Un añu de llibros
Seique la lliteratura n´asturianu vive gracies a aquellos que consumen cultura n´asturianu como una actitú militante y qu´amás l´asturianismu llee poco, polo menos na nuesa llingua. Poro, güei voi facer una esbilla de los llibros n´asturianu que lleí nesti añu que yá finó y que me prestaron asgaya. Si vos peta recomendái dalgún llibru o dalgo que vos preste a ver si animamos un poquitín la nuesa cultura ástur.
-
PARQUE TEMÁTICU de Xosé Nel Riesgo. Trabe 2005. Dempués de 16 años dende la publicación de la so primer novela, "El cai nunca duerme" (novela a la que-y tengo muncho ciñu yá que foi´l primer llibru n´asturianu que lleí), l´autor presenta una segunda novela enllena d´humor onde fai un repás pola política asturiana. Increíblemente foi escrita enantes de la griesca Uviéu-Avilés pol Muséu de los Premios Principe. Ye una novela d´humor pero desgraciadamente más real de lo que l´autor foi a imaxinar, namás que podría ser escrita nún país como Asturies.
-
DÍES DE MUNCHO de Antón García. Trabe 2004. Poco se pue dicir de l´autor, un de los meyores de la lliteratura asturiana d´anguaño. Una novela que llega a lo más fondero del alma, qu´un llibru n´asturianu algame les tres ediciones yá diz muncho de la calidá de la novela.
-
CÁ LOS ANIMALES de George Orwell. ALLA 1995. Nel vieyu blog yá amosara abondes vegaes la mio almiración por Orwell. Pel momentu esti ye l´únicu llibru del xenial autor inglés tornáu a la nuesa llingua. Ye una fábula que sirve de metafora sobre´l poder y la sociedá en xeneral.
-
LA BANDA SONORA DEL PARAÍSU de Xandru Fernández. Trabe 2006. Ún de los meyores llibros asoleyaos esti añu n´Asturies. Obres asina amuesen que la lliteratura asturiana va pol bon camín y que nun quedó anclada nel pasáu. Una novela moderna reflexu d´una epoca y d´una vida na Cuenca Minera posindustrial.
-
LA BODA DEL AÑU de Ismael González Arias. Trabe 2003. González Arias yá nos tien avezaos a la so "coña" na so columa de "Les Noticies". Como "Parque Temáticu" una reflexón fecha con humor de tolo que ye Asturies pa los políticos que nos gobiernen, la vidá meyor vivila con humor que sinón...
-
TROP de Germán García. Trabe 2000 (cómic). N´Asturies hai una bona riestra d´autores de cómic y una parte curiosa d´ellos ficieron obres n´asturianu. Autores como J.A. Marinas col so "Domno" sobre la vida de Gonzalo Pelaez o revistes como "El Gomeru" son nidia amuesa d´ello. Esta hestoria futurista asoleyóse nún entamu precisamente nesa revista, dempués l´autor consiguió fama internacional con "La Patrulla X", "Superman"...
-
LA CUEVA DEL OLVIDU de Xuan Bello. Ámbitu 2006. L´únicu llibru de los cinco que salió con "Les Noticies" que tuvi la oportunidá de lleer. Podrás tar más d´alcuerdu o más a la escontra de les opiniones que Xuan Bello espón cada vienres na so columna, pero naide con un mínimu d´enfotu pola lliteratura podrá ñegar que ye un de los nuestros meyores escritores. Na novela pue vese que nun too ye blancu o prietu, hai munches capes.
Esbilla
del.icio.us
18 d´ochobre:
¡¡¡TOOS CON DIXEBRA!!!
