Lo lóxicu sería que ca vegada menos estaos nel mundu cometieran l´atrocidá d´asesinar llegalmente a dalgún de los sos ciudadanos, pero dempués de seis años ensin facelu Guatemala restableció la pena capital. Según l´ultra-conservador y opositor Partido Patriota (PP, que coses) esta midida tien que valir pa frenar los altos niveles de violencia nel país llationamericán, en plena crisis de seguridá ciudadana y onde según los datos oficiales la violencia de los grupos xuveniles (maras) xenera 16 victimes diaries.
Agora´l presidente del país, el social-demócrata Álvaro Colom, va tener la potestá de decidir sobre la vida de los condergaos a pena de muerte, anguaño hai 34 reos guatemaltecos nesta situación pero Colom yá dixo que nun-y diba dar l´indultu a dengún. Amnistía Internacional yá refugó esti atentáu contra la dignidá de la humanidá y criticó la hipocresía del Estáu yá que fai dos meses votara nes Naciones Xuníes a favor de la suspensión mundial de les execuciones.
P.D; Lo que más me h.ode ye que la xente que remana estes iniciatives son ultra-conservadores y, claro ta, católicos. ¿Nun ye Dios el que namás tien el drechu a disponer de les nueses vides?, ¿por qué l´albortu non y la pena de muerte sí?.
¿Nun se vos cayó un mitu eróticu cuando visteis a la Shakira nel vidioclip de “Te dejo Madrid” envuelta na bandera d´España?. Nun pasa nada ho, nun veis qu´esa ye una vendida que se punxo anunciar marques de ropa imperialistes y s´arrexuntó col fíu del presidente arxentín de cuando´l “corralito”. Mocines más guapes que les asturianes en dengún llau, y envueltes cola asturina, ¿qué más se pue pidir?. De xuru qu´esta de la semeya sabe pronunciar la l.l y mueve los cadriles al son del xiringüelu muncho meyor que la colombiana.
Los avilesinos yá tamos avezaos a ver tolos díes en “La Nueva España” denuncies d´esti partíu pantasma que nun fai política y se dedica a mandar comunicaos pero que tien perres a esgaya pa montar campañes inimaxinables pa otru partíu de les mesmes condiciones. Pa que vos faigáis una idea´l partíu tien un mínimu de cinco sedes na ciudá (polo menos cinco son les que yo conozo), una d´elles na mesma plaza´l Parche y otra ocupando les vieyes instalaciones de l´Axencia Tributaria, nun ye poco.
El diariu ex-falanxista yá mos tien acostumaos a titulares como “ASIA pidi más bancos nesti parque” o “ASIA pidi la igua de la farola esa que nun furrula”, ¿cuatro siyes na casa consistorial pa facer esto?, ¿d´onde saca tantes perres un partíu local pa facer tremenda campaña?, ¿por qué na seición de la edición avilesina nomada “la calle” (cuando la llees paez que tas lleendo un periódicu del sieglu XIX) el qu´escribaya eses llinies, Álvarez-Buylla, siempre pon a esti partíu poles ñubes ya inclús afala a votalos nes eleiciones locales?.
Increyíble la promoción que-y dan, la noticia “porreta” na páxina siete (impar, la más importante del periódicu) de la edición d´Avilés y ocupando cuasi´l 50% de la páxina. Dempués saldremos a la cai 20.000 persones pa pidir oficialidá, meterán la noticia en “Sociedad y Cultura” (de xuru que non la primera y en páxina par) y nun saldrá en portada, habrá un pequeñu partíu asturianista que denunciara los problemes pa la salú de la instalación d´una termica na nuesa comarca y pondrán la noticia en breves (si ye que la ponen), un programa n´asturianu consiguira unos records d´audiencia inimaxinables pa la TPA (30%) y nun dirán un res, prefieren falar del ésitu de “Asturias en 25” (10%), programa grabáu en Madrid nos estudios de LaSexta y producíu, a medies, pola nueva engaña.
ACTUALIZACIÓN;
Y güei dos noticies pa los asiaticos nes páxines avilesines(1 y 2), mientres informen de los premios de la música nun breve (nun pongo enllaz porque na edición dixital nin sal), cola mesma información que pue dar l´ABC o El País, que l´Academia de la música reconoza una categoría pa la nuesa llingua y qu´haya trés asturianos nominaos nun-yos importa (nin lo saben, nun vendría nel comunicáu que-yos mandaron y un periódicu asturianu -el más lleíu del país- nun va molestase n´informar en clave asturiana). ¿Sería normal qu´en El País informaren de la entrega de los Grammy falando del ésitu de Gloria Estefan o Shakira y nun dixeran un res de qu´Alejandro Sanz llevó trés o cuatro?
ACTUALIZACIÓN 2;
Vien xusto na edición de güei de La Nueva España-Avilés, por si nun vos quedara claro ehí va. Yá nin disimulen...
En Galiza delles asociaciones españolistes ñacies tres la aprobación del Decreto 124/2007 (enseñu billingüe al 50% en tolos centros) tán entamando a movilizase pol país vecín pa facer llegar a los gallegos el so mensaxe de privilexu del castellán sobre´l gallegu enmazcaretaos de defensores de la llibertá llingüística. Asina esti vienres la nomada “Mesa por la Libertad Lingüística" convocó n´A Coruña una manifestación pa refugar cualequier midida de promoción de la llingua propia. Ye reseñable la escoyeta d´esta ciudá: la zona más castellanizada de toa Galiza y que dempués de que l´alcalde socialista Paco Vázquez (l´Areces gallegu) colara d´embaxador al Vaticanu ta entamando a “galleguizase”. Nesta ciudá´l conceyu enxamás usaba´l gallegu y pa que vos faigáis una idea de la mentalidá coruñesa a la entrada de la ciudá hai un cartelu “iguáu” pero al revés (amestaron-y una L al topónimu A Coruña).
Amás d´esta manifestación al traviés de mensaxes móviles convócose a la mesma hora una concentración de defensa del gallegu que dobló en persones al grupu anterior. Dempués de los xiblíos ya insultos ente los dos grupos la policía apareció nel llugar pa facer marchar a los defensores del gallegu por mor de que la concentración nun fora autorizada, nesi momentu y ente los aplausos de los españolistes dellos mozos recibieron golpes de la policía. Según el Movemento polos Dereitos Civís pa facer una concentración nun ye precisa l´autorización de Delegación del Gobiernu, sicasí si podría ser motivu de multa pero non de carga policial. El MpDC yá dixó que va presentar denuncia pola actuación de dalgunos policíes qu´agredieron a persones que nun se resistíen ya inclús que taben marchando del llugar, tamién van pidir desplicaciones a la Delegación del Gobiernu polos golpes recibíos por persones que taben pellí y que nada teníen que ver cola concentración.
¿Nun me digáis que vosotros nun ficisteis lo de poner el vuesu nome nel Google a ver que sal?. Yo taba refalfiáu delantre del ordenador y nun se me ocurrió otra cosa que facer. La sorpresa foi grande cuando atopé una ponencia presentada en 2006 nel III congresu “Lengua y Sociedad” por un tal Raúl Sánchez Prieto, profesor de la Universidá de Salamanca, onde compara´l procesu d´estandarización del frisiu del norte y el del “llïonés”. Pues esti Raúl Sánchez garra como una de les sos fuentes un artículu que yo espublizara n´Infoasturies sobre la situación de la llingua en tol dominiu. Esto que nun entamu nun pue namás que prestar (anque diz muncho del nivel de la ponencia si garren como fuente un artículu d´un renomáu filólogu como yo...), pero cuando te pones a lleer la ponencia y ves que namás qu´echen escontra l´ALLA y afalaguen a asociaciones como Conceyu Xoven y El Fueyu yá nun presta tanto. Y lo que más cafia ye que manipulen les tos pallabres y digan qu´un reconoz que la normativa de l´ALLA ye una midida de carauter políticu que fraña la unidá del dominiu onde ún simplemente diz que hai sectores llionesistes que camienten asina.
Según denuncia la ONG Human Rights Watch n´Exiptu tán produciéndose graves atentaos contra un drechu humanu fundamental como ye la intimidá yá que les autoridaes consideren a los seropositivos como acusaos de “práutiques inmorales” y non como una condición a ser tratada. La ONG denuncia qu´ocho deteníos pola policía foron forciaos a facese pruebes de VIH y esámenes d´anu pa supuestamente comprobar la so homosexualidá. Pol resultáu positivu trés de los ocho deteníos foron encarcelaos pola so condición d´infectaos pol VIH.
Vuelvo falar otra vegada de la revista “Biblioasturias” porque nesti nuevu númberu inclúi una perinteresante entrevista a trés ente la presentadora de Terapia de Grupo, Sonia Fidalgo, y a dos de los actores del programa, Pedro Durán y Alberto Rodriguez. Yá amosé equí munches vegaes que soi fan del programa (xenial la nueva seición de “Que ye oh, presidente” con un cartelu pasando per baxu con “España nun ye el tu país” y un doblaxe al futbolista Villa diciendo como lo secuestraran y lo obligaron a vistir cola camiseta d´España cuando “esti nun ye´l mio país”) y que prestame a esgaya como faen risión de lo asturiano y col asturianu (nun confundir con del asturianu). Esbillo equí delles cites de la entrevista onde los protagonistes falen del programa y cuenten coses más qu´interesantes (a ver si mos queda claro que tán del nuesu llau qu´a vegaes andamos a la gueta l´asturfobia onde nun la hai):
P.D: Si Terapia de Grupo fuese un partíu políticu, ¿cómo convenceríais a los asturianos pa que vos votasen?
S.F: Los políticos, los qu´agora tán y los que tán por vinir, deberíen dase cuenta de los puntos fuertes que toca Terapia y una vegada comprobaos los resultaos, facer por aplicalos. Per otru llau, paezme que nun tenemos que convencer a naide, ufiertamos una propuesta divertida, qu´amuesa d´un ciertu xeitu la sociedá asturiana... el que se sienta reflexáu que mos vote.
A.R: Un partíu políticu se mantíen pola cantidá de perres que tien y la so “pegada” va en función d´ello, a bas de campañes publicitaries, engañu social... Terapia nun pue competir n´igualdá económica, pues la rexón nun pue competir colos grandes monstruos d´otres cadenes. Asina, si fuere un partíu políticu, nun podría competir n´igualdá, nun podría facer una campaña enorme y tendría que dir al pueblu, un poco como fai Terapia: riéndose del pueblu llanu, pues somos el pueblu llanu y lo fundamental d´un humorista ye reise d´un mesmu... bono, tamién porque tenemos la prohibición de reínos de los políticos. Francamente: la política nun m´importa un res.
S.F: ¿Hasta qué puntu vos paez qu´espresase n´asturianu nel plató pudo influir nel ésitu de Terapia, nel que´l públicu lo acepte como daqué de so?
P.D: A pesiar de les munches mentires que se cuenten del asturianu: que nadie lo fala, que ye una llingua inventada, etc. Ta ehí. Parte del ésitu del nuesu programa confirma que l´asturianu ye una llingua con hestoria, con tradición y que muncha xente fala y comprende. A la tele nun suelen llegar correos n´asturianu, asina qu´una de les coses que más gayola me fizo y me fai ye recibir e-mails escritos n´asturianu o n´amestao. Ye d´agradecer l´esfuerciu que fizo la xente por adaptase al nuesu códigu. Ún de los ésitos del nuesu programa ye que la xente vese reflexada nos personaxes que representamos. Asina, ye mui complicáu que daquién como Toño, el personax que fai Alberto, fale en castellán. Amás, nun tien muncho sentíu que n´Asturies haiga una televisión y que nun te presente n´ella l´asturianu. Tien de reflexar una realidá qu´esiste: n´Asturies fálase asturianu.
Dende fai ochos meses esti anunciu d´Amnistia Internacional entituláu “El poder de la to voz” nun se pue emitir nes televisiones del Estáu español pola prohibición del Ministeriu d´Industria y Comerciu. El Gobiernu d´España diz que´l vidiu onde se ven xefes d´estáu como Castro, Bush, Putin o Gadafi (alcordarse de los intereses económicos d´España nel Líbanu) recitando la Declaración Universal de los Drechos Humanos ye publicidá política polo que nun considera l´anunciu como un serviciu públicu ya impidi la so emisión de baldre (como ye vezu nos anuncios d´ONGs y asociaciones ensin ánimu de llucru), amás si dalguna televisión decidiera emitilu sería sancionada como infracción grave. Los de ZP xustificáronse diciendo que l´incumplimientu de los drechos humanos nun se pue criticar señalando a quien nun los cumple, qu´eso xenera controversia...
Yá podemos tener unos datos serios sobre la opinión de los llioneses sobre la so llingua gracies al "Estudiu sociollingüísticu de Lleón. Identidá, conciencia d´usu y actitúes llingüístiques de la población lleonesa" de los académicos Xosé Antón González Riaño y Xosé Lluis García Arias.
Esperanzadores son los datos qu´ufierten: 50.000 llioneses falen la so llingua vernácula nel ámbitu familiar. Un 10% de la población de too Llión que sobre too s´asitia nes fasteres de Babia, L.laciana, La Montaña y La Cabreira, el 63% de los llioneses ta pol enseñu de la llingua nes escueles y un 80% taría d´alcuerdu con un trabayu en común en política llingüística ente Asturies y Llión. La metá de la población quier la promoción del so idioma pola alministración y lleguen al 83% los que camienten que l´asturllionés tien de ser reconocíu nel Estatutu.
Podéis ver equí más datos na noticia espublizada en "La Voz de Asturies" (que nun sé por qué na edición impresa entitula "La mitad de los leoneses quiere que su estatuto regule la llingua" y na páxina web diz "Un estudio de la Universidad revela que el 10% de los leoneses hablan bable")
Esbilla
del.icio.us
-el tRasgU d´aRecEs
