el trAsgU d´aRecEs

Lleía fai tiempu una entrevista a Xune Elipe en Les Noticies onde dicía que la música yera la única estaya de la sociedá onde l´asturianu yera oficial. Razones nun-y falten; güei podemos escuchar abondos xeneros músicales n´asturianu, hai calidá y cantidá, los nuestros grupos salen fuera, la SGAE reconoz la esistencia de la nuesa llingua nos sos premios añales y la nuesa música, poquiñín a poquíñín, va asitiándose nún bon llugar nes estanteries de les tiendes de música y de les grandes superficies. Y paez que la cosa nun va dexar de medrar, el branu entama fuerte cola espublización de dos nuevos discos qu´amuesen el futuru y el presente de la nuesa música. Per un llau´l rock ástur de Skama la Rede y per otru la nueva tonada d´Anabel Santiago, dos discos que namás tornar del esiliu vascu y de la llerza d´esti mes de esámenes fairé de mio.

El branu músical ástur entama calecio y ye mui llargo; nueches celtes, conciertos, l´intercélticu d´Avilés, l´homenax a Felpeyu... Abondes feches onde de xuru mos atoparemos al llau d´una caxa de sidres. Ye una pena que como siempre los políticos, y una TPA onde la música que s´espresa n´asturianu ye invisible, nun tán al altor de la sociedá y faen que celebraciones emblemátiques, como ye´l casu de la nueche de San Xuan de Tresona, puean llegar a desaniciase pola so penosa xestión.

Habrá que siguir sofitando la nuesa música, mercando discos y puxando por un branu onde los cantares ensin xacíu y con estribillos machacones nun mos faigan escaecer qu´equí hai una pequeña industria músical qu´añu tres añu y pasín a pasu va poniendo banda sonora a esti pequeñu país del sur d´Europa.