La voz de la tierra mudo III: Tonada dixebriega
Al pasar per el puertu, puertu
Payares,
m´alcontré con un vieyu llindiando
vaques.
Yo como yera vieyu-y pregunté:
-Si quier dormir la siesta yo
llindiaré.
El vieyu mui ufanu me contestó:
-Les vaques de la mio casa
llíndioles yo.
“Al pasar per el puertu” ye una de les tonaes más conocíes y una de les más difíciles d´interpretar, una prueba pa midir la calidá del cantaor nos concursos. Pensareis munchos qu´una lletra de praos y vaques como la mayoría de les de tonada. Sicasí´l nuesu cantar nacional siempre sirvió de crítica social y de glayíu escontra les inxusticies de les clases altes haza les clases baxes ( Yo soi quien cuida la oveya,/ quien escarmena la llama,/ pa facer bonos colchones,/ mientres yo duermo na paya./ ¡Y viva´l pastor!) y esta va muncho más alló de la crítica social y, anque nun lo paeza, un cantu al autogobiernu de los asturianos. José Benito Álvarez-Buylla, un de los mayores estudiosos de la tonada, analiza la lletra del cantar que da entamu a esti post y desplica´l so sentíu:
“Si nun significare más de lo que se diz lliteralmente, la hestoria nun meritaría contase. Nun se trata de refugar l´actitú del vieyu; al contrario, el so comportamientu califícase de ufanu, ayenu a connotaciones peyoratives (...) La clave afáyase na vibrante proclamación final del vieyu: Les vaques de mio casa llíndioles yo. La popularidá y fuerte afección sentida pol pueblu asturianu pa con esta canción vien, ensin dulda, d´esta afirmación solemne y rabiosa de la individualidá y la propiedá insobornable de la propia intimidá que l´asturianu siente. Sospechamos entós que la solicitú de la moza escuende un engañosu intentu d´apoderase de la nuestra personalidá y el nuestru destín (...) Cola so firme actitú, el vieyu resume la esencia del más fondu rexonalismu vital d´Asturies cola proclama taxante de la so autonomía: Les vaques de mio casa llíndioles yo.”
Enantes de Nuberu yá había quién cantara pa llibranos de Castiella, tonada dixebriega 100%.
Esbilla
del.icio.us
18 d´ochobre:
¡¡¡TOOS CON DIXEBRA!!!
Mui buenes, nunca nun escribiera equí, pero ta mui guapu esti blog.
Esti cantar ye sin dulda una de les mis tonaes preferíes, la lletra prestóme siempre muncho, pero nunca nun parara a pensar nella, p'amidea que el mio subconsciente sí.
Y falando de lletres con sentíu ocultu: Soi yo l'unicu que ve na lletra del nuesu himnu una apoloxía de amor a la llibertá y del nun metese nes coses de los demás, la flor si quier ponela nel balcón que la ponga, y si non que la dexe de poner.
Franquino | 20-09-2007 - 17:39:11 GMT 2 #
Gracies por escribir y allégrome de que te preste´l blog. Yo conocía de fai tiempu esa tonada pero nunca me decatara del so doble sentíu hasta nun lleer el llibru d´Ámbitu "Diccionariu de la tonada", espluzáu fai a esgaya d´años yá y que recuperé de la mio biblioteca cola sida de facer estos artículos sobre la tonada. Parecióme interesante cuntalo equí, ye importante que la xente entame a ver que la nuesa tonada ye más qu´un cantar de chigre.
Del nuesu himnu rexonal, nun me presta dicir nacional a esi cantar d´indianos que namás que yera l´himu de les piragües nun-y busques dobles sentíos. Que fale d´Asturies como una patria ya ye daqué, el restu la lletra una llacedia.
Un saludu y espero que t´animes a escribir más.
trasgu | 20-09-2007 - 22:35:59 GMT 2 #
Esa opinión ye bastante xeneral, pero yo doi-y al nuesu himnu una importancia que cuido que nun tiene nengún otru nel mundu:
1- A lo meyor nun cuadra colo que d'avezu ye un himnu nacional, pero ensin dulda ye un himnu popular, el fechu de que tola población del país lu conoza ye daqué infrecuente.
2- Ye un cantar que cumple la función de xunificar a toos los habitaantes, sacante dalgunos nacionalistas políticos, nun conozo a naide, seya de la ideoloxía que seya, que nun-y preste.
3- Al contrariu de lo que dicen munchos cuido que sí fala d'Asturies y los asturianos, precisamente por ser un cantar d'indianos, que cuando se ta fuera ye cuando esti patriotismu natural de los asturianos (babayismo dicen otros) sal a la lluz: Les primeres estrofes son apoloxía del amor a la tierra, mientres que les últimes, que aparentemente nun tienen sentíu, a min son les que más me presten. Una forastera fue la que me fizo ver lo asturianísimu que yera esi comportamientu de: "failu o dexa de facelu, como te pete, problema tuyu".
4- Por último una anécdota: Paezme que la capital d'Asturies será l'única capital del mndu onde l'himnu del país suena cada hora.
Pero bono, más allá d'esta obsesión mía, felicítote de nuevo polos artículos acerca la tonada.
Franquino | 21-09-2007 - 21:22:32 GMT 2 #
La verdá que ye prestosu lo que dices al final de que n´Uviéu, la capital del país, l´himnu suena ca hora. Sobre temes como esti del himnu tien escritu abondo Ismael García Arias na so crónica de Les Noticies sobre la música asturiana y tengo lleido bien de vegaes que hasta la llegada de l´autonomía l´himnu aceptáu polos asturianos como tal, a lo menos que podría interpretase asina, ye´l cantar "Ai un galán d´esta villa".
Nos tiempos de la preatonomía aceptábase esti cantar como himnu, pero foron abondes les voces que pidien que polo menos cambiaren la lletra pa facela un poco más "d´himnu". Según lleí en dalgún llau al presidente del Conseyu Rexonal, organu preautonómicu, Rafael Fernández prestaba-y muncho esti cantar, el tuviera nel esiliu llatinoamericanu, y ye un de los motivos polos que foi afitáu como himnu nel Estatutu.
Un saludu.
trasgu | 22-09-2007 - 17:27:59 GMT 2 #
La verdá ye que yo, que viví tola vida n'Uviéu, nun cayera neso hasta que me lo fizo ver, como non, una forastera que, dempués de vivir en dellos puntos d'España, ente ellos Catalunya o Euskadi, dicíame que los asturianos yéremos los más patriotas con diferencia, y poníame eso como exemplu. Y la verdá ye que hasta repuna un poco de patrótico XD
Franqino | 22-09-2007 - 19:16:04 GMT 2 #
Yo diérame cuenta fai unos añinos, cuatro a lo sumo, que taba per Uviéu y de sutrucu entamó a sentir l´Asturies, patria querida. Tamién ta la nuesa bandera, qu´hai que dicilo, ye de tol pueblu asturianu y querida por tol pueblu, dende´l inependentismu hasta la drecha española, ¿onde se vio a tanta xente cola bandera nel coche?.
Un poquitín d´hestoria de la nuesa bandera;
http://gauzonia.info/spip.php?article107
trasgu | 22-09-2007 - 20:01:12 GMT 2 #
Home, eso de que l'"Asturias patria querida" ye l'himnu d'Asturies namás que dende l'autonomía simplemente nun ye verdá. O yelo solamente dende'l puntu de vista de que del estatutu p'acá ye himnu OFICIAL, carácter que hasta esi momentu nun tenía. Ello ye que los que viviemos dalgunos años primero del 1980 yá "sabíamos" o "sentíamos" que'l "Asturias patria querida" yera l'himnu d'Asturies. Y que n'España yera un cantar de borrachos... :)
"Ai, un galán d'esta villa" ye un cantar pa la danza. Nun sé de naide que lu propunxera nunca como himnu nin que lu sintiera como tal. Y cuéstame caro crelo.
Apatxiwã | 27-09-2007 - 22:00:04 GMT 2 #