Un día pa nun escaecer enxamás
El sábadu foi un día que nun voi escaecer enxamás, un garapiellu d´imaxenes que van quedar muncho tiempu na mio memoria como exemplu de la dignidá d´un pueblu que quier mirar y desplicar el mundu coles pallabres d´equí.
Nun voi poder escaecer tola xente que pasó en coche a lo llargo del trayeutu Avilés-Uviéu y dábanos fuelgos pitando y llevantando´l puñu (hasta un conductor d´Alsa, les persones más bordes del mundu y que siempre te traten como un delincuente). Muncho tiempu va quedar na mio memoria la imaxe de toles ventanes de Posada de Llanera llenes de xente que salíen a mirar que taba pasando y d´onde salíen esos glayíos, nin el paisanu que llegando yá a la Estación del Norte salió a la so ventana con una asturina pa saludanos, ehí tuvi qu´aguantar que nun me cayera la llarimina (ún ye un sensiblón). Llegué a sentime protagonista d´una película cuando entrabamos a la capital per en mediu de la carretera con una pancarta de “Avilés pola oficialidá” y una caravana de dos quilómetros de coches detrás mientres los polis llocales abríen camín.
L´únicu malu de tol día foron los Guardies Civiles que s´animaron a acompañanos col so coche per tol conceyu de Siero y qu´amenazaron con multes dempués de qu´una persona tirara un bote de Coca-cola a la cuneta (quedóme mui nidiu que les fuercies de seguridá del Estáu nun tan pa protexer al ciudadán sinón pa protexer al poder del ciudadán que ñégase a quedar calláu), queríen quitanos dignidá faciéndonos sentir como delincuentes. Cuasi, más fuelgos pa llugar por una Asturies de toos y por una democracia dafechu.
Y dempués 20.000 persones enllenando el centru d´Uviéu, muncho glayamos: “Areces babayu fala n´asturianu”, “Yá, yá, yá oficialidá”, “Llingua asturiana na universidá”....
Nun voi poder escaecer el 24 de payares de 2007. Ellos siguiran enllordiando y mintiendo, como si foramos fatos que mos creyeramos les sos pallabres, colos medios de comunicación compraos y afalagando al poder, pero nós tuvimos ehí cola cabeza bien alta, esixendo dignidá y futuru y llanzando al mundu´l nuesu mensaxe democráticu: L´ASTURIANU LLINGUA OFICIAL.
Esbilla
del.icio.us
18 d´ochobre:
¡¡¡TOOS CON DIXEBRA!!!
casi lloro nin! Emocioneime ya tou.
Prestome conocete, Salú trasgu!
leti | 27-11-2007 - 19:33:51 GMT 2 #
A min tamién prestóme conoceros a toos. ¡¡¡Somos los dos unos sensiblones!!! Un saludu mui fuerte.
trasgu | 27-11-2007 - 22:45:59 GMT 2 #
Trasgu vas triunfar, digotelo yo. Ya facia tiempu que nun m'entraba tantu un articulu.
Yo tamien lo vivi lo de la entrada n'Uviéu, nun me di cuenta de lo que tabamos faciendo hasta que te llei. IMPRESIONANTE. Eso si que ye pa titulares, col "madelman" ariendonos pasu dende La Corredoria hasta la Estación de RENFE, vaya par de... qu'echamos Avilés y Xixón.Merecio la pena les angúañes. Moyate pola OFICILIDÁ.
Aruelu | 27-11-2007 - 23:28:45 GMT 2 #
Gracies nin, Dios t´oya.
trasgu | 28-11-2007 - 13:50:34 GMT 2 #
Guapa entrada, lleendola dame mas rabia habelo perdío.
Salú.
Ateyavana | 28-11-2007 - 15:47:08 GMT 2 #
Coime, lo de l'asturina y el paisanu na ventana debió ser emocionante. ¿Pero yera l'asturina tradicional o la de la estrella?
Vity | 28-11-2007 - 17:29:28 GMT 2 #
Yera la tradicional col alfa y l´omega. Pero de toos moos foi igual d´emocionante.
trasgu | 29-11-2007 - 18:59:21 GMT 2 #
conceyu de Llugones :-D
Pingarates | 30-11-2007 - 07:17:03 GMT 2 #
Ye pa sofitar el movimientu de dixebra de Llugones del conceyu Siero... ;)
Gracies pol avisu, nin me diera cuenta.
trasgu | 30-11-2007 - 13:21:54 GMT 2 #
Bueno, felicidaes pol esfuerzu y pola gana qu'echestis. Tuvo méritu y ye d'agradecer. Pero de 20.000 persones na manifestación, nada de nada. Nun sé si llegaríamos a 5.000.
Y lo de la """asturina"""... por dios... escaecéi d'una vez esos inventacos andechanos, home... Y pa encima que si "tradicional" o si con mancha de regla nuna esquina... Ye la bandera d'Asturies: con una Cruz de la Victoria mariella sobre fondu azul celeste, con alfa y con omega y sin estrella nenguna. Foi diseñada por Xovellanos cuando la francesada y ye la nuestra historia. Un respetu, "asturinos".
Pastielles Xuanola | 30-11-2007 - 14:35:39 GMT 2 #
Naide-y ta quitando valir a la bandera col alfa y l´omega, nesi momentu prestóme del mesmu mou que si fora la de la estrella. Y yá Conceyu Bable dicía "asturina" pa referise a la nuesa bandera (y ensin estrelles). Por ciertu, l´estatutu esplicita que l´escudu ye col alfa y l´omega y dempués de la bandera nun diz nada, namás que ye la cruz de la victoria. Si mos ponemos farrucos podemos dicir que´l alfa y l´omega na bandera ye anti-constitucional. A min dame lo mesmo con alfa y omega que con estrella, préstame más cola estrella pero fai munchos años garré na feria muestres una "tradicional" y equí la tengo pinchada na parede.
trasgu | 30-11-2007 - 15:04:22 GMT 2 #
Siacasu "antiestatutaria", Trasgu, non "anticonstitucional. Que tovía nun somos un país independiente...
Por cierto, sobre lo de que yá Conceyu Bable usaba lo d'«asturina» (un inventu desgraciáu, inventáralu Andecha Astur o Conceyu Bable) ¿podíes dame la referencia? Estimaríatelo muncho.
Pastielles Xuanuela | 02-12-2007 - 04:42:09 GMT 2 #
Nos llibros que s´espublizaron fai pocos años cola sida del trenta aniversariu de Conceyu Bable con tolos artículos d´Asturies Selmanal pue vese como son munches les ocasiones que nomen la bandera como "asturina". Déxote un enllaz qu´inclúi l´artículu orixinal asoleyáu nes páxines de Conceyu Bable n´Asturies Selmanal sobre la colocación de la primer asturina nun ayuntamientu del país, xustamente n´Avilés.
http://gauzonia.info/spip.php?article107
Colo de antiestatutaria ties razón, la costume d´oyer siempre anticonstitucional, anticonstitucional... ;)
trasgu | 02-12-2007 - 18:40:59 GMT 2 #
¡Gracies!
Pastielles Xuanuela | 03-12-2007 - 00:45:00 GMT 2 #