el trAsgU d´aRecEs

Amás de sociólogu, direutor del Euskobarómetro y catedráticu de Ciencies Polítiques de la UPV, ente otres munchísimes coses, Francisco Llera Ramo ye asturianu y de Caravia. Ye tamién responsable de la estaya de sociollingüística de l´Academia de la Llingua y autor de les dos encuestes que, con diez años de diferencia, dieron la voz d´allarma sobre´l peligru de muerte de la llingua asturiana. Llera Ramo tamién dio-yos a los que como elli son defensores del asturianu´l mayor argumentu pa les sos vindicaciones; más del 60 % de los asturianos ta d´alcuerdu cola oficialidá.

A traviés de los dos estudios sociollingüísticos d´Asturies de 1991 y 2001 podemos ver ente ún y otru una pergrave perda na renovación de falantes, ¿Qué medies son les más urxentes qu´habríen de tomase pa finar col retrocesu xeneracional?
Pa entamar meyorar la presencia de la llingua na enseñanza, anque la voluntariedá nun ye una mala política l´asturianu ta d´un xeitu mui precariu nel curriculum d´enseñanza y habría que meyorar la forma en que tán reconocíos los enseñantes nel sistema educativu. Per otru llau habríen de desendolcase medies de dignificación del idioma a traviés de la inclusión de la llingua n´alministración y nos medios de comunicación, sobremanera nos públicos. Otra asignatura pendiente ye la Universidá, si tu nun autorices la formación d´enseñantes y les especialidaes n´asturianu nun pues esperar que la llingua avance na sociedá. Sería mui importante pa finar cola diglosia l´alfabetización d´adultos. N´Asturies sería mui fácil alfabetizar a los adultos y esto sería un importante pasu, nun yá solu pa meyorar conocimientu llingüísticu sinón pa que tean menos estigmatizaos pa usar la llingua y tresmiti-yla a les nueves xeneraciones. Toes estes medies, complementaes coles que yá se tán faciendo, nun supondríen un coste grande y seríen, sobre too, medies pa desendolcar nes ciudaes porque la población asturiana ye mayoritariamente urbana anque, eso si, con oríxenes nos pueblos de la rodiada de los núcleos urbanos.
¿Si nes sos encuestes pue vese nidiamente que los asturianos demanden la plena normalización del asturianu y opinen que´l gobiernu fai poco o nada pol idioma por qué siguen votando mayoritariamente a partíos que nun falen en dengún puntu de los sos programes eleutorales de política llingüística?
N´Asturies nun hai identificación ente la vindicación identitaria y un programa políticu concretu. Eso pa los nacionalistes y rexonalistes ye un handicap pero dende´l puntu de vista de la vindicación llingüística nun ye tán malu, supón que na sociedá nun hai posiciones polítiques contraries a la normalización y polo tanto pue haber un futuru de consensu. La mayor intensidá de la demanda, llóxicamente, vien de los sectores nacionalistes pero nun pasa como n´otros llugares onde la llingua ye patrimoniu de los nacionalistes y un banderín d´enganche de les sos vindicaciones. El nacionalismu asturianu ye vanguardia de la demanda d´oficialidá pero nun monopoliza esta vindicación. Ye nidio que n´Asturies la xente nun vota pensando na llingua o na identidá, anque nel futuru la cosa podría camudar; si hai una frustración pola cuestión llingüística la cosa pue camudar.
Vusté ye militante del PSE pero siempre s´amosó críticu cola FSA ¿Qué diferencia hai ente ún y otru partíu y como sociólogu a que causes albidra que son debíes?
Les mios critiques cola FSA son fundamentalmente pola cuestión identitaria. Ye mui fácil comparar cualesquier posición del PSE, que nun ye un partíu nacionalista nin muncho menos, en cuestiones llingüístiques cola posición de la FSA. La diferencia ye abismal. Nun ye llóxicu que, por exemplu, el PSOE sofite l´estatutu catalán demientres mantien n´Asturies unes posiciones nes cuestiones identitaries que nun lleguen nin a los mínimos de la "España plural" del programa del PSOE. Cuando´l secretariu de la FSA, Javier Fernandez, diz que son contrarios a la imposición quier engañanos porque naide quier imponer nada, la oficialidá namás que supón obligatoriedá pa les alministraciones que tienen que cumplir unos mínimos de política llingüística. Ye mui ofensivu porque tamos falando d´un problema de drechos fundamentales.
Tamién choca un poco la so defensa a ultranza del asturianu demientres critica la política llingüística del gobiernu vascu cuando l´euskera ye una de les poques llingües minoritaries que va ganando camín añu tres añu.
Yo nun criticó la política llingüística del gobiernu vascu, criticó determinaes actitúes de la so política llingüística. Paezme qu´hai una instrumentalización y un negociu de la llingua ensin qu'haya unos resultaos granibles más allá de los políticos. Cuando yo taba na dirección del PSE y siendo responsable de la Conseyería d´Educación Fernando Buesa aprobamos por consensu un pautu escolar y la política llingüística, pero la implementación d´esi pautu escolar y d´esa política llingüística fízola Eusko Alkartasuna con un mapa escolar que nun se correspuende cola filosofía de consensu que nún entamu se diseñó. La llingua nun pue ser patrimoniu de dengún partíu políticu, tien que mantenese nuna política de consensu y l´aplicación de la política llingüística y del mapa escolar nel País Vascu nes dos últimes llexislatures frayó col consensu inicial. Esto ye un error. Nel casu del euskera ún de los drames ye que la llingua avanza nel porcentaxe de falantes potenciales pol sistema educativu pero nun avanza nel usu del idioma na cai. Esti ye´l gran fracasu de la política llingüística vasca, nun se llogró convencer a la xente de que merez la pena falar n´euskera, ye meyor dir selemente y mantener el consensu p´algamar unos resultaos más axustaos y que nun segmenten a la sociedá
Ye nidiu que la realidá sociopolítica d´Euskadi ye mui estremada de la d´Asturies, ¿pero no que cinca a la estaya sociollingüística podemos topar semeyances y modelos a siguir?
Cada casu n´España ye distintu. Si qu´habría coses que se podríen tomar d´otros modelos, el casu del catalán en Valencia y nes Baleares por exemplu, pero hai una diferencia fundamental; nun se pue comparar el casu del asturianu col d´una llingua non romance como ye l´euskera. La realidá sociollingüística asturiana sería más asemeyada al casu navarru, onde nun hai una posición ideolóxica dominante col euskera como pasa nel País Vascu pero si hai una posición receptiva haza la llingua. Por exemplu la situación del euskera en Navarra ye más minoritaria que la del asturianu dende´l puntu de vista de los falantes potenciales
El gobiernu tardo años en espublizar la so primer encuesta, la segunda tevo qu´enfotase nella l´ALLA al desentendese´l Principáu. Fai dalgo más d´un añu la Conseyera de Cultura, Ana Rosa Migoya, ñegaba la validez de los sos estudios sociollingüísticos afitando que los datos de la encuesta dependíen de los items escoyíos. ¿A qué puen ser debíes estes actitues del gobiernu asturianu de ñegar daqué que, según amuesen les sos encuestes, ye demandao pol pueblu asturiano y que de nun facese podríen llevar a la muerte del asturianu en dos xeneraciones?
Ye por prexuicios, reconocen la esistencia del asturianu pero dempués nun obren en consecuencia. Si nun creen nel futuru del asturianu o na so equiparación con cualesquier llingua minoritaria que nun lo reconozan. Lo meten nel estatutu, na educación y tienes una política llingüística pero dempués intentes ñegalo. Ye una cosa mui estraña ya esquizofrénica onde val too, hasta desautorizar items que foron aprobaos pol anterior Conseyeru de Cultura, Vallina, que son aplicaos en toles encuestes llingüístiques d´España y que son coherentes. Téunicamente nun pueo responder a la Conseyera, que diga que nun-y importen los resultaos, que nun-yos va facer casu o que nun-y presten pero que nun se meta en temes que nun son llabor de so.
Vusté ye miembru del Observatoriu de política llingüística. Fai yá dos años falaba en nome de l´Observatoriu na Xunta Xeneral y felicitábase pola aprobación del primer plan de normalización social del asturianu considerándolu un pasu alantre, ¿güei, dos años dempués, sigui teniendo la mesma consideración sobre´l plan?
Sí, el fechu de qu´esista´l plan y haya, por axustada que seya, una planificación llingüística aprobada por consensu de toles fuercies polítiques ye un avance perimportante. Fai poco presentamos un informe onde por supuesto mos amosábamos críticos y dicíamos los puntos que tovía tán ensin desendolcar, ye un ritmu insoportable pa la xente que queremos más pero polo menos hai dalgunos avances. El plan siempre va quedase curtiu porque falta´l paragües fundamental de la oficialidá, pero pue sirvir p´avanzar haza esi camín y bienllegáu seya.
¿Y qué opinión tien del llabor desendolcao por Ramón d´Andrés nesta llexislatura que ta a puntu de finar?
Positiva dafechu. Ramón d´Andrés ye una persona comprometida cola llingua d´Asturies, nada duldosa de que nun te pola oficialidá lo más ceo posible. Ye una persona que necesita reconocimientu y sofitu, a vegaes de quien menos lo tien ye de quien más lo necesitaba. Yo sé tolo que llucha y aguanta, otra cosa ye lo que-y dexen facer, pero gracies al so llabor consiguiéronse avances como foi la propia aprobación del plan.
El gobiernu que va formase dempués de les eleiciones del 27 mayu va encarar el procesu de reforma del estatutu, ¿tien enfotu en que d´una vez por toes tolos asturianos tengan los mesmos drechos llingüísticos?
Nun soi nada optimista a la vista de les declaraciones de los partíos mayoritarios, pero too pue camudar. La propia reforma del estatutu ta bloquiada´l nun haber consensu ente los dos grandes partíos, pero too va depender de la correllación de fuercies polítiques, del trabayu de vindicación que se ta desendolcando o de la mesma contribución de Ramón d´Andrés pa buscar un consensu y unos plazos, un sistema que permita mecanismos d´oficialidá más allá del estatutu. Falta ver si va haber voluntá pa que los escayos colos que topamos hasta agora vaigan desaniciándose. Nun soi nada optimista pero a pesar de too tengo esperanza, sinón nun siguiría na llucha y hai que siguir intentando convencer a los que tán a la escontra porque a la fin namás que va ser el PSOE y el PP los que lo van decidir, tien qu´haber un alcuerdu y ensin dulda ye meyor un consensu de mínimos, dende´l puntu de vista de los conteníos, qu´una mayoría de máximos que nun va a denguna parte y que nun se va poder implementar. Yo creó que dalgún avance va haber, lo que nun podemos facer ye tirar la toballa.
¿Ante´l mieu de los partíos mayoritarios a la pallabra oficialidá podríamos algamar un modelu propiu de normalización llingüística con resultaos granibles ensin reconocer esplícitamente la oficialidá nel estatutu?
La clave ta n´alcontrar una formula onde a traviés d´un consensu na Xunta Xeneral puea declarase la oficialidá de facto. Tien que ser una formula dinámica, porque ye nidio qu´una formula zarrada n´Asturies nun tien salida, na que nun teamos amarraos a la lletra del estatutu y que mos permita que tolo que se vaiga xenerando na sociedá a traviés de les polítiques llingüístiques nun quede parao pola falta d´oficialidá. Anguaño nun paez viable poner nel estatutu la oficialidá, pero nun ponelu nun quier dicir que nun se puea siguir avanzando y abriendo´l camín a la equiparación llingüística per otros caminos.
Ayeri foi´l día de les lletres ¿Camienta qu´esti día y la Selmana de les lletres en xeneral ayuden a llevar l´asturianu a la cai?
Ye una iniciativa mui positiva que visibiliza la llingua y los avances na creación lliteraria. Tolos programes de popularización y los que se faen nes escueles son perimportantes porque-y quitan folclorismu y dignifiquen la llingua faciéndola protagonista
La otra llingua nun reconocida del estáu, l´aragonés, tamién foi materia del so estudiu a traviés d´un encargu del Gobiernu d´Aragón nel 2000. Sicasí l´estudiu ta tovía ensin espublizar. ¿Podría adelantanos daqué o los motivos de la non espublización?
La situación ye mui estremada, esti estudiu llindábase a l´Altu Aragón con una comunidá de falantes pequeñísimo y con una situación muncho más precaria. Sicasí con una predisposición política, polo menos n´aquel momentu, de los partíos de les Cortes d´Aragón muncho más favoratible a una llei de normalización y al reconocimientu de les variantes llingüístiques, nun podemos escaecer que n´Aragón ta reconocíu´l catalán, lo que ye daqué atípicu. Tamién ye verdá qu´anguaño la vindicación nun se centra tanto nel Altu Aragón sinón na propia Zaragoza. De lo que nun pueo falar ye de la non espublización de la encuesta, eso son coses normales na política y yo nun pueo entrar. El primer estudiu sociollingüísticu d´Asturies de 1991 tevo que ser desenterráu por Amelia Valcarcel y hai otru anterior nel qu´estudiábamos los 18 conceyos más occidentales d´Asturies, los de contautu ente l´asturianu y el gallegu, y esi tovía nun foi asoleyáu. Hai munches maneres de dar a conocer estos documentos, nun solu cola so espublización, val con que tengan accesu los investigadores pa ver los resultaos yá que ye una inversión que ta fecha, pero nun pueo entrar nos motivos.
Vusté ye una persona amenazada por ETA, ¿qué opinión tien del procesu de diálogu qu´a la fin nun arribó a un bon puertu y del futuru que se presenta pa la fin del nomáu conflictu vascu?
Nun soi nada optimista colo que vien sucediendo nos dos últimos años. La violencia nel País Vascu ta en fase terminal pero l´odiu qu´esto xeneró va ser difícil de desterrar. Esta violencia ta mui arraigonada na subcultura y asina ye mui difícil facer avanzar una sociedá y normalizala. Ye mui paradóxicu qu´una sociedá que tien les cotes d´autogobiernu más altes del mundu occidental viva una situación como esta heredada del sieglu XIX. El País Vascu yera la patria del tradicionalismu, esto contrasta con Asturies que yera la patria del lliberalismu y vanguardia de la modernidá n´España colos lliberales primeru y los revolucionarios dempués. N´Euskadi foron primeru los carlistes y dempués los nacionalistes, dengún d´ellos ye modernizador y democratizador; son excluyentes. Por riba los violentos, ye una cosa mui estraña. Pa llegar a la situación d´anguaño hai que mirar al pasáu, tien qu´haber un raigañu enfermu y ye la resistencia a la modernidá. Esta sociedá siendo una sociedá industrial enxamás acepto les regles de la industralización, fizo negociu con ella pero nun acepto les sos regles. N´Asturies foi distintu, ficimos negociu cola industralización y aceptamos, pa bien y pa mal, les sos regles.