el trAsgU d´aRecEs

Dende payares del 2005 el Cascu Vieyu de Bilbo acueye la llibrería “Safo de Lesbos”, un local rexentáu por Mari Carmen Varela (Bilbao, 1980) qu´amuesa como ensin perder un res de reivindicación el movimientu gai pue convertise nun negociu.

-Esiste una cultura gai y esti establecimientu ye amuesa d´ello, ¿esiste una cultura llésbica?
-Claro que sí, lo que pasa ye que tolo que ye propio de los mozos salió enantes. Yo xebraría la cultura gai de la llésbica, suel englobase too nel Llesbo, Gai, Transexual y Bisexual que coles sigles LLGTB refierse a tol colectivu.

-Tovía la muyer nun algamó dafechu la igualdá de drechos, ¿dientro del movimientu gai repítense los mesmos patrones machistes?
-A vegaes sí, un exemplu ye qu´haiga munchos más productos pa gais que pa llesbianes. Respeutu a asociaciones si qu´hai más de mozos, anque xeneralmente son mixtes.

-¿El llesbianismu pue entendese ensin cuntar cola propia vindicación feminista?
-Los dos van de la mano dientro de la propia vindicación de drechos de la muyer pero tamién van por separtáu. El llesbianismu hestóricamente nun yera prohibíu como la homosexualidá, pero nun por que s´aceptare socialmente sinón por considerar que la muyer nun yera capaz de sentir placer.

-El nacionalismu queer diz que los gais nada tienen que ver col mundu heterosexual y poro tienen drechu a fundar la so propia nación, ¿hai tamién dende dalgún sector del llesbianismu una dixebra haza la muyer hetero?
-Nel llesbianismu esa dixebra haza´l mundu hetero produzse tamién haza´l propia home y vien de la propia vindicación de la muyer y la so llucha escontra´l machismu.

-Acaben de cellebrase una eleiciones onde salió victoriosu un PSOE que na pasada llexislatura sacó alantre´l matrimoniu gai, ¿hai cierta “amistá” del colectivu gai haza Zapatero?
-Polo menos nel mio casu sí, paezme qu´hubo un avance abondo importante y esperemos que se mantenga nesta defensa de los nuestros drechos.

-Tien que ser preocupante pal colectivu que 10.000.000 millones de persones voten a un partíu que remana un únicu modelu de familia.
-Tien qu´haber de too. A min lo que m´esmolez ye que la xente mozo puea refugar a los sos collacios pol fechu de tener una sexualidá estremada de la de la mayoría. Lo qu´hai que facer ye educar dende neños, nosotres por exemplu tenemos munchos colexos que mos piden cuentos con families de dos padres o dos madres.

-Según una guía gai y llesbica espublizada por Aldarte en Bilbao yá hai 43 locales de temática gai, ¿la ciudá ye yá´l referente del norte del Estáu?
-Ta convirtiéndose, equí pol Cascu Vieyu ye lu más normal ver una pareya del mesmu sexu coyida de la mano.

-¿Y estos barrios gais nun son como una especie de “ghettos” que se constrúi´l colectivu por necesidá pa poder desendolcar dafechu la so identidá?
-Tanto como necesidá nun lu sé, pero la xente quier tar en sitios onde te cómodu y puea ser como ye, nun onde-y miren por simplemente dir de la mano cola so pareya.