el trAsgU d´aRecEs

El soníu en direutu, del CD y del DVD, inmeyorable, el montaxe del conciertu xenial, comparatible al de cualesquier gran grupu d´una multinacional discográfica, y el documental y les tomes falses permítennos conocer más en fondu a los componentes del grupu, les sos opiniones y tolo qu´hai detrás d´una actuación o un ensayu. Habrá quien diga que falten cantares y que sobran dalgunos, pero sería imposible que contentaran a toos. Simplemente un trabayu asina amuesa la madurez d´un grupu que yá nun ye que forme parte de la música asturiana, Dixebra forma parte direutamente de la propia hestoria d´Asturies. Nidia amuesa ye que nos partes de la TPA vense obligaos a informar sobre la salida a la venta d´un discu que nún cantar diz “a Tini Areces tiraremos-y güevos” (esa "Rapaza Nacionaliega" que foi´l primer ésitu del grupu y qu´agora xenialmente recuperen dempués de dos décades). El propiu Xune dicía fai tiempu en “Les Noticies” que la música asturiana yera la única estaya onde la llingua asturiana yera oficial, con esti discu la música y la llingua asturiana van más allá; ver o escuchar el discu de Dixebra simplemente faite sentite arguyosu de qu´un discu asina seya dafechu asturianu, un discu que tendría que camudar el so nome orixinal pol de “Asturies n´acción”, porque nel DVD pue vese a 3.500 persones folixando y reivindicando un país que va lluchar por siguir siéndolo. Y ye que Dixebra ye Asturies, como Asturies ye dixebra.