el trAsgU d´aRecEs

Dixebra punxo la semiente y l´árbol del rock astur ya ta dando abondos frutos; La Tarrancha, Skontra o los yá desaparecidos Avientu son bones amueses. A los que mos presta esti xéneru, que paez que daveres yá espoxigó, vamos tener qu´entamar a aforrar, dexar el tábacu o dir a cerveces en llugar de cacharros los sábados sería un bon xeitu, porque la música asturiana paez que nun va aparar d´aportar a les nueses oreyes. Sal n´abondos medios que yá na cai Soncai System y que pa payares vamos tener nes tiendes el discu d´homenax a Dixebra (n´Avilés como siempre tendremos qu´esperar un par de selmanes más, nun quiero pensar cuanto tendrán qu´esperar n´A Veiga o en Llanes), ¿quién va poder quedar ensin ellos?, hai qu´aforrar. El que yá tengo nes mios manes, y yá abondo escucháu, ye l´últimu de Skama la Rede; Echaos a la mar. Una xoya.

Había ganes dempués del ésitu del primeru ver per onde diben tirar el grupu de rock del Cabu Peñes y la realidá ye, que polo menos a min, nun me defraudaron. Les lletres son muncho meyores y más curiaes y eso agradécese nun grupu que quier falar de la realidá social d´un país y petar na conciencia social del que ta escuchándolos. Hai cantares como “El cantar de la banda”, "Odio al presidente", “Villaska”, o la que pa min ye la meyor de tol discu “Llationamérica”, que ca vegada que les escuches vante prestando más y más. Si dalgún día, nun lu quiera Dios, Dixebra quier retirase puen quedar tranquilos: Skama la Rede va siguir ehí poniendo-y voz a un país qu´enxamás va dexar de glayar al traviés de la música pola so dignidá.

Muerre´l silenciu cola canción.
Acordes fréneticos marquen el compás.
Suanen palabres que daquién escribió.
Ruíu, pal que lo quiera baillar.

Suaña´l silenciu cola intención
de desfacer idegues, de tornar p´atrás.
Suaña´l silenciu cola razón
que nun va consiguir enxamás.

La música nun va aparar.
Siempre va quedar protestar.

Muerre la palabra al terminar
histories que falen de revolución.
Desfáise la idega al acolumbrar
intereses ayenos a la tradición.

Suaña la palabra con conquistar
batalles qu´un día daquién escaeció.
Suaña la palabra con aquel cantar
Que caltién encesa la vida y l´acción.

La música nun va aparar.
Siempre va quedar protestar.