el trAsgU d´aRecEs

Dempués de poner esta illustración d´Iván Álvarez facía risión colo poco que desentonaba la hestoria de "Brokeback Mountain" protagonizada por vaqueiros. Pues esto, más o menos, van llevalo a la práutica los vascos. Asina, ta rodándose nel pueblu vizcaín d´Arratia la primer película de tema gai vasca y rodada n´euskara (puen contase colos deos d´una mano les películes rodaes en V.O. vasca dende la Transición), amás como la peli de Ang Lee tamién va desendolcase nuna sociedá rural moralmente homofóbica. La película va tar dirixida por Roberto Castón, direutor del Zinegoak de Bilbo, va entitulase “Ander” y va narrar la hestoria d´un cuarentón que vive cola so má nun caseriu de la Bizkaia profunda. Tres sofrir un accidente Ander nun pue facer les llabores de la casa y la so má y elli deciden contratar a daquién que-yos eche un gabitu. A pesiar de la refuga de la má a la fin contraten a un inmigrante peruanu. El mundu nel que viven los protagonistes camuda de sutrucu cuando Ander dase cuenta qu´entama a sentir daqué pol inmigrante y cuando la so má percibi que dalgo raru hai ente ellos dos. La película, financiada pol Gobiernu vascu, Diputación de Bizkaia y EITB, va estrenase na gala inagural del Zinegoak.

P.D: Gaites, culines, mayadores, monteres picones... La nuesa ideosincrasia tien muncho que dar a la industria del cine pornu gai.