el trAsgU d´aRecEs

Anguaño nun ye difícil atopar nel YOUTUBE un bon garapiellu de vidios onde la música asturiana ye la protagonista: dende Dixebra a Llan de Cubel, dende K-Nalón a Corquiéu pasando per Felpeyu y ensin escaecer lo más nuevu de Soncai System. Pero no que cinca a la tonada ye bien distintu, intentar ver un vidiu de la nuesa canción nacional na páxina de vidios ye cuasi imposible, poco más que dos vidios de “El Presi” y trés d´Anabel Santiago. La Caunedo y Liliana Castañón nin aparecen, tampoco la gran Diamantina Rodríguez, la gran voz de la tonada asturiana camienta ún que nun ye nada entendíu nestos llares. Otro cantar, nunca meyor dicho, dase cuando un busca a Amalia Rodrígues, la gran voz del fado portugués, y atopa una bona montonera de vidios, actuaciones na RTP dende los años 60 hasta mesmo´l so funeral fai dalgunos años tresmitíu en direutu pola televisión nacional portuguesa, debe ser lo que tien ser d´un país normal onde les coses faense con xacíu y lo propiu tien un llugar acutao na memoria colectiva del país. Lo mesmo podíamos dicir de María del Mar Bonet nos Països Catalans pa poner un exemplu de música tradicional con voz d muyer nuna nación ensin estáu.

Quiciabes los medios públicos asturianos (tamién los privaos) tienen muncho que facer en cuantes a promoción de la nuesa canción nacional –un de los motivos de la non esistencia de tonada nel YOUTUBE ye la non esistencia d´actuaciones d´asturianá na TPA-. Liliana Castañón y sobre manera Anabel Santiago tan tirando por un camín que de xuru va dar unos bonos frutos. Ellas abrieron esi camín de modernidá y taría bien que na RTPA tamién hubiera interés por abrir nueves siendes pa la tonada y esta tuviere más espaciu del que yá esiste nos medios públicos (llindao al tiempu que-y dedica Mael Arias nel “Música, músiques” y a la seición “Voces” nel programa “Pieces”). Tamién taría bien que la radio o la televisión pública tresmitiera los concursos de tonada que se faen pel país como yá lleva faciendo va tiempu Tele Oviedo con una perbona audiencia col concursu de folklore “Ciudá d´Uviéu”. Otru bon xeitu sería que la TPA empobinara´l so propiu concursu de tonada, un concursu modernu onde la renovación fora un de los principales exes lloñe de purismos que faen que ca día´l públicu d´estos concursos tea más avieyao. Una especie d´OT, salvando les distancies, 100% ástur onde´l ganaor tuviere como premiu grabar un discu nuna discográfica asturiana, hai ta la productora Ámbitu cola so filial L´Aguañaz. Coses que faigan que la nuesa canción nacional entame a ser daqué normal ente los asturianos. Ta na mano de los medios de comunicación camudar l´estáu de les coses y tirar per un camín yá abiertu. Nun pue ser qu´anguaño pa un asturianu seya lo más normal del mundu sentir un cantar d´aires aflamencaos y sienta como daqué que-y ye estrañu una tonada.

ACTUALIZACIÓN; La TPA va emitir esti sábadu a les 12.30 dende Mieres la Gala d´entrega de los galardones de tonada "Memorial Silvino Argüelles", paez que mos fixeron casu. Ye un pasu importante anque suponemos que como les coses enxamás puen ser perfeutes, a lo menos n´Asturies, la tresmisión faeráse en castellán a pesiar de que tolos cantares, como nun podría ser d´otru xeitu, serán n´asturianu.