el trAsgU d´aRecEs

¿El Chiki-Chiki la primer frikada hispana n´Eurovisión?

La participación d´España n´Eurovisión pue ser dientro poco daqué de lo que falar siempre en pasáu. Y nun ye culpa de Buenafuente nin de los eurofans-anes botelles que ven el Chiki-Chiki como una ofensa a esi gran festival “musical” que ye Eurovisión. Ye que l´UER va reunise d´equí a poco n´Atenes p´analizar les prósimes reformes del festival y el direutor d´Eurovisión, el suecu Svante Stockselius, díxo-y a la prensa inglesa que por mor del gran númberu de patrocinadores del concursu les televisiones d´España, Francia, Alemania y Reinu Xuníu podríen perder el privilexu de pasar a la final d´Eurovisión gracies a la so aportación económica. La que se pue montar...

A TVE nun-y importa ganar Eurovisión, pero si la so audiencia: p´atopar un programa más vistu que la edición d´esti añu (23 programa más vistu de la hestoria d´España) hai que remontase al 2002: l´Eurovisión nel que participó Rosa. Por eso, pola audiencia, TVE lleva una montonera d´años pagando 50 millones de les antigües pesetes pa mantener un festival nel qu´añu tres añu España ye humillada. El problema ta en que si España tien que pasar pola semi-final (TVE namás qu´emitió una de les dos semi-finales y pela 2) ye más que probable que nun consiga enxamás llegar a la gala del sábadu (a nun ser que se lo tomen en seriu como faen los países del Esti), ¿y va tar el 60% de l´audiencia pendiente d´unes votaciones nes que´l so estáu nun participa?, ¿TVE y la mesmísima BBC lo van permitir?, ¿van participar nun festival nel que siempre queden nos caberos puestos y que por riba la so emisión, un sábadu en prime-time, va quita-yos puntos de share?.

Ésta pue ser la cabera humillación de los pequeños países europeos n´Eurovisión: nun fundaron imperios, nun estendieron les sos llingües nin les sos relixones pel mundu, nun tuvieron monarquíes cuyes historíes s´estudien nes universidaes, nun organizaron xuegos olímpicos, nun tuvieron colonies, nun esclavizaron a otres races, nun son centros de poder políticu mundial... Pero nun importa: los países del Esti tienen Eurovisión, ca vegada ye más de so.

P.D: Lo meyor que facía TVE yera retirase que yá sabemos que los países del Esti se voten ente si y bla, bla, bla... qu´España se retire d´una puta vez, que TVE dexe entrar a les televisiones de la FORTA na UER y que la TPA mande a Anabel Santiago pa Moscú (anque conociéndolos son capaces de mandar a daqué asemeyáu a lo de Remedios Amaya).

(Bienllegáu, nun me molestes n´absolutu)

Taba l´otru día dando vueltes pela estación d´autobuses d´Uviéu enantes de garrar l´ALSA pa Bilbo (pero esto nun importa que namás ye una lleenda) cuando pudi ver como nuna de les coles pa garrar un autobús había una mozina d´unos venti años, vistida con vaqueros y con un velu verde claru na cabeza. Dos sitios más p´atrás otres dos muyeres, una d´unos trenta años y otra que yá pasaba los sesenta, tamién llevaben un velu gris, como tola so ropa, que namás dexaba ver el so rostru. Mientres, unes sayes muncho más p´abaxu de la rodiella permitíen ver unos tobiellos tapaos por medies. Yeren dos monxes.

La mocina llevaba´l velu como un símbolu de la so identidá, pero tamién como daqué consideráu estéticu dientro de la so cultura. Nun sé, a vegaes imaxino que mos prohibiesen por llei llevar triskeles, imaxino qué pasaría coles monxes que dan clases en munchísimos colexos si prohibimos el velu na muyer, qué pasaría coles muyeres que por folixa o por trabayu se ponen n´Asturies, y en otros munchos llugares d´Occidente, el traxe tradicional del so país. ¡Coño!, ye verdá qu´equí hasta fai poco les muyeres tamién diben con velu, bono pañu. ¿O ye que namás vamos prohibi-yos llevar el velu a les muyeres árabes?, ¿acusamos a Ana Cano d´islamista radical por pidir dende´l so cargu públicu que les muyeres vaigan cola cabeza tapada p´amosar el so compromisu cola cultura del país?.

Ponía equí fai poco dos videos del xenial “Vaya Semanita” d´ETB onde al traviés d´un supuestu atracu a un Bancu facíen risión cola imposibilidá de desendolcar la vida dafechu en vascu. Pues esi videu, por coñón que fore, nun ta mui alloñáu de la realidá. Fai once díes un home de Vigo foi atacáu nel so trabayu por una banda de trés homes, pero esto nun ye lo pior, porque esti vigués sofrió, por riba, un grave casu de discriminación lingüística. Cuando entamó a echa-yos a los lladrones tolos xuramentos esistentes na llingua de Rosalía, éstos van y espeten-y: “Háblanos español, nosotros no entender”. Podéis lleer la noticia equí.

Toi a díes d´entamar colos esamenes y apurando colos caberos trabayos que siempre dexo pa última hora, por mor d´ello nun tengo tiempu pa nada y menos p´actualizar el blogue. Pero nun pueo dexar de poner estos vidios que topé faciendo´l friki pela rede.

¿Qué pasa si amestamos los sones poperos y discotequeros (cutres) d´occidente con sones más tradicionales d´Oriente Prósimu?. Pues un exemplu son estos cantantes israelinos, Dana International y Idan Yaniv. Lo meyor la estetica de los vidios y les alusiones a la so realidá socio-cultural (atención en "Love Boy" a la estrellina de David nel pescuezu d´ún de los maromos y el kibá d´otru)

INDIAN MOVIE (Dana International ya Idan Yaniv)

LOVE BOY (Dana International)

GALGAL ANOK (Idan Yaniv)

EIRE (non clasificáu)

Si´l gran pavu Dustin nun algamó pasar a la final del sábadu con esti homenax a Eurovisión, y col escenariu enllenu de pluma, el Chikilicuatre ta perdíu.

BOSNIA-HERZEGOBINA

A pesiar de qu´Uribarri dexo polos suelos esti cantar (viva la imparcialidá periodística) que fala de monos xintando platanos, a la fin clasificóse pa la final. H.odete Uribarri.

ESTONIA (non clasificáu)

Un gran homenax a esi míticu grupu de la nuesa infancia que foi Parchís.

AZERBAIJAN

¿Posible ganador?, depende de la suerte que cuerran les pastelaes de Grecia y Suecia

Pa que naide m´acuse d´antisemita almitó que´l cantar que más me presta d´esti añu d´Eurovisión ye´l que representa a Israel. Porque sí collacios, Israel participa dende 1973 nel festival européu y, amás, ye ún de los países pasa per Eurovisión arramplando con too. Dende´l míticu "A Ba Ni Bi" de 1978, el finxu hestóricu algamáu en 1998 cuando Dana Internacional, una muyer transexual (non el transexual, como diz l´homófobu y misóxinu d´Uribarri), ganó´l festival llevándolu a Xerusalém, fuera de les lleendes europees, o la polémica del añu pasáu col cantar "Push the Button" que criticaba´l programa nuclear iranianu y según les males llingües dalguna vegada camudaba´l "push" pol Bush. Y ye qu´Israel tien merecíu la so participación nel festival musical europeu, sinón enxamás veríamos actuaciones como esta del 2000. Una xoya, eses voces, esos saltinos, esi baille, esi piquín de los cantantes y lo meyor, la versión hebrea de la Fresina que sal cantando con esos güeyinos que paez qu´enantes de salir a actuar fumóse tolos praos d´Afganistan. Y pa finar l´actuación saquen les banderes d´Israel y Siria y piden paz, be happy collacios.

...y de bona moza de familia católica, como la sobrina de Rouco vamos.

Imaxenes de la policia marroquina cargando contra la población nuna manifestación pol 34 cabudañu del Frente Polisario.

Nel 2004 Marta Roure fizo sonar por primer vez el catalán en toles televisiones del vieyu continente col cantar "Jugarem A Estimar-Nos"

Güei ye la primer semifinal d´Eurovisión y dende qu´en 2004 entamara la participación andorrana va ser la primer vez que nun s´oya´l catalán nel festival. Tamién fai cuatro años la organización d´Eurovisión decidió, por mor del númberu de países que pidiera participar, xebrar el concursu musical en dos ediciones (semifinal y final). Nun intentu deseperáu por algamar clasificase pa la final esti añu´l país de los Pirineos dexa pa prau la so llingua pa unviar a Serbia a la triunfina catalana Gisela con un cantar n´inglés.

Esti añu ye tan grande´l númberu de países que van participar que´l festival va xebrase por primer vez en trés gales, pero TVE namás que va emitir la semifinal de güei (21.00, La 2) y la final del sábadu (España paga más d´ocho millones d´euros polos drehos d´emisión y autoclasifícase pala final). Colo cual vamos quedar ensin ver les actuaciones de países como Portugal, Turquía o Suecia, según ellos porque nun quieren saturar, amosando nidiamente qu´a TVE nun-y importa un res Eurovisión y menos ganar (¿imaxináis les perres que cuesta montalo?). ¿Pue daquién saturase d´Eurovisión?, ¿qué serviviu públicu de mi madre ye ésti?. Lo que deveres-y importa a TVE ye sacar perres col Chiki-Chiki y que l´audiencia del sábadu te por riba de la de los otros canales. Por suerte tovía queden los "pequeños" países pa los cuales tovía Eurovisión ye una gran plataforma turística (quiciabes la única que tienen), un requexu abiertu al mundu p´amosar la so modernidá en trés minutos (tornáu a llinguax eurovisivu "facer l´hortera a más nun poder pa llamar l´atención")

El que s´atreve a enfrentar los drechos d´un coleutivu colos d´otru, como si por tener los transexuales drechos los asturfalantes tuvieren más motivos, o el que va y en llugar d´acusalu d´homófobu llámalu abertzale, como si la llingua y l´independentismu vascu tuvieren daqué que ver amosando que lo que de verdá-y importa nun ye l´insultu al coleutivu transexual sinón la "defensa" de la llingua y el so usu por parte d´un conceyal. ¿Cuál dixo una babayada más grande?, acéptanse votaciones.