el trAsgU d´aRecEs

Participar n´Eurovisión ye una, de les munchísimes y xustes, vindicaciones palestines. Hasta tienen una páxina n´inglés pa dar a conocer la campaña. Lo que pasa ye qu´Eurovisión ye too menos política (como bien sabéis) y nun permite participar a países que nun tean reconocíos pola ONX como tales.

Palestina tien una televisión pública a cargu de l´Autoridá Nacional Palestina, creada (col sofitu d´Europa) ya inaugurada en 1993 por Arafat. Los sos rivales llamábanla “Tele Arafat”. Anguaño, dende Gaza, controlada por Hamás, tamién emite Al Aksa TV, famosa por un ratón Mickey qu´afalaba l´odiu haza los xudeos nun programa infantil. Los dos principales grupos palestinos usen les sos cadenes p´atacar al enemigu internu, dende la tv de Ramala llama a los llíderes d´Hamás “golpistes y rehenes d´Irán”, mientres que dende Al Aksa TV, con conteníos más relixosos, falen d´Abu Mazen como “sociu del enemigu sionista”. Denguna de les dos ta na UER, requisitu pa participar nel festival.

Y digo yo, si n´Eurovisión too dios vota al vecín; ¿votará Israel a Palestina y viceversa?. L´añu pasáu vimos como Armenia daba-y 12 puntos a Turquía (aquellos que mataron a un millón d´armenios) y los croates, bosnios o albanos foron los encargaos de llevar a Serbia al trunfu. Esti añu toles exrepúbliques soviétiques votaron a Rusia. Eurovisión ye otru mundu, un mundu de paz y collorines.

Vidiu n´inglés sobre la campaña de Palestina a Eurovisión

El parlamentu turcu ta trabayando nuna llei pa fomentar y protexer la so llingua propia, ente toles medíes nes que trabaya la comisión encargada de desendolcar la llei rescampla una: la obligatoriedá de dir a Eurovisión con un cantar na llingua oficial del país.

Dende que debutó en 1975 nel festival, foron munches les ocasiones nes que Turquía participó n´Eurovisión con un cantar n´inglés. Nel añu 2003, la televisión pública turca unvió a Letonia´l cantar “Everyway that I can”, dafechu n´inglés. Enantes del festival hubo una fola de protestes en tol país, llegando inclús a falase del tema nel parlamentu. Pero ganaron.

Fracia n´inglés

Andorra n´ingles

Ca añu fabrícanse nel mundu dos bales por persones y ca minutu una persona muerre víctima de la violencia humana. Pidi al gobiernu del Estáu que faiga daqué y pida na ONX la ellaboración d´un Tratáu Internacional sobre Comerciu d´Armes

El Liet Lavlut tamién tien imitaciones y fíos pequeños. Ehí ta´l “Nós Ùr” (Nuevu estilu en gaélico-escocés), que ye un festival que ñació esti añu pa escoyer los cantares que van representar a les llingües céltiques nel Liet Lavlut del prósimu 18 d´ochobre. El nome completu del festival ye “Nós Ùr. Celtic and Scots minority languages song competition”.

El 21 de xunu´l xuráu escoyó´l cantar galés “Drysu” (Confusión) del grupu Yr Annioddefol, mientres que´l públicu (con votu telefónicu, como Eurovisión!!!) quedó cola bretona “Bugale Belfast” (Neños de Belfast) d´un total d´once canciones nes llingües aceptaes (escocés, escocés del Ulster, gaélico-escocés, gaélico-irlandés, gaélico-manés, galés, córnicu y bretón). El festival celebróse nel Eden Court Theatre d´Inverness (Escocia) y los cantares en bretón y galés van representar a la totalidá de falantes en llingües céltico-escoceses.

Ná páxina oficial del festival podéis sentir los cantares participantes y los dos ganadores (que xunto col cantar n´Arbereshe Albanés son les que más me presten del festival)

Marruecos namás participó una vegada n´Eurovisión, en 1980 cuando Israel nun lo fizo. Pero la so representante, Samira Said, acabó nel 18u llugar con namás 7 puntos d´Italia. Y eso a Hassan II cafió-y tanto que dixo qu´enxamás. La televisión pública marroquina trasmite tolos años el festival, pero non dafechu. Y ye que la TVM censura les actuaciones nes que s´amuesa demasiáu o aquelles onde hai lletres contraries al Islam, y pa poder participar la televisión estatal tien qu´emitir el festival del entamu a la fin ensin cortes.

P.D: La primera y última representante de Marruecos n´Eurovisión anguaño ye una superestrella nel mundu árabe.

Mira que´l Liet Lavlut ye un festival de naciones ensin estáu, con llingües, munches d´elles, ensin drechos pa los sos falantes (que vos voi cuntar) y nada politizáu oyi. Non como Eurovisión. Mamina, como ta la cosa. Resulta que la Ministra de Cultura d´Estonia, Laine Janes, solicitó un boicot de les televisiones del continente pa que nun participaran na prósima edición del festival pol conflictu ente Rusia y Xeorxa, el festival va celebrase en Moscú tres qu´esti añu ganara Dima Bilan col cantar "Believe" .

Inclús, la directora del canal públicu polacu, Dorota Macieja, ta estudiando facer boicot y nun unviar a nadie a Eurovisión. Asina, la tv polaca manifestaría el so sofitu a Xeorxia, cuya tv yá anunció la so refuga a participar nun festival celebráu en Moscú. Les televisiones d´Estonia, Letonia y Lituania paezen que van siguir el camín de la Polaca y asina, manifestar el so sofitu a Xeorxa.

Por mor de les presiones de les grandes cadenes europees (BBC, TVE, France 2 y ARD) too paez indicar que na prósima edición del festival d´Eurovisión va volver a camudar el sistema de votación. Ye más que probable que na prósima edición los votos se repartan ente´l votu telefónicu del públicu, sistema d´anguaño, y el d´un xuráu d´espertos, sistema que furrulaba n´Eurovisión hasta finales de los 90 y que tovía conserven dalgunos países con problemes nel sistema telefónicu. Y ye que col votu telefónicu y popular, a pesiar de ser lo más democráticu, les votaciones son d´aquella manera. Y si non por qué diba dar Andorra los 12 puntos al Chiki-Chiki...

L´escocés más internacional, Sean Connery, ta acabantes d´espublizar la so autobiografía: “Sean Connery. Being a Scot”, un superventes na so tierra que más qu´una autobiografía ye un tratáu sobre Escocia. Un llibru onde´l míticu 007 cuenta por qué Escocia ye Escocia y por qué elli ta tán arguyosu de la so tierra. Asina, fala de la historia del so país, de la so lliteratura, cultura, los meyores deportistas escoceses.

Namás, vienme una pregunta a la tiesta: ¿Quién podría facer la versión asturiana d´un llibru asina?. ¿Luján Argüelles?, la superestrella asturiana de la televisión mundial, con permisu de Natalia Estrada. ¿Xosé Antón “Ámbas”?, si arrasa nos audímetros de xuru que tamién lo faería nes llibreries. ¿Sandra?, la de GH-6, porque asina, de forma escrita, podiamos analizar meyor el so asturianu de Benidorm. ¿Melendi?, asina, mientres escribe nun arma dalguna. ¿Pipi Estrada?, yá espublizó n´Interviú la historia de les sos relaciones sexuales, agora pue llega-y´l turnu a la so relación con Asturies...

...y pa dir animando la cosa ahí queda la versión que fixeron Herbamora del cantar que mos va representar nel Liet Lavlut.

Hebréu: Faláu por 8.000.000 de persones en tol mundu. Llingua oficial del Estáu d´Israel (falada pol 95% de la población)

Catalán: Faláu por 7.700.000 de perdones en tol mundu. Llingua oficial del Estáu andorranu (falada pol 30% de la población)

AT MUHANA-TAS PREPARÁU

Dana Internacional (Tel-Aviv, 1972). La madonna hebrea, en 1996 col so segundu discu, “Umpatampa” foi considerada la meyor artista d´Israel. El so tercer discu, “Maganona” (Lloca), foi prohibíu en Exiptu y Jordania porque daba-yos llerza qu´una muyer transexual “pervirtiese” a la so mocedá. Sicasí, vendiéronse millones de copies pirates. Esti discu inclúi´l so gran ésitu, “Cinque milla”. Conocida mundialmente tres ganar en 1998 el Festival d´Eurovisión col cantar “Diva”, col que vendió 400.000 copies del single en tol mundu. Foi la primer artista israelí en ser entrevistada pola MTV.

Web oficial

JUGAREM A ESTIMAR-NOS/XUGAREMOS A QUERENOS

Marta Roure (Andorra la Vella, 1981). La reina del pop en catalán, en 2004 convirtióse en la primer representante del país de los Pirineos n´Eurovisión. Fía y ñeta de músicos, cantó en varies orquestes del so país. A los 23 años presentóse al programa realizáu poles televisiones andorrana y catalana pa escoyer el cantar y el representante de la llingua catalana n´Eurovisión. A la fin, Marta Roure salió vencedora col tema “Jugarem a estimar-nos” col que viaxó a Estambul en 2004. Esi mesmu añu asoleyó´l so primer álbum, entituláu “Nua” (Desnuda). Anguaño, tien aparacada la so carrera musical pa dedicase al teatru.

Web oficial

Hai símbolos nacionales más allá d´una bandera o un escudu:

Reportaxe del informativu d´un canal israelí pola actuación de DI con motivu del conciertu del día de la independecia d´Israel

Reportaxe sobre Andorra d´una televisión xaponesa onde Marta Roure ye entrevistada