Catalunya, Euskadi y Galiza van trabayar en comuña poles sos llingües
Dempués d´una xuntanza en Bilbo de les alministraciones vasca, gallega y catalana los tes executivos alcordaron un protocolu de collaboración poles polítiques llingüístiques normalizadores. L´alcuerdu tien una duración de tres años y foi robláu pola secretaria xeneral de Política Llingüística de la Xunta, Marisol López, pol viceconseyeru de Política Llingüística del Gobiernu Vascu, Patxi Baztarrika, y pol secretariu de Política Llingüística de la Generalitat, Miguel Pueyo. Asina les tres alministraciones van trabayar en comuña pa compartir esperiencies, pidir al gobiernu central que reconozca´l calter plurillingüe del Estáu, l´usu de les llingües oficiales nes instituciones lexislatives, na xusticia, en Correos o Renfe, nos medios de comunicación públicos o na educación, amás d´entamar una comisión de siguimientu del desendolcu del protocolu. Los responsables de la iniciativa quixeran dexar nidiu que´l plurillingüísmu ye una riqueza y que la iniciativa nun ye pa lluchar escontra´l castellán sinón pa reconocer la realidá del 40% de la población que vive en llugares con una llingua distinta´l castellán, anque pel momentu namás que van facer poles llingües que yá son oficiales.
Esbilla
del.icio.us
