntaes nel Eixo Atlántico (A Coruña, Braga, Bragança, Chaves, Ferrol, Guimarães, Lugo, Monforte de Lemos, Ourense, Peso da Régua, Pontevedra, Porto, Santiago de Compostela, Viana do Castelo Vigo, Vila Nova de Gaia, Vila Real y Vilagarcía de Arousa) aprobaron el so sofitu al Puntogal tres recibir la propuesta del Conseyu de la Mocedá gallegu.

Ayeri, nel mesmu día de les lletres, enteréme que nel concursu "20 Blogs" convocáu pol diariu de baldre 20 Minutos hai una seición pa los blogs n´otres llingües del Estáu que nun son el castellán, pero espliciten que "n´otres llingües constitucionales". Pa entamar dicir que nun soi xurista nin muncho menos pero paezme que la única llingua "constitucional" (recoyía na Carta Magna) ye´l español, con esta espresión paez que por falar asturianu o aragonés van aplicanos la llei antiterrorista o acusanos d´inxuries al rei...

Nun fai falta dicir qu´anguaño la blogosfera n´asturianu ye una realidá perafitada na rede que va medrando pasín a pasu, por ello vien la mio entruga; nel casu de qu´ún de los munchos y bonos blogs n´asturianu fora escoyiu pal concursu ¿en que candidatura entraría?, ¿na de blogs en castellán o direutamente somos marxinaos dafechu?, ¿nun esistimos?.

Anque l´asturianu nun seya llingua oficial ta recoyiu nel estatutu y hai un serie de lleis sobre l´idioma onde se fala d´elli como una llingua. Per otru llau yá que falen de constitucionalidá remembrar que la másima llei española diz que si ye llingua tien que ser oficial na so comunidá, sinón ye una modalidá llingüística. Con esta aptitú volvemos ver de nuevo qu´ensin el mesmu marcu llegal que tienen les otres llingües del Estáu tamos siendo marxinaos día tres día y que´l marcu llegal español ye pernidiu, si ye una llingua como recueyen les lleis asturianes nun hai otra; OFICIALIDÁ o anticonstitucionalidá del nuesu estatutu.