La plataforma puntulli.org algama les 6.000 visites en quince díes
Los quince primeros díes de furrulamientu de puntuLLI.org foron "un nuevu ésitu" a xuiciu de los promotores al superase les 6.000 visites (en total de 31 estaos) y los cuatrocientos sofitos roblaos por particulares, procedentes de más de cuarenta conceyos de tol Reinu de Llión". L´asociación tien yá sofitos de 35 colectivos llingüísticos, culturales, xuveniles y deportivos de les provincias de Llión, Zamora y Salamanca.
Anguaño la web ufierta la posibilidá d´acceder a los conteníos en siete llingües; asturianu, castellán, inglés, francés, italián, alemán y catalán. Los promotores de la iniciativa puntuLLI.org trabayen agora p´algamar sofitos de colectivos de tolos llugares y s´espera abrir la puerta a que les páginas webs de Llión y los blogs de noticies puean tamién sumase a la iniciativa. Asina esperen superar los 50 sofitos colectivos y los 500 individuales.
Per otru llau en Galiza la iniciativa pol PuntoGal recibió´l sofitu de la propia Secretaria Xeneral de Política Llingüística, Marisol López, que recibió a la Xunta Directiva de l´Asociación PuntuGal. Marisol López afitó que "l´esistencia d´esti dominiu servirá pa dái más sofitu n´interné al nuesu idioma y la nuesa cultura". Dende que´l 17 de xineru s´entamó esta convocatoría p´algamar un dominiu pa la comunidá llingüística gallega más de 2.000 persones amosaron el so sofitu, ente elles la so propia institución llingüística valoró positivamente la iniciativa y tamién recibió a l´asociación. N´Asturies pel momentu impera´l silenciu de los medios de comunicación y de les nueses instituciones, pero los sofitos medran cada día y yá hai más de 30. Sería bono que grupos como Dixebra o instituciones como l´Academia amosaran el so sofitu a la iniciativa. La prósima conferencia internacional pública del ICANN va ser a finales de marzu en Lisboa. Amás de los que yá falamos hai otres munches cultures puxando pol dominiu propiu, asina los bretones (.bzh) yá sumen 12.850 robles dende´l 15 de marzu del 2006 y los galeses (.cym) van pa les 5.500 dende´l 17 d´ochobre.
Esbilla
del.icio.us
