Na TPA torguen facer risión de los políticos
Tengo que ponelo...
Vuelvo falar otra vegada de la revista “Biblioasturias” porque nesti nuevu númberu inclúi una perinteresante entrevista a trés ente la presentadora de Terapia de Grupo, Sonia Fidalgo, y a dos de los actores del programa, Pedro Durán y Alberto Rodriguez. Yá amosé equí munches vegaes que soi fan del programa (xenial la nueva seición de “Que ye oh, presidente” con un cartelu pasando per baxu con “España nun ye el tu país” y un doblaxe al futbolista Villa diciendo como lo secuestraran y lo obligaron a vistir cola camiseta d´España cuando “esti nun ye´l mio país”) y que prestame a esgaya como faen risión de lo asturiano y col asturianu (nun confundir con del asturianu). Esbillo equí delles cites de la entrevista onde los protagonistes falen del programa y cuenten coses más qu´interesantes (a ver si mos queda claro que tán del nuesu llau qu´a vegaes andamos a la gueta l´asturfobia onde nun la hai):
P.D: Si Terapia de Grupo fuese un partíu políticu, ¿cómo convenceríais a los asturianos pa que vos votasen?
S.F: Los políticos, los qu´agora tán y los que tán por vinir, deberíen dase cuenta de los puntos fuertes que toca Terapia y una vegada comprobaos los resultaos, facer por aplicalos. Per otru llau, paezme que nun tenemos que convencer a naide, ufiertamos una propuesta divertida, qu´amuesa d´un ciertu xeitu la sociedá asturiana... el que se sienta reflexáu que mos vote.
A.R: Un partíu políticu se mantíen pola cantidá de perres que tien y la so “pegada” va en función d´ello, a bas de campañes publicitaries, engañu social... Terapia nun pue competir n´igualdá económica, pues la rexón nun pue competir colos grandes monstruos d´otres cadenes. Asina, si fuere un partíu políticu, nun podría competir n´igualdá, nun podría facer una campaña enorme y tendría que dir al pueblu, un poco como fai Terapia: riéndose del pueblu llanu, pues somos el pueblu llanu y lo fundamental d´un humorista ye reise d´un mesmu... bono, tamién porque tenemos la prohibición de reínos de los políticos. Francamente: la política nun m´importa un res.
S.F: ¿Hasta qué puntu vos paez qu´espresase n´asturianu nel plató pudo influir nel ésitu de Terapia, nel que´l públicu lo acepte como daqué de so?
P.D: A pesiar de les munches mentires que se cuenten del asturianu: que nadie lo fala, que ye una llingua inventada, etc. Ta ehí. Parte del ésitu del nuesu programa confirma que l´asturianu ye una llingua con hestoria, con tradición y que muncha xente fala y comprende. A la tele nun suelen llegar correos n´asturianu, asina qu´una de les coses que más gayola me fizo y me fai ye recibir e-mails escritos n´asturianu o n´amestao. Ye d´agradecer l´esfuerciu que fizo la xente por adaptase al nuesu códigu. Ún de los ésitos del nuesu programa ye que la xente vese reflexada nos personaxes que representamos. Asina, ye mui complicáu que daquién como Toño, el personax que fai Alberto, fale en castellán. Amás, nun tien muncho sentíu que n´Asturies haiga una televisión y que nun te presente n´ella l´asturianu. Tien de reflexar una realidá qu´esiste: n´Asturies fálase asturianu.
Actualización: Vidios "dixebriegos" de Terapia en Yetube.
Esbilla
del.icio.us
18 d´ochobre:
¡¡¡TOOS CON DIXEBRA!!!
nel blogue YeTube ta colgáu esi videu de villa y lo de españa nun ye'l to país. y otru mas burru con un nuevu personax: l'asturl.lale. como tu dicíes hai pocu, humor dixebriegu 100%
VeritasEtSeveritas | 08-02-2008 - 11:08:17 GMT 1 #
Bonísimos los vidios, ye una pena qu´a los de Terapia nun-yos dexen facer tol programa n´asturianu p´asina acabar cola diglosia que delles vegaes ta presente.
trasgu | 08-02-2008 - 23:15:43 GMT 1 #
"Esbillo equí delles cites de la entrevista onde los protagonistes falen del programa y cuenten coses más qu´interesantes (a ver si mos queda claro que tán del nuesu llau qu´a vegaes andamos a la gueta l´asturfobia onde nun la hai):"
Ciertamente el que nun se rí de si mesmu ta condenau na sua vanidá agora que nun escaezcamos que lo asturianu ya val de rision bastante cun frases cumu "baxeste de la braña" "sos de pueblo" ....ya falar asturianu ia GÜEY EN DIA TOVIA, una cousa rara, vei siendu cada vegada menos la xente que lo fala, non sal de la xente natural, ya non ta arraigada na xente anque sepa la l.lingua ya poner a personaxes humoristicos falando n'asturianu en situaciones comicas(que pur outra parte puein nun fader gracia cumu pur exemplu la plaga d'eucalitos) valnos pa reinos de nos mesmus ya pa que la xente vea que los personaxes falan n'asturianu pero nun dexes de l.lau la ridiculización de la l.lingua atraves de los personaxes ya las sos personalidades que puei inducir a un menospreciu mayor entovia...
Si l'asturianu fora oficial dende fai 50 años esos skechts serian lo normal peru date cuenta que na TPA falase castel.lano nos informativos ya nos programas magazine de tarde ya demas (trasmitiendu la seriedá y normalidá del castel.lano) ya dexan l'asturianu pa cousas menores ou onde pueda ponese una visión de l'asturianu de xente cumu "falin" ridiculizando por ciertu tamien de paso cualquier sentimientu nacionalista asturiano., ou la marquesina ridiculizando (pa mi de mal gustu muitas vegadas) a paisanas ya paisanos que salen falando con toda NORMALIDÁ ya nel programa presentase la sua personalidá esaxerada mediante las hiperboles de cierta inorancia o frases como "quiero chorizu" mezclandu falar asturianu cun una determinada personalidá. Resumiendu qu'antes de ridiculizar ya mofase utilizandu l'asturianu, antes d'esu tien que falase nos informativos ya nas cousas normales pa que la xente vea que YE NORMAL falar n'asturianu ya que nun ia una l.lingua que falan na mas personaxes de risa ya cun cierta personalidá.
Ya, ¿nun te parez daque raru qu'el programa esti que segun tu apoya l'asturianu fixera la imitacion n'asturianu de un personaxe cumu Ambas que col so programa foi lider d'audiencia? Si naide conociera a Ambas naide conocería a la marquesina nun lo escaezcas, de fechu nun esistiria la marquesina nin la mita de los sketchs n'asturianu.
Nun duldo que Sonia Fidalgo y los que fain el programa personalmente apoyen l'asturianu peru tous sabemos que na TPA l'asturianu da alerxia dende el so Direutor a determinaus redactores.Si l'audiencia viera mayoritariamente outra cousa que nun fora Camin de Cantares toi pur apostate que nun falarian en nesi programa tantu n'asturianu, claro esto digolo al altu la lleva ya nun se sabria a nun ser que dieramos p'atras nel tiempu.
¿Purque nun ridiculizan a la xente que fala castel.lan nos sos sketchs?
¿Purque nun hai un personaxe que fale'n castel.lano ya los demas se rian d'el pur nun saber asturianu?
¿Purque sacan al PACON ya nun sacan a la FSA? esta entruga alcuerdame outra cousa...
bono, tamién porque tenemos la prohibición de reínos de los políticos. Francamente: la política nun m´importa un res.
Cada ún puei importa-y lo que quiera agora que un programa de la Television Asturiana onde ta prohibio metese co los politicos ¿ia normal? Oservese que los politicos nesti casu= FSA.
ye una pena qu´a los de Terapia nun-yos dexen facer tol programa n´asturianu p´asina acabar cola diglosia que delles vegaes ta presente. Ia una pena ya ademas seguru que dalguien na TPA dixo "el programa en castellano por supuesto...".
Tou estu son opiniones mui subxetivas eh ademas ensin xantar co lo cual igual la fame nun me dexa ver la bona volunta pa co l'asturianu d'esi programa.
Salú ya OFICIALIDÁ (nos informativos, ya nos programas de risas espueis).
Miguel Ánxel | 11-02-2008 - 16:36:10 GMT 1 #
Nun te digo q nun tengas razón (q tienes tola razón en que por que si pa facer risión y non nos informativos), pero si mires un post qu´hai más abaxu ves que lo de reise del nacionalismu o col nacionalismu ye una cosa que faen en toles autonómiques anque ten gobernaes por nacionalistes. Que na TPA tienen llerza a la llingua, ta claro, pero d´eso nun tienen culpa nin van pagar por ello los de Terapia, qu´a min paezme que faen les coses asina xq más nun-yos dexen. El problema ta en que na llingua vehicular de la TPA y de Terapia ye´l castellán y namás qu´usen l´asturianu pa facer risión (asina tamién quiciabes l´espectador siéntelo como un humor más de so), pero hai que ver la evolución de Terapia, de namás q soltar un ye y poner a los invitaos a char sidra con madreñes (vilo) a un hiperasturianismu muncho más intelixente. L´asturianu llama a la xente: Terapia, camín, les gales de tonada, la misa....
Lo de la imitación d´Ambás ta claro que ye pol ésitu de Camín, anque agora´l personaxe yá s´independizó dafechu. Pero tamién imiten a Luján Argüeyes (la d´Asturias en 25, esi programa q s graba en Madrid) y la ponen como una fatina q fala too en castellán y te mete a lo caberu un HO!!!.
Que quede nidio que yo nun defiendo´l modelu de TV remanáu pola FSA, quería dicir Ornia, namás digo q Terapia faeme muncha gracia. Otra cosa yá ye que taría muncho meyor dafechu n´asturianu o que cuando usaren l´asturianu miraren les normes ortográfiques o qu´hai vegaes qu´estiren los personaxes hasta que llegues aborrecelos (esti branu yera marquesina, marquesina, marquesina...)
A ver si s´animen y faen un personaxe que seya un sensatu y pensante que namás fale castellán, anque de xuru que nun-yos dexen. A min lo de que nun-yos dexen facer risión de los políticos paezme mui grave, si se meten nos conteníos d´un programa d´humor pensái que ca pallabra dicha na TPA tien que pasar el preste de los de riba (de los del edificiu qu´hai más pa riba de la Xunta Xeneral).
trasgu | 11-02-2008 - 18:12:29 GMT 1 #