Televisión (normal) n´asturianu
Dicía Vanessa Gutiérrez na presentación del nuevu "Pieces" qu´una pieza ye una parte d´un artefactu mayor que necesita d´una perfeuta colocación al par qu´otros ellementos asemeyaos pa que´l conxuntu funcione. Y esti yera´l gran problema del "Pieces" antiguu: cachos que nun teníen nada que ver ún col otru colocaos de siguíu. L´antiguu "Pieces" tenía sentíu emitíu a lo llargo de la programación (amás de sirvir de visibilización d´una llingua que la TPA namás utiliza 10 minutos de llunes a vienres), pero en bloque los sábados yera una mecigaya de conteníos xuníos ensin xacíu. El cambeu foi pa meyor, pa muncho meyor. Yera hora de que la programación n´asturianu tamién bebiera de les téuniques audiovisuales, pa eso ye un programa de televisión, y dexara de ser (quitando "Camín de Cantares") un quiero y nun pueo. Yera hora de ver un programa n´asturianu con calidá y medios y non una amuesa de lo que podría ser de tener una televisión normal qu´emitiera pa un país normal.
Agora namái falta que los otros programes n´asturianu ("Al Aldu" y "Nós") sigan el mesmu camín. Podía tolerase, yá puestos a tolerar tolo que toleramos, que nel primer añu de programes n´asturianu estos foren pequeñes seiciones pa sirvir como prueba y pa midir el so resultáu. Pero un añu dempués nun se pue pescanciar como "Al Aldu" sigui durando 10 minutos. ¿Nun podría "La Risión" convertise nun programa selmanal al estilu de "El club de la comedia?, ¿nun podría "Recetes con cuentu" (si la TPA tirara por esti programa tengo nidiu que sería un gran ésitu) durar media hora pa que Milio´l del Nido tuviera tiempu a cocinar nun programa de cocina?, ¿nun podría "Xente de casa" ser un programa diariu viendo que los informativos de la TPA enxamás usen l´asturianu?.
Y nun faen falta nin grandes presupuestos, nin grandes idees, nin grandes estrelles. L´únicu programa que sigo d´ETB-1 ye "Gaztea", un programa diariu de videoclips onde dempués del últimu de Madonna o El Canto del Loco te ponen ún de Fermín Muguruza y otru de Banda Basssoti. Facer un programa asina nun costaría nada, sería al xeitu de "Al Aldu": presentador y croma, y valdría p´enseñar, sobre manera a la mocedá, que la llingua ye tamién "moderna". Pa facer hai que querer y ye nidiu que na direición de la TPA nun quieren facer nada pol asturianu más allá de los cinco minutinos protocolarios (a ver si va pasar como col d´Ambas...)
P.D: Pieces foi esti sábadu´l tercer programa más vistu del día (9.000 espectadores y 13,3% de share), per detras del TPA Noticias-1 (15.000 y 15,2%) y Camín de Cantares que foi´l programa de más audiencia d´esti sábadu (13.000 y 18,8%). La media del día de la canal foi 7,8%.
P.D.2: Fai más d´un añu, cuando entamó la programación n´asturianu, fici una crítica sobre los trés programes. Los de "Pieces" acabáronme faciendo casu ;)
Esbilla
del.icio.us
18 d´ochobre:
¡¡¡TOOS CON DIXEBRA!!!
La estrena de la segunda temporada de pieces dobla la media d'audiencia en TPA
imprimir unviar El programa «Pieces», na so emisión del sábadu 7 de xunu, la primera con Vanessa Gutiérrez como presentadora, algamó un 13,3% de share, casi'l doble que la media de TPA esi mesmu día, que foi d'un 7,8%. Esta cifra colocólu como'l tercer espaciu de mayor audiencia de TPA el sábadu, per detrás de «Camín de Cantares» y «TPA Noticias 1». La audiencia refrendó, d'esta manera, la renovación del espaciu cultural producíu por Ámbitu pa la televisión pública asturiana. El cambiu más destacable d'esta nueva etapa ye la presencia de la escritora Vanessa Gutiérrez como conductora, que sirve como elementu de continuidá ente les secciones del programa y de los programes ente ellos.
La otra producción d'Ámbitu pa TPA, «Camín de Cantares», el programa presentáu por Xosé Ambás, posiciónase como líder indiscutible de los sábados en TPA. El sábadu 7 de xunu emitióse el primer capítulu de la tercer temporada, que llegó al 18,8% de cuota de pantalla, la mayor de tola parrilla de TPA el sábadu.
Pela so parte, Televisión del Principau d'Asturies celebra estos díes el so segundu aniversariu, desque'l 9 de xunu de 2006 empezaren les emisiones regulares con «TPA Noticias», «TPA Deportes» y el cine. La programación de la cadena autonómica llega al 98,82% del territoriu d'Asturies y algamó'l el mes de mayu pasáu un 7,23% de share, una cuota de mercáu que la coloca n'Asturies per delantre del conxuntu de toles canales locales (3%), la Sexta (4,9%), la 2 (5,2%) y Cuatro (7,22%).
La cadena emitió, dende'l primer día d'emisiones regulares, un total de 11.595 hores de programación a parrilla vista (de 8:00 a 1:30 hores, aproximadamente), de les que 3.270 foron n'asturianu.
lesnoticies.com
P.D; ¿daquién lo vio?. Sal una semeya xunto a esta noticia onde pue vese a Gutiérrez entrevistando a Xuan Bello, detrás pue vese un decoráu mui cenciellu pero mui curiosu. Ye´l primer programa n´asturianu con plató propiu.
trasgu | 09-06-2008 - 19:26:36 GMT 2 #
Ye un formatu mui prestosu y mui dignu. A ver si Vanessa garra un poco de soltura porque la verdá
ye que paez que tien un palu metíu per aquella parte.
Vanesu | 09-06-2008 - 21:05:26 GMT 2 #
"Nun solo pieces"... perdonái nun pude evitalo, nun ye tanto los medios (que yo nun veo precisamente un derroche de medios) sinon les ganes de facer les coses bien, y paez qu'ambitu tien eses ganes. Tamién ye normal qu'estos programes seyan en dalgunos casos un pelín ramplones (nel casu d'Al Aldu podría decise cutre direutamente) hai que tener en cuenta que tan producíos por editoriales y non productores de tv y esa inexperiencia tien de notase, lo interesante ye que se ve un interés y un esfuerciu en meyorar. Tema aparte nun ye'l primer programa n'asturianu con plató propiu, otra cosa ye que nun seya un putu croma y tenga decoráu...
De toes formes ta mui bien tener programes culturales n'asturianu, pero yo quiero ver informativos n'asturianu, el futbol n'asturianu, culebrones n'asturianu y pelis n'asturianu... vamos quiero normalidá...
Dangerous Piper | 10-06-2008 - 17:30:16 GMT 2 #
En YeTube ta'l capítulu enteru, si queréis ver esa entrevista a Xuan Bello que diz trasgu
Un | 10-06-2008 - 20:06:15 GMT 2 #