el trAsgU d´aRecEs

El Consell General des Pirineus Orientals reconoció oficialmente´l catalán como llingua de la Catalunya Nord (territoriu de fala catalana baxo alministración del Estáu francés) al traviés de la Carta del Catalán. Ye la primer vez qu´una entidá oficial llegaliza´l catalán en territoriu francés, fechu que yá foi calificáu por asociaciones catalanistes como hestóricu . La Carta yá fora aprobada´l 10 d´avientu pero cuasi nadie supo de la nueva hasta qu´agora s´espublizó nel boletín del Consell y llegó a les cases de tolos catalanes que s´asitien baxo alministración gala.

Nel mesmu preámbulu d´esta llei s´afita que´l reconocimientu del catalán nun va escontra´l francés y la unidá estatal y que se basa na Declaración Universal de los Drechos Humanos y na Carta Europea de les Llingües Rexonales, que tovía ta ensin roblar por Francia. El mesmu Consell diz que la llingua ye importante pal desendolcu económicu del país y nun reconocela sería una “bestialidá”.

Agora, según afita la Carta, el Consell ta obligáu a ser tresmisor de la llingua y cultura catalana y usala en tolos ámbitos de la vida pública, a entamar col enseñu billingüe y facer alcuerdos coles otres alministraciones pa que tamién la promocionen. Amás na Carta queda afitada l´autoridá normativa del Institut d´Estudis Catalans (l´academia de la llingua catalana). Anguaño yá ye posible dirixise a dalgunos funcionarios del Consell en catalán, ver cartelos nes carreteres y llibros nes biblioteques del Consell (una veintena de locales) nesta llingua.

El Consell ye una especie de gobiernu rexonal, anque namás que ye una sele descentralización con competencies en carreteres, n´asistencia social y escueles colo cual la incidencia pública de la Carta pue ser limitada y quedase nuna declaración d´intenciones (nun se pue escaecer qu´en marzu Francia cellebra eleiciones municipales y pue ser una midida con enfotos eleutoralistes).