el trAsgU d´aRecEs

Dempués de la Revolución de los Claveles y la llegada de la democracia a Portugal el fado entamó a cayer nel escaezu. De neñu mimáu de la dictadura y másimu espectáculu turísticu del país pasó a ser refugáu poles nueves xeneraciones de portugueses que camentaben que taba arreyáu a la dictadura de Salazar. Pa la mocedá´l cantar nacional portugués yera daqué que trayía l´arume del facismu, llegóse a dicir que´l fado namás que yera un inventu de Salazar, la mesma Amália Rodriguez foi acusada de collaborar cola dictadura al llegar los tiempos de llibertá. Poco dempués de la so muerte descubrióse que con quien collaborara fora col Partíu Comunista económicamente y na clandestinidá.

La tonada asturiana, tresmitida de xeneración en xeneración nos chigres y nes fiestes de prau, entamó a cayer nel escaezu por mor de les lleis que nun dexaben cantar nos bares y por una falta d´anovación dende mediaos del sieglu. Les voces de los nomaos clásicos yeren tan poderoses y algamaren tanta sonadía qu´a partires de Cuchichi, El Presi o La Busdonga namás que s´interpretaben los vieyos cantares qu´ellos grabaren fai décades, nun s´anovaba col xeitu de cantar y nun se facíen lletres nueves. La xente mozo d´Asturies, urbana na so mayoría anque con raigaños nel rural, dexó de llau un cantar que falaba de vaques y praos, d´amores de romería y que siguía interpretándose del mesmu xeitu qu´a la metá del siegu XX.

Amália Rodrigues foi siempre la gran dama del fado. Ñació nel barriu lisboeta de Beira Baixa en 1920 y debutó nel añu 1939 nel Retiro da Severa, ún de los llocales de más renome en cuantes a música popular. Amália fizo más de 170 grabaciones y llegó a cantar en Moscu, París y Nueva York, los más grandes escritores portugueses escribieron lletres pa ser interpretaes por ella y anguaño los sos cantares formen parte del reperteriu de les nueves voces fadistes y tamién de la memoria de los portugueses. Cuando morrió nel añu 1999 Portugal conmovióse y celebró un multitudinariu funeral d´estáu.

Obdulia Alvarez, “La Busdonga”, foi la primera muyer n´atrévese a salir de la cocina pa cantar tonada en grandes teatros y soltar tolo que podía sentir dientro d´ella. Foi´l modelu a siguir poles interpretes femenines que tovía anguaño interpreten cantares “al mou de La Busdonga”. Si en cuantes al tronu en tonada masculina nun hai un consensu naide dulda en dicir que La Busdonga ye la gran reina de la tonada. Ñació n´Uviéu en 1896 y a los pocos años la so familia treslladóse a vivir a Mieres, onden monten un chigre y Obdulia entama a cantar. Foi quien a xuntar la tonada col pianu y averar la nuesa tradición cola canción lírica. “La Busdonga” morrió en Xixón en 1960.

A pesiar de que la mocedá nun conectaba col fado ésti yera´l cantar nacional del país y siempre tevo presente na vida de los portugueses. Asina les fadistes Dulce Pontes o Mísia llegaron a convertise en grandes estrelles en Portugal, vendiendo los sos discos y dando actuaciones per mediu mundu, foron anovando la música popular del país con nueves lletres y nuevos sones siempre teniendo como puntu de partida´l fado y como gran referente a la gran Amália Rodrigues, re-interpretando delles de les sos canciones y amosando que´l fado tamién podía ser comercial y arrasar nes llistes de venta. El fado nun corría peligru de morrer pero había mui poca xente mozo a quien-y prestara´l cantar tradicional del país, con temes murnios, señaldosos y pequeñes hestories de los barrios humildes de Lisboa y Coimbra, los ñeros del fado.

A partires de la metá del sieglu la tonada quedó llantada colos mesmos esquemes, los mesmos cantares y el mesmu xeitu de interpretar, asina l´asturianá foi quedando aisllada nos concursos de tonada y nos programes radiofónicos de la hora de la siesta. Tuvieron que llegar los últimos años de la dictadura pa que dende “Amigos del Bable”, asociación trubiecu de la vindicación llingüística y cultural del país, desendolcara una llabor de revitalización de les tradiciones asturianes onde la tonada yera una de les protagonistes. Un de los impulsores d´esta asociación foi l´escritor Llorienzu Novo Mier qu´entama a escribir lletres de tonada y desendolcar una importante llabor pola canción asturiana, al empar que lu fai pola llingua d´Asturies. Nesta domina surde´l “Nueu cancíu astur” onde la tonada y les composiciones recoyíes por Torner son la bas pa facer una nueva música asturiana, asina Nuberu cola voz de Chus Pedro entama dempués de munchos años a anovar la tonada. Años dempués Mari Luz Cristobal Caunedo espubliza “Onde la ñublina posa” y marca un antes y un dempués na tonada, llegando a actuar en París nel gran conciertu de San Patriciu o nel festival de Lorient delantre de cientos de miles de persones. Asina sigui´l camín qu´abrieron muyeres como La Busdonga o Diamantina Rodriguez, que con unes lletres onde fala d´una muyer arguyosa de selo llega a actuar per munchos países d´Europa y ye mayestra de les nueves voces de la tonada femenina destinaes a renovar la canción popular d´Asturies.

Faltaba una voz que sirviera de conexón ente´l fado y la mocedá, una voz qu´ensin dexar de llau les bases del fado averara esi xéneru a les nueves xeneraciones. Acaba de morrer Amália Rodrigues y per too Portugal socedíanse los homenaxes n´honor de la “rainha”. Entós apaez Mariza, una mozambiqueña criada del barriu de Mouraria, gran ñeru del fado lisboeta. Mariza, como munchos mozos portugueses de la so edá refugaba´l fado y camentaba que yera daqué propiu de la dictadura. Pero foi a vivir unos años a Brasil y la xente que conocía la so gran voz pedíen-y que cantara canción portuguesa, entós diose cuenta de que´l fado yera una amuesa perimportante de la so cultura y entama a cantar les canciones coles que medrara. Asoleya en 2001 “Fado em min” convirtiéndose en tou un ésito nel so país y llegando al cuádruple platinu, dempués llegaría “Fado curvo” en 2003 dando-y un ésitu internacional y “Transarente”, doble platinu en Portugal y algamando´l númberu ún de les llistes d´ésitu. Mariza garró les pallabres de los meyores poetes de la so tierra y sobre la bas del fado fai amestos con sones como´l jazz, el gospel o les músiques brasileñes. La so fama nun dexa de medrar y actua nel conciertu mundial “Live 8”, nel Royal Albert Hall de Londres, nel Central Park de Nueva York, nel Festival Woman, na Opera de Sydney, ye considerada pola BBC como la meyor artista europea y nel 2004, añu olímpicu, interpreta xunto a Sting nel álbum oficial de los xuegos el tema “A thousand years”. Miles de mozos merquen los sos discos y siéntense arguyosos de la so canción nacional y de que cantantes de fado como Mariza o Dulce Pontes suenen per tol mundu na so llingua y cola so tradición.

N´Asturies nos 90 la tonada siguía arreyada a lo vieyu y lo rural, con abondos concursos onde tovía anguaño´l públicu nun baxa de los 60. Nesos años una neña ñacída n´Arxentina en 1981 gana con 13 años el concursu de tonada “Ciudá d´Uviéu”, vuélvelo a ganar los trés años siguientes y el conceyu concede-y una cai nel barriu de La Corredoria, cosa que namás suel facese a los grandes cantantes de tonada a títulu póstumu. Yera Anabel Santiago y nos años siguientes sigui ganando concursos ensin aparar. Entós llega´l 2000 y col nuevu mileniu´l grupu más nomáu del rock astur, Dixebra, decide facer daqué enxamás fecho hasta la dómina; xuntar tonada con rock. L´esperimentu foi un ésitu y el cantar convirtióse nún de los más conocíos del grupu, asina qu´añu dempués Anabel graba´l so primer trabayu, “Tierra de sueños”, anque en clave tradicional: a voz y gaita. Llega´l 2003 y produzse´l primer gran cambeu de la tonada cuando Xune Elipe propón-y a Anabel facer un discu de tonada pero anovando en tolos sentíos, lletres nueves, melodíes y estétiques. En “Al son de la lluna” collaboren escritores asturianos del momentu y los meyores músicos del país, adapten canciones populares y faen amestos de tonada con otros estilos, la cantante avisa nes entrevistes de promoción que quier ser conocida como “la cantante de tonada innovadora”. Nesi mesmu añu Liliana Castañón saca a la cai “Nel café de la esquina”, un discu que tamién tien como puntu de partida l´anovación. Nesa domina Anabel conoz al americanu afincáu n´Asturies Michael Lee Wolfe col qu´entama una collaboración que llega hasta güei. Mientres, ella partipa en bien de proyeutos musicales como “Torner” y fai collaboraciones con otros grupos. Nel 2005 graba “Anabel Santiago canta a Diamantina Rodriguez”, dedicáu a la so mayestra y primer discu de la cantante que llega a tol territoriu español. El discu suena en bien de radios especializaes de tol Estáu, los conciertos socédense y les bones crítiques lleguen de toa Europa. Agora Anabel ta acabantes d´espublizar “Desnuda” un discu onde va muncho más allá de la tonada amestando´l xeneru con soníos como´l country o´l flamencu, inclús el fado, un discu qu´amuesa que la tonada tien futuru y que la renovación ye´l camín a siguir. Sicasí, Asturies ye como ye y equí nun podemos falar de superventes d´actuaciones en Londres o Nueva York, pero too ta por ver.