el trAsgU d´aRecEs

Vamos sabiendo más coses del primer discu de Xune ensin Dixebra. A la fin paez que nun ye´l so primer discu en solitariu sinón qu´elli, xunto al otru dixebriegu Sergio Rodríguez, ye l´impulsor d´un proyeutu músical d´amestu ente los soníos xamaicaos y otres influencies como´l punk, ska o´l jazz na que va ser la primer banda de sones mestizos ástur. Baxo´l nome de Soncai System (en referencia a los "sound system" xamaicanos o discoteques móviles) esti nuevu grupu quier llevar la nuesa llingua onde musicalmente nunca tuviera, asina los sones más urbanos van dir de la mano del asturianu pa falanos de racismu, inmigración, violencia, d´Asturies y del mundu, d´esperances y desilusiones.

El discu va caracterizase por ser un proyeutu d´estudiu y pola participación de munchos músicos asturianos, ente ellos Dark la eMe que va estrenase cantando n´asturianu. Esti gran númberu de participantes y la so concepción como discu d´estudiu fai que seya difícil llevalu al direutu, anque esperen poder presentalu en dalguna de les ciudaes asturianes.

Según paez nun va haber gaita pero la llingua va ser el so vehículu d´espresión dafechu asturianu y una de les protagonistes, asina va haber amestos ente asturianu ya inglés en temes como "Speaking to my güela" o´l mesmu cantar que va dar entamu al discu: "Cantar d´amor pa una llingua n´estinción", tamién va haber una versión del tema "Rock the casbah" del míticu grupu The Clash. Xandru Fernández, xenial escritor y xenial lletrista de Dixebra, va ser un de los principales lletristes d´esti discu, que va entitulase "Clashasturies" y que podía tar na cai pa la seronda.