30 años dempués y siguimos igual...
...manifestándonos POLA DIGNIDÁ DEL ASTURIANU NEL SISTEMA EDUCATIVU.
Tres l’agresión a la llingua asturiana que supón la propuesta de currículu pa primaria fecha pola Conseyería d’Educación, nesta movilización desixiráse una redacción del currículu que garantice la presencia de la llingua asturiana en toles escueles, en condiciones dignes y de normalidá.
El derechu al accesu al estudiu y conocimientu de la llingua asturiana ta reconocíu pola llexislación y ha ser garantizáu ensin escepción. Por ello, l’asignatura de Llingua Asturiana ha ser d’ufierta obligatoria en tolos centros d’educación primaria, pa tolos escolinos y escolines. Ensin ratios de mínimos que fagan que’l derechu a estudiar asturianu dependa de la escoyeta d’otros compañeros.
Habrá garantizase que l’asignatura nun compita con otres materies. Como recueye la llei d’Usu nel so artículu 9, apartáu 3: La escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos. Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu l’alumnáu.
Asinamesmo, el currículu pa la educación primaria que va ser aprobáu’l prósimu 23 de febreru, ha d’abrir la posibilidá de que la llingua asturiana sea emplegada como llingua vehicular na enseñanza d’otres materies. Pa too ello, ye tamién fundamental que s’afiten midíes pa la estabilización del profesoráu.
La Xunta pola Defensa de la Llingua Asturiana quier destacar qu’esti nuevu conflictu encontiase na situación de marxinalidá llegal que carez la llingua asturiana por nun tar reconocida como llingua oficial, lo que permite que n’Asturies vengan aplicándose sistemáticamente les llectures más restrictives pa los derechos llingüísticos y educativos.
Esbilla
del.icio.us
el trAsgU d´aRecEs | 04-02-2007 - 15:04:00 GMT 1 #
Ricardo Candás | 04-02-2007 - 15:04:00 GMT 1 #
Ricardo Candás | 04-02-2007 - 15:04:00 GMT 1 #