el trAsgU d´aRecEs

Nun me presta nada la Navidá, esi tufu a fiesta relixosa mecida col capitalismu más salvaxe dame unes revoltures que nun tien xeitu. Pero güei lleendo la edición bilbaína del diariu de baldre “20 minutos” entróme una cosa perestraña, de xuru que yera eso que llamen “espíritu naviediegu”, que fai cuantayá que nun sentía llegaes estes entrañables feches. La noticia en cuestión falaba d´un colexu de la capital bilbaína onde los neños inmigrantes son mayoría, en total 140 escolinos árabes, chinos, llatinos, xitanos, africanos y, los menos, vascos. Asina anguaño nel colexu Múgica hai nes paredes cartelos onde pue lleese “Bona Navidá” en 16 llingües estremaes, anque a la fin el “Zorionak” vascu ye´l más usáu nos patios del colexu.

Agora los escolinos tan toos gayoleros porque´l prósimu 21 d´avientu va visitar el colexu Olenztero, la versión made in Euskalerria de Papa Noel, y va trayer regalos pa toos, amás van facer un festival y van dir tolos escolinos col traxe del país. Tamién van poder xintar productos típicos d´Euskadi fechos na cocina del colexu y llambionaes que van llevar los padres d´inmigrantes fechos con ingredientes mercaos nel barriu de Bilbao La Vieja (fai cuatro años cuando conocí esti barriu yera´l paraisu del tráficu de drogues y anguaño ye una mecigaya de razes, llingües, kebaps y sones africanos y llatinos). Hasta tienen montáu un belen viviente con un neñu Xesús prietu, fíu d´una virxe María brasileña y un San Xosé ecuatorianu. Y eso qu´en munchos casos los neños nun sabíen nin que yera la navidá hasta esti añu.

Y cuando vuelvan de les fiestes naviediegues tendrán que preparase pa cellebrar l´añu nuevu chinu como a entamos de cursu cellebraron el Ramadán, hasta hai talleres nel colexu nos que los padres y madres cuenten cuentos de la so tierra na so fala vernácula. La propia profesora qu´empobina toles actividaes déxalu mui nidiu nes sos declaraciones al mediu: “Cellebramos la Navidá como fechu cultural; non como daqué relixoso. Asina puen participar tolos neños (...) Los neños nun son metá árabes y metá vascos. Son 100% vascos y 100% marroquianos”.

Prestaríame que´l mundu pudiera ser como la vida ente les paredes del colexu Múgica.