Ensin foder la llingua...
Yá falé de lo muncho que me prestrara´l nuevu discu de Dixebra. Col bon trabayu fecho ye una pena que quedemos ensin poder ver el material qu´a la fin nun entró nel discu y taría bien que la televisión pública asturiana mercara los drechos d´emisión de tol metraxe y facer un especial de televisión de más duración (como faen les televisiones con dalgunes películes que s´estrenen nel cine y dempués son emities con más metraxe na televisión, "El laberinto del Fauno", "El Abuelo", "Los Borguia" o la mesma "Pelota Vasca" en ETB). Dende equí propongo que lo estrenen el día de les lletres del añu 2008 (habrá que dái un añu al discu pa vendese), podríen emitilu xusto dempués de la tresmisión del sesión estraordinaria de l´ALLA que cuento que la TPA tresmita en direutu tolos años dende´l prósimu 4 de mayu, primer día de les lletres que va cellebrase con tv pública.
La televisión pública podría facer munchos programes n´asturianu si asina lu quixera. Emitir selmanalmente conciertos de grupos de música asturiana (tradicional y n´asturianu) podría ser un bon programa pa promocionar la música del país al empar que normalizar la llingua asturiana. La TPA tien medios pa facelu, puen encargase ellos colos sos propios medios o la productora del Principáu, agora convertida en productora al serviviu del ente. Nun tendríen que ser tan espectaculares como´l de Dixebra na Plaza´l Parche, podríen ser nún pequeñu teatru de cualesquier llugar d´Asturies. Otro cosa que de xuru que tien ésitu viendo l´audiencia de los documentales asturianos en Tele Tini ye contratar a Xurde Morán, qu´en TeleXixón algama un 22 % d´audiencia colos documentales nos que caleya´l país n´asturianu. ¿Nun sé por qué si a la direición del ente nun-yos importó garrar tola plantilla de Teleasturias y dexar al canal priváu cuasi ensin personal nun contrató a xente que trunfa nes llocales?. Lo mesmo que Mari Luz Pontón, creadora y presentadora de "La tele de los escolinos" en Localia-Asturies y "Revoltixu nes ondes" na mesma RPA que podría ser la encargada de "Presta asgaya", programa infantil de la TPA qu´anguaño torna contenios del asturianu al castellán y nun emite dibuxos animos na nuesa llingua (cuando en Teleasturias yá se torna una serie d´animación americana al asturianu, que nun presto "El faru d´Iyán"!!!) . Y si daquién nun sabe cuálo ye´l "colmu" de la TPA dígo-ylo yo; nun tener dengún programa n´asturianu y emitir "Cifras y Letras" en castellán cuando na TVG ye en gallegu y s´emitió en catalán en TVE-Catalunya. Tamién se podría falar de la murnia audiencia de les series en Tele Tini, dalgunes con doblaxes sudamericanos de fai dos sieglos, cuando podríen innovar con la primer serie foriata tornada´l asturianu. Quiciabes n´Asturies nun puen ñacer como setes productores pa facer tele n´asturianu como dixo Camilo Diaz, conseyeru de la RTPA, pero toles televisiones autonómiques al tener más fuercia fichen a los meyores de les televisiones llocales y dende fai tiempu nes televisiones d´Asturies hai programes n´asturianu con éstitu que nun "foden la llingua" y que podríen tar na TPA con más difusión y meyores medios.
Esbilla
del.icio.us
18 d´ochobre:
¡¡¡TOOS CON DIXEBRA!!!
