el trAsgU d´aRecEs

Cuando en 1983 entamó a emitir TV3, el primer canal de la televisión pública catalana, foron munchos los valencianos que se dieron cunta de la necesidá de que les sos emisiones algamaren el País Valencià, pero la llei yera nidia y prohibía qu´un canal autonómicu emitiese n´otra comunidá ensin un alcuerdu ente les dos alministraciones y más nidiu yera qu´el PP valencianu, col trabayu de dixebrar la comunidá llingüística catalana, nun diba permitir que la señal d´una televisión integramente en catalán y nes manes de CIU entrara nos televisores valencianos. Entós la xente enfotao na normalización de la so llingua nun quedo quieto y l´asociación Acció Cultural del País Valencià entamó a instalar repetidores per tola comunidá pa que los valencianos pudieren esfrutar d´un canal de televisión dafechu en catalán anque fora de xeitu allegal. Pasaron los años y creóse la Televisió Valenciana (si la de Tómbola...), Televisió de Catalunya tamién foi medrando, creó un segundu canal y foi asentándose ente los valencianos. Y agora, 25 años dempués, el gobiernu de la Generalitat valenciana decidió pesllar el repetidor de TV3 en Carrasqueta n´Alicante (que cubre tola provincia). El mesmu conseller de la Generalitat catalana Joan Manuel Treserras fizo un llamamientu pa evitar el pieslle pero nun hebo rempuesta del so homólogu valencianu Vicent Rambla. Tamién esta selmana´l xuzgáu de lo contenciosu-alministrativu númberu 2 de Valencia desautorizó al gobiernu valencianu a pesllar el reemisor yá que nun se trataba d´una televisión pirata sinón una emisora pública. Too esto nun echó p´atrás a la Generalitat que´l pasáu vienres mandó a un funcionariu del gobiernu y axentes de la Guarda Civil pa pesllar el reemisor, pero topáronse con dalgo que nun cuntaben; 300 persones arrodiando les instalaciones del repetidor como rempuesta a la convocatoria de Acció Cultural del País Valencià, el resultáu ye qu´inda los valencianos pueden esfrutar de la señal de TV3 n´analóxicu, anque´l voceru de la Generalitat, Vicent Rambla, yá acusó a los asistentes al actu, ente ellos persones de la cultura y la política valenciana, d´anarquismu. L´anécdota de la xornada púnxola ún de los Guardies Civiles que-y entrugó n´español al funcionariu de la Generalitat "¿Esto que estamos haciendo quiere decir que ya no veré más 'Ventdelplà?", que ye la serie de más ésitu de la televisión catalana.