Televisión pa facer país
Demientres escribayo esti articulín Ambás y Pepa Las Murias falen otra vegada nel televisor sobre cuentos, cantares y cosadielles na so llingua materna, n´asturianu occidental. La cinta de VHS na que grabé la primer emisión n´asturianu de la hestoria de la nuesa televisión yá ta cuasi gastada por tolos visionados que sofrió esta selmana, dempués d´un añu del entamu de les emisiones regulares de la TPA había munches ganes de ver programes n´asturianu na televisión pública y como tovía la programación na llingua d´esti país nun ye que dé pa muncho nun faigo otra cosa que velo una y otra vegada. Ye una pena qu´a los directivos de la TPA nun-yos preste lo mesmo ver programes n´asturianu y namás que s´atrevieran a facer tres programes (los otros que falten y que mos quixeron meter como programes nun son más qu´una seición diaria dientro d´un magazín de tarde) pa emitilos en bloque un sábadu pela mañana en llugar d´amosar un poco de sensibilidá pola normalización llingüística y facelo en prime-time, l´horariu de másimu consumu televisivu. Pera salió-yos mal la xugada, quixeron que l´asturianu entrara pela puerta d´atrás ensin facer muncho ruíu y topáronse con una perbona rempuesta de l´audiencia asturiana qu´emburrió´l programa a lo más altu, asina foi que "Camín de Cantares" convirtióse nel programa más visto del día con un 10,2 %, un númberu mui per riba del share mediu de la TPA (3%).
PIECES
Direición; Ramón Lluis Bande
Fecha d´emisión; Sábados 12.15
Produición; Ámbitu Audivisual
Nos dos programes producios por Ámbitu pa la TPA ("Pieces" y "Camín de Cantares") llega a nótase cierta inesperiencia de la productora y del so realizador na produición pa televisión, llóxicu tratándose de les dos primeres obres d´una productora que ta acabante de ñacer. El primer programa, "Pieces", faise daqué pesáu ensin un presentador, una voz en off o unos créitos que vaigan enllazando´l magazín. Nun xuega´l so favor la doble concepción del programa como pequeños programes a lo llargo de la selmana y como programa contenedor los sábados, separtaos quiciabes funcionen pero xuntos conviértense nuna mecigaya de contenios qu´acaben faciéndose a vegaes aburrios. Hebo dalgunes crítiques sobre l´usu del castellán nel primer programa pero foi daqué comprensible; los cantantes de tonada de la seición "Voces" falarán como sepán o como-yos pete y nesti casu Diamantina Rodriguez nun sabe o nun quixo utilizar l´asturianu (quiciabes pola diglosia). Ye verdá que pa lo poco qu´hai nel nuesu idiona cafia a esgaya l´usu del castellán sobre manera cuando hebo casos nos qu´en programes en castellán pidióse a dalgún invitáu que nun usara l´asturianu. Lo mesmo pasó na segunda seición, "Muséu", na qu´una persona de la cultura asturiana fala sobre´l so cuadru favoritu del Muséu de Belles Artes. Nesti casu y como yera´l primer programa l´encargáu de facelu foi´l propiu direutor del muséu y paez que nun fala asturianu... a partir d´agora ye d´esperar que toles persones que falen del so cuadru favoritu seyan falantes d´asturianu, nin dicir yá que les actuaciones músicales (por ciertu una pena que nun mos enseñen más la capilla de Los Dolores de Grau onde se graben les actuaciones) y los cachinos d´obres de teatru tendrán de ser siempre n´asturianu. Per otru llau nun sé que pinta un cachu d´una obra de teatru nún magazín d´esti calter, sería meyor una entrevista a los autores, actores... entrellazada con escenes de la representación (nesta primer edición amás cargáronse la escena yá que paecía que se punxeran a grabar la obra ensin tener un guión pa saber qu´actor diba falar y enfocalu). A la fin l´audiencia faló y "Pieces" foi l´únicu programa n´asturianu que nun tuvo ésitu quedándose con un 1,8 % frente al 5% y el 10,2% de los otros dos programes. De xuru que Bande y Ámbitu fadríen perbonos programes si cada seición de "Pieces" se dixebrara y ampliara´l so horariu ( como "Camín de Cantares" ensin dir más lloñe) pero asina nun ye la formula correcha, el programa quiciabes debería centrarse nos reportaxes más ellaboraos, con voz en off, presentaciones y un montaxe más áxil sobre la cultura tradicional y la moderna que tien como llingua vehicular l´asturianu.
NÓSDireición y presentación; Prospero Morán
Fecha d´emisión; Sábados 12.45
Produición; Zebrastur
Quiciebes esti "Nós" ye de tolos, bono de los tres, programes n´asturianu´l meyor realizáu, con una prestosa cabecera y un montaxe áxil que fain que los diez minutos de duración del programa queden curtios. Nun soi a pescanciar el motivu pol que´l programa tien tán poca duración y nun algama polo menos los trenta minutos con más seiciones y con Prospero Morán como enllaz de los estremaos contenios. Foi increible que na primer emisión n´asturianu de la hestoria de la TPA y na primer edición de "Nós" tuviera presente un miembru del PSOE, como si foran los que más tán pol asturianu cuando son los que más ficieron pola so muerte. Nadie diz qu´esti rapaz del PSOE de Xixón nun pueda ser entrevistáu nel programa pero xusto nel primeru, un poquitín de dignidá....
Direición; Ramón Lluis Bande
Presentación; Ambás
Fecha d´emisión; Sábados 13.00
Produición; Ámbitu Audiovisual
Ensin dulda lo meyor de tola programación n´asturianu y atreveríame a dicir de tola TPA. Quiciabes como l´otru programa de Bande-y falta una voz en off o una presentación al entamu del programa que mos desplicara onde ta y con quién se va falar o una sobreimpresión d´un mapa d´Asturies pa ver la zona dialeutal na que mos asitiamos. Pero nun son más pa pequeñes cosines, simplemente ye un programa que-y da dignidá y asturianidá a una televisión como la TPA que tan falta anda d´ello.
Esbilla
del.icio.us
18 d´ochobre:
¡¡¡TOOS CON DIXEBRA!!!
